Mawakili wema na neema ya Mungu

¹Basi kwa kuwa Kristo aliteswa katika mwili wake, ninyi nanyi jivikeni silaha ya nia ile ile; kwa maana yeye aliyeteswa katika mwili ameachana na dhambi.[#Rum 6:2,7]

²Tangu sasa msiendelee kuishi katika tamaa za wanadamu, bali katika mapenzi ya Mungu, wakati wenu uliobaki wa kukaa hapa duniani.[#1 Yoh 2:16,17]

³Maana wakati wa maisha yetu uliopita watosha kwa kutenda mapenzi ya Mataifa; kuishi katika uzinzi, tamaa, ulevi, na karamu za kula na kunywa vileo kupindukia, na ibada haramu ya sanamu;[#Efe 2:2,3; Tit 3:3]

⁴mambo ambayo wao huona kuwa ni ajabu ya ninyi kutokwenda mbio pamoja nao katika ufisadi ule ule usio na kiasi, wakiwatukana.

⁵Nao watatoa hesabu kwake yeye aliye tayari kuwahukumu walio hai na waliokufa.[#Mdo 10:42; 2 Tim 4:1; Rum 14:9,10]

⁶Maana kwa ajili hiyo hata hao waliokufa walihubiriwa Injili, ili kwamba wahukumiwe katika mwili kama wahukumiwavyo wanadamu; bali wawe hai katika roho kama Mungu alivyo hai.[#1 Pet 3:19; Rum 8:10; 1 Kor 5:5]

⁷Lakini mwisho wa mambo yote umekaribia; basi, iweni na akili, mkeshe katika sala.[#1 Kor 10:11; 1 Yoh 2:18]

⁸Zaidi ya yote iweni na bidii kubwa katika kupendana; kwa sababu upendano husitiri wingi wa dhambi.[#Mit 10:12; 1 Pet 1:22; Yak 5:20; 1 Kor 13:7]

⁹Mkaribishane ninyi kwa ninyi, pasipo kunung'unika;[#Ebr 13:2]

¹⁰kila mmoja kwa kadiri alivyoipokea karama, itumieni kwa kuhudumiana; kama mawakili wema wa neema mbalimbali za Mungu.[#Lk 12:42]

¹¹Mtu akisema, na aseme kama asemaye maneno halisi ya Mungu; mtu akihudumu, na ahudumu kwa nguvu anazojaliwa na Mungu; ili Mungu atukuzwe katika mambo yote kwa Yesu Kristo. Utukufu na uweza una yeye hata milele na milele. Amina.[#Rum 3:2; 12:7; 1 Kor 10:31]

Kuteseka kama Mkristo

¹²Wapenzi, msione kuwa ni ajabu ule msiba ulio kati yenu, unaowapata kama moto ili kuwajaribu, kana kwamba ni kitu kigeni kiwapatacho.[#1 Pet 1:6,7]

¹³Lakini kama mnavyoyashiriki mateso ya Kristo, furahini; ili pia katika ufunuo wa utukufu wake mfurahi kwa shangwe.[#Mdo 5:41; Yak 1:2; Rum 8:17; 2 Tim 2:12]

¹⁴Mkilaumiwa kwa ajili ya jina la Kristo ni heri yenu; kwa kuwa Roho wa utukufu na wa Mungu anawakalia.[#1 Pet 2:20; Isa 11:2; Zab 89:50,51]

¹⁵Lakini pasiwe na hata mmoja wenu atakayeteseka kwa kuwa mwuaji, mwizi, mhalifu au hata mfitini.

¹⁶Lakini ikiwa mtu yeyote miongoni mwenu anateseka kwa sababu ni Mkristo, asione haya, bali amtukuze Mungu maana ana jina hili.[#Mdo 11:26; Flp 1:20]

¹⁷Kwa maana wakati umefika wa hukumu kuanza katika nyumba ya Mungu; na ikianza kwetu sisi, mwisho wao wasioitii Injili ya Mungu utakuwaje?[#Eze 9:6; Yer 25:29; 2 The 1:8]

¹⁸Na mwenye haki akiokoka kwa shida, yule asiyemcha Mungu na mwenye dhambi ataonekana wapi?[#Mit 11:31; Lk 23:31]

¹⁹Basi wao wateswao kwa mapenzi ya Mungu na wamwekee amana roho zao, katika kutenda mema, kama kwa Muumba mwaminifu.[#Zab 31:5]