Eliya atabiri ukame

¹Basi Eliya Mtishbi, wa wageni wa Gileadi, akamwambia Ahabu, Kama BWANA, Mungu wa Israeli, aishivyo, ambaye ninasimama mbele zake, hakutakuwa na umande wala mvua miaka hii, ila kwa neno langu.[#Lk 1:17; 4:25; 2 Fal 3:14; Kum 10:8; Yak 5:17]

²Neno la BWANA likamjia, kusema,

³Ondoka hapa, geuka, uende upande wa mashariki, ujifiche karibu na kijito cha Kerithi kinachokabili Yordani.

⁴Itakuwa utakunywa maji ya kile kijito; nami nimewaamuru kunguru wakulishe huko.[#Zab 37:3; Isa 33:15]

⁵Basi akaenda akafanya kama alivyosema BWANA; kwa kuwa alikwenda akakaa karibu na kijito cha Kerithi, kinachokabili Yordani.

⁶Kunguru wakamletea mkate na nyama asubuhi, na mkate na nyama jioni, akanywa maji ya kile kijito.

⁷Ikawa, baada ya siku kupita, kile kijito kikakatika, kwa sababu mvua haikunyesha katika nchi.

Mjane wa Sarepta

⁸Neno la BWANA likamjia, kusema,

⁹Ondoka, uende Sarepta, ulio mji wa Sidoni, ukae huko. Tazama, nimemwagiza mwanamke mjane wa huko akulishe.[#Oba 1:20; Lk 4:26]

¹⁰Basi, akaondoka, akaenda Sarepta; hata alipofika langoni pa mji, kumbe! Mwanamke mjane alikuwako akiokota kuni; akamwita, akamwambia, Niletee, nakuomba, maji kidogo chomboni nipate kunywa.[#Mwa 24:7; Zab 24:1; Isa 33:16; Yn 4:7; Ebr 11:37]

¹¹Alipokuwa akienda kuleta, akamwita akasema, Niletee, nakuomba, kipande cha mkate mkononi mwako.

¹²Naye akasema, Kama BWANA, Mungu wako, aishivyo, sina mkate, ila konzi ya unga katika pipa, na mafuta kidogo katika chupa; nami ninaokota kuni mbili ili niingie nijipikie mwenyewe na mwanangu, tule kisha tufe.[#Mwa 18:6; 21:15,16]

¹³Eliya akamwambia, Usiogope; nenda ukafanye kama ulivyosema; lakini unifanyie kwanza mkate mdogo ukaniletee; kisha ujitengenezee na mwanao.[#Mwa 22:1,2; 1 Pet 1:7]

¹⁴Kwa kuwa BWANA, Mungu wa Israeli, asema hivi, Lile pipa la unga halitapunguka, wala ile chupa ya mafuta haitaisha, hata siku ile BWANA atakapoleta mvua juu ya nchi.[#Zab 84:7-10,12; 34:11; 1 Tim 4:8; Flp 4:19]

¹⁵Basi akaenda, akafanya kama alivyosema Eliya; na yeye mwenyewe, na Eliya, na nyumba yake, wakala siku nyingi.[#2 Nya 20:20; Mt 10:41,42; 20:28; Ebr 11:8]

¹⁶Lile pipa la unga halikupunguka, wala ile chupa ya mafuta haikuisha, sawasawa na neno la BWANA alilolinena kwa kinywa cha Eliya.[#Kum 15:10; Mit 11:24]

Eliya amfufua mtoto wa mama mjane

¹⁷Ikawa, baada ya hayo, mwana wake yule mwanamke, bibi wa nyumba ile, akaugua; ugonjwa wake ukazidi hata akawa hana pumzi tena.

¹⁸Akamwambia Eliya, Nina nini nawe, Ee mtu wa Mungu? Je! Umenijia ili dhambi yangu ikumbukwe, ukamwue mwanangu?[#2 Sam 16:10; Lk 4:34; 5:8; Yn 2:4]

¹⁹Akamwambia, Nipe mwanao. Akamtoa katika kifua chake, akamchukua juu chumbani mle alimokaa mwenyewe, akamlaza kitandani pake.

²⁰Akamwomba BWANA, akanena, Ee BWANA, Mungu wangu, je! Umemtenda mabaya mjane huyu ninayekaa kwake hata kumwua mwanawe?[#Kut 15:25; 17:4; Hes 11:11; 1 Sam 7:8; 1 Fal 18:36,37; Flp 4:6; Yak 5:13,16]

²¹Akajinyosha juu ya mtoto mara tatu, akamwomba BWANA, akanena, Ee BWANA, Mungu wangu, nakusihi, roho ya mtoto huyu imrudie ndani yake tena.[#2 Fal 4:34,35; Mdo 20:10]

²²BWANA akaisikia sauti ya Eliya; na roho ya mtoto ikamrudia, akafufuka.[#Zab 65:2; 66:19; Mit 15:8,29; Mt 21:22; Lk 11:9,10; 1 Yoh 3:22; 5:14; Kum 32:39; Lk 7:14; Mdo 20:10,12; Ebr 11:35]

²³Eliya akamtwaa mtoto, akamchukua toka ghorofani mpaka chini ya nyumba ile, akampa mama yake. Eliya akanena, Tazama, mwanao yu hai.

²⁴Mwanamke akamwambia Eliya, Sasa najua ya kuwa wewe ndiwe mtu wa Mungu, na ya kuwa neno la BWANA kinywani mwako ni kweli.[#Yn 3:2; 16:30]