Salamu

¹Paulo, aliyeitwa kuwa mtume wa Yesu Kristo kwa mapenzi ya Mungu, na Sosthene ndugu yetu,

²kwa kanisa la Mungu lililoko Korintho, wale waliotakaswa katika Kristo Yesu, walioitwa wawe watakatifu, pamoja na wote wanaoliitia jina la Bwana wetu Yesu Kristo kila mahali, Bwana wao na wetu.[#Mdo 18:1; 1 Kor 6:11; Mdo 9:14]

³Neema na iwe kwenu na amani, zitokazo kwa Mungu Baba yetu, na kwa Bwana Yesu Kristo.[#Rum 1:7]

⁴Namshukuru Mungu sikuzote kwa ajili yenu, kwa sababu ya neema ya Mungu mliyopewa katika Kristo Yesu;

⁵kwa kuwa katika kila jambo mlitajirika katika yeye, katika maneno yote, na maarifa yote;

⁶kama ushuhuda wa Kristo ulivyothibitika kwenu;

⁷hata hamkupungukiwa na karama yoyote, mkikutazamia sana kufunuliwa kwake Bwana wetu Yesu Kristo;[#Lk 17:30; 2 The 1:7; Tit 2:13]

⁸ambaye atawathibitisha hata mwisho, ili msilaumiwe siku ile ya Bwana wetu Yesu Kristo.[#Flp 1:6; 1 The 3:13; 5:23]

⁹Mungu ni mwaminifu ambaye mliitwa na yeye mwingie katika ushirika wa Mwanawe, Yesu Kristo Bwana wetu.[#1 The 5:24; 1 Yoh 1:3]

Migawanyiko katika kanisa

¹⁰Basi ndugu, nawasihi, kwa jina la Bwana wetu Yesu Kristo, kwamba nyote mnene mamoja; wala pasiwe kwenu migawanyiko, bali mhitimu katika nia moja na shauri moja.[#Flp 2:2; 3:16]

¹¹Kwa maana, ndugu zangu, nimearifiwa habari zenu na wale walio wa nyumbani mwa Kloe, ya kwamba uko ugomvi kwenu.

¹²Basi, maana yangu ni hii, ya kwamba kila mtu wa kwenu kusema, Mimi ni wa Paulo, na, Mimi ni wa Apolo, na, Mimi ni wa Kefa, na, Mimi ni wa Kristo.[#Mdo 18:24,27; 1 Kor 3:4; Yn 1:42]

¹³Je! Kristo amegawanyika? Je! Paulo alisulubiwa kwa ajili yenu? Au je! Mlibatizwa kwa jina la Paulo?

¹⁴Nashukuru, kwa sababu sikumbatiza mtu kwenu, ila Krispo na Gayo;[#Mdo 18:8; 19:29; Rum 16:23]

¹⁵mtu asije akasema kwamba mlibatizwa kwa jina langu.

¹⁶Tena niliwabatiza watu wa nyumbani mwa Stefana; zaidi ya hao, sijui kama nilimbatiza mtu yeyote mwingine.[#1 Kor 16:15]

¹⁷Maana Kristo hakunituma ili nibatize, bali niihubiri Habari Njema; wala si kwa hekima ya maneno, msalaba wa Kristo usije ukabatilika.[#Yn 4:2; Mt 28:19]

Kristo aliye Nguvu na hekima ya Mungu

¹⁸Kwa sababu neno la msalaba kwao wanaopotea ni upuzi, bali kwetu sisi tunaookolewa ni nguvu ya Mungu.[#2 Kor 4:3; Rum 1:16]

¹⁹Kwa kuwa imeandikwa,[#Isa 29:14]

Nitaiharibu hekima yao wenye hekima,

Na akili zao wenye akili nitazikataa.

²⁰Yuko wapi mwenye hekima? Yuko wapi mwandishi? Yuko wapi mleta hoja wa nyakati hizi? Je! Mungu hakuifanya hekima ya dunia kuwa ni upumbavu?[#Ayu 12:17; Isa 19:12; 33:18; 44:25]

²¹Kwa maana katika hekima ya Mungu, dunia isipopata kumjua Mungu kwa hekima yake, Mungu alipenda kuwaokoa waaminio kwa upuzi wa lile neno linalohubiriwa.[#Mt 11:25; Lk 8:12]

²²Kwa sababu Wayahudi wanataka ishara, na Wagiriki wanatafuta hekima;[#Mt 12:38; Yn 4:48; Mdo 17:18,32]

²³bali sisi tunamhubiri Kristo, aliyesulubiwa; kwa Wayahudi ni kikwazo, na kwa Wagiriki ni upuzi;[#1 Kor 2:14; Rum 9:32]

²⁴bali kwao waitwao, Wayahudi kwa Wagiriki, ni Kristo, nguvu ya Mungu, na hekima ya Mungu.[#Kol 2:3]

²⁵Kwa sababu upumbavu wa Mungu una hekima zaidi ya wanadamu, na udhaifu wa Mungu una nguvu zaidi ya wanadamu.[#2 Kor 13:4]

²⁶Maana, ndugu zangu, angalieni mwito wenu, ya kwamba si wengi wenye hekima ya mwilini, si wengi wenye nguvu, si wengi wenye cheo walioitwa;[#Mt 11:25; Yn 7:48; Yak 2:1-5]

²⁷bali Mungu aliyachagua mambo mapumbavu ya dunia awaaibishe wenye hekima; tena Mungu alivichagua vitu dhaifu vya dunia ili aviaibishe vyenye nguvu;

²⁸tena Mungu alivichagua vitu vinyonge vya dunia na vilivyodharauliwa, naam, vitu ambavyo haviko, ili avibatilishe vile vilivyoko;

²⁹mwenye mwili awaye yote asije akajisifu mbele za Mungu.[#Rum 3:27; Efe 2:9]

³⁰Bali kwa yeye ninyi mmepata kuwa katika Kristo Yesu, aliyefanywa kwetu hekima itokayo kwa Mungu, na haki, na utakatifu, na ukombozi;[#Yer 23:5,6; 2 Kor 5:21; Yn 17:19]

³¹kusudi, kama ilivyoandikwa, Yeye aonaye fahari na aone fahari juu ya Bwana.[#Yer 9:23,24]