Maonyo kutoka historia ya Israeli

¹Kwa maana, ndugu zangu, sipendi mkose kufahamu ya kuwa baba zetu walikuwa wote chini ya wingu; wote wakapita kati ya bahari;[#Kut 13:21-22; 14:22-29]

²wote wakabatizwa wawe wa Musa katika wingu na katika bahari;

³wote wakala chakula kile kile cha roho;[#Kut 16:4,35; Kum 8:3]

⁴wote wakanywa kinywaji kile kile cha roho; kwa maana waliunywea mwamba wa roho uliowafuata; na mwamba ule ulikuwa ni Kristo.[#Kut 17:6; Hes 20:11]

⁵Lakini wengi sana katika wao, Mungu hakupendezwa nao; maana waliangamizwa jangwani.[#Hes 14:16,23,29-30]

⁶Basi mambo hayo yalikuwa mifano kwetu, kusudi sisi tusiwe watu wa kutamani mabaya, kama wale nao walivyotamani.[#Hes 11:4,34]

⁷Wala msiwe waabudu sanamu, kama wengine wao walivyokuwa; kama ilivyoandikwa, Watu waliketi kula na kunywa, kisha wakasimama wacheze.[#Kut 32:6]

⁸Wala msifanye uasherati, kama wengine wao walivyofanya, wakaanguka siku moja watu elfu ishirini na tatu.[#Hes 25:1-18]

⁹Wala tusimjaribu Bwana, kama wengine wao walivyomjaribu, wakauawa na nyoka.[#Hes 21:5-6]

¹⁰Wala msinung'unike, kama wengine wao walivyonung'unika, wakauawa na mharibifu.[#Hes 16:41-49; 14:2,36; Ebr 3:11,17]

¹¹Basi mambo hayo yaliwapata wao kwa jinsi ya mifano, yakaandikwa ili kutuonya sisi, tuliofikiwa na miisho ya nyakati.[#1 Pet 4:7]

¹²Kwa hiyo anayejidhania kuwa amesimama na aangalie asianguke.

¹³Jaribu halikuwapata ninyi, isipokuwa lililo kawaida ya wanadamu; ila Mungu ni mwaminifu; ambaye hatawaacha mjaribiwe kupita muwezavyo; lakini pamoja na lile jaribu atafanya na mlango wa kutokea, ili muweze kustahimili.

¹⁴Kwa ajili ya hayo, wapenzi wangu, ikimbieni ibada ya sanamu.[#1 Yoh 5:21]

¹⁵Nasema kama na watu wenye akili; lifikirini ninyi ninenalo.

¹⁶Kikombe kile cha baraka tukibarikicho, je! Si ushirika wa damu ya Kristo? Mkate ule tuumegao, si ushirika wa mwili wa Kristo?[#Mt 26:26-28; Mk 14:22-24; Lk 22:19-20; Mdo 2:42]

¹⁷Kwa kuwa mkate ni mmoja, sisi tulio wengi tu mwili mmoja; kwa maana sisi sote twapokea sehemu ya ule mkate mmoja.[#1 Kor 12:27; Rum 12:5]

¹⁸Waangalieni hao Waisraeli walivyokuwa kwa jinsi ya mwili; wale wazilao dhabihu, je! Hawana shirika na madhabahu?[#Law 7:6,15]

¹⁹Basi niseme nini? Ya kwamba kile kilichotolewa sadaka kwa sanamu ni kitu? Au ya kwamba sanamu ni kitu?[#1 Kor 8:4]

²⁰Sivyo, lakini vitu vile wavitoavyo sadaka wavitoa kwa mashetani, wala si kwa Mungu; nami sipendi ninyi kushirikiana na mashetani. Hamwezi kunywea kikombe cha Bwana na kikombe cha mashetani.[#Kum 32:17; Law 17:7; Zab 106:37; Ufu 9:20]

²¹Hamwezi kushirikiana katika meza ya Bwana na katika meza ya mashetani.[#2 Kor 6:15,16; Mal 1:7,12]

²²Au twamtia Bwana wivu? Je! Tuna nguvu zaidi ya yeye?[#Kum 32:21]

Fanyeni yote kwa utukufu wa Mungu

²³Vitu vyote ni halali; bali si vitu vyote vifaavyo. Vitu vyote ni halali; bali si vitu vyote vijengavyo.[#1 Kor 6:12]

²⁴Mtu asitafute faida yake mwenyewe, bali ya mwenzake.[#Rum 15:2]

²⁵Kila kitu kiuzwacho sokoni kuleni, bila kuulizauliza, kwa ajili ya dhamiri;[#1 Kor 14:2-10,22]

²⁶maana, Dunia ni mali ya Bwana na vyote viijazavyo.[#Zab 24:1]

²⁷Na mtu asiyeamini akiwaalika, nanyi mnataka kwenda, kuleni kila kitu kiwekwacho mbele yenu bila kuulizauliza, kwa ajili ya dhamiri.[#Lk 10:8]

²⁸Lakini mtu akiwaambia, Kitu hiki kimetolewa kiwe sadaka, msile, kwa ajili yake yeye aliyewaambia, na kwa ajili ya dhamiri.[#1 Kor 8:7]

²⁹Nasema, dhamiri, lakini si yako, bali ya yule mwingine. Maana kwa nini uhuru wangu uhukumiwe na dhamiri ya mtu mwingine?

³⁰Ikiwa mimi natumia sehemu yangu kwa shukrani, kwa nini nitukanwe, kwa ajili ya kitu nikishukuriacho?[#1 Tim 4:4]

³¹Basi, mlapo, au mnywapo, au mtendapo neno lolote, fanyeni yote kwa utukufu wa Mungu.[#Kol 3:17]

³²Msiwakoseshe Wayahudi wala Wagiriki wala kanisa la Mungu,[#Rum 14:13]

³³vile vile kama mimi niwapendezavyo watu wote katika mambo yote, nisitake faida yangu mwenyewe, ila faida yao walio wengi, wapate kuokolewa.[#1 Kor 9:20-22]