Ahadi ya Roho Mtakatifu

¹Kitabu kile cha kwanza nilikiandika, Theofilo, kuhusu mambo yote aliyoanza Yesu kufanya na kufundisha,[#Lk 1:1-4]

²hadi siku ile alipochukuliwa juu, alipokuwa amekwisha kuwaagiza kwa Roho Mtakatifu wale mitume aliowachagua;[#Lk 6:13]

³wale aliojidhihirisha kwao kuwa yu hai, kwa dalili nyingi, baada ya kuteswa kwake, akiwatokea muda wa siku arubaini, na kuyanena mambo yaliyouhusu ufalme wa Mungu.

⁴Wakati alipokuwa amekutana nao aliwaagiza wasitoke Yerusalemu, bali waingoje ahadi ya Baba, ambayo mlisikia habari zake kutoka kwangu;[#Lk 24:49; Mdo 10:41; Yn 15:26]

⁵ya kwamba Yohana alibatiza kwa maji, bali ninyi mtabatizwa katika Roho Mtakatifu baada ya siku hizi chache.[#Mt 3:11; Mk 1:8; Lk 3:16; Yn 1:33]

Kupaa kwa Yesu

⁶Basi walipokutanika, wakamwuliza, wakisema, Je! Bwana, wakati huu ndipo unapowarudishia Israeli ufalme?[#Lk 24:21; Mdo 3:21]

⁷Akawaambia, Si kazi yenu kujua nyakati wala majira, Baba aliyoyaweka katika mamlaka yake mwenyewe.[#Mk 13:32]

⁸Lakini mtapokea nguvu, akiisha kuwajilia juu yenu Roho Mtakatifu; nanyi mtakuwa mashahidi wangu katika Yerusalemu, na kote katika Yudea, na Samaria, na hata mwisho wa nchi.[#Mt 28:19; Mk 16:15; Lk 24:47-48]

⁹Akiisha kusema hayo, walipokuwa wakitazama, akainuliwa, wingu likampokea kutoka machoni pao.[#Mk 16:19; Lk 24:50-51; Yn 6:62]

¹⁰Walipokuwa wakikaza macho mbinguni, yeye alipokuwa akienda zake, tazama, watu wawili wakasimama karibu nao, wenye nguo nyeupe,[#Lk 24:4]

¹¹wakasema, Enyi watu wa Galilaya, mbona mmesimama mkitazama mbinguni? Huyu Yesu aliyechukuliwa kutoka kwenu kwenda juu mbinguni, atakuja jinsi iyo hiyo mlivyomwona akienda zake mbinguni.[#Mt 26:64; Lk 21:27; 1 Tim 3:16; Ufu 1:7]

Mathiya ateuliwa kuchukua mahali pa Yuda

¹²Kisha wakarudi kwenda Yerusalemu kutoka mlima ulioitwa wa Mizeituni, ulio karibu na Yerusalemu, wapata mwendo wa sabato.[#Lk 24:50-53]

¹³Wakati walipoingia, wakapanda ghorofani, walipokuwa wakikaa; Petro, na Yohana, na Yakobo, na Andrea, Filipo na Tomaso, Bartholomayo na Mathayo, Yakobo wa Alfayo, na Simoni Zelote, na Yuda wa Yakobo.[#Mt 10:2-4; Mk 3:16-19; Lk 6:14-16]

¹⁴Hawa wote walikuwa wakidumu kwa moyo mmoja katika kusali, pamoja nao wanawake, na Mariamu mama yake Yesu, na ndugu zake.[#Mdo 2:1; Yn 7:3-5; Mt 13:55]

¹⁵Siku zile akasimama Petro kati ya hao ndugu (jumla ya majina ilikuwa mia moja na ishirini), akasema,

¹⁶Ndugu, ilipasa andiko litimizwe, alilolinena Roho Mtakatifu zamani kwa kinywa cha Daudi, katika habari za Yuda aliyewaongoza wao waliomkamata Yesu;[#Zab 41:9]

¹⁷kwa sababu alikuwa amehesabiwa pamoja na sisi, akapata sehemu ya huduma hii.

¹⁸(Basi mtu huyu alinunua shamba kwa ijara ya udhalimu; akaanguka kwa kasi akapasuka matumbo yake yote yakatoka.[#Mt 27:3-8]

¹⁹Ikajulikana na watu wote wakaao Yerusalemu; hata shamba lile likaitwa kwa lugha yao Akeldama, maana yake, shamba la damu.)

²⁰Kwa maana imeandikwa katika kitabu cha Zaburi,[#Zab 69:25; 109:8]

Kikao chake na kiwe ukiwa,

Wala asiwepo mtu mwenye kukaa humo;

tena,

Usimamizi wake autwae mwingine.

²¹Basi katika watu waliofuatana nasi wakati wote Bwana Yesu alipokuwa akiingia na kutoka kwetu,[#Yn 15:27]

²²kuanza tangu ubatizo wa Yohana, hata siku ile alipochukuliwa kwetu kwenda juu, inapasa mmoja wao awe shahidi wa kufufuka kwake pamoja nasi.[#Mt 3:16; Mk 1:9; 16:19; Lk 3:21; 24:51]

²³Wakaweka wawili, Yusufu, aitwaye Barsaba, aliyekuwa na jina la pili Yusto, na Mathiya.

²⁴Kisha wakaomba, wakasema, Wewe, Bwana, ujuaye mioyo ya watu wote, tuoneshe ni nani uliyemchagua katika hawa wawili,[#Yn 2:24,25; 6:70]

²⁵ashike mahali katika huduma hii na utume huu, alioukosa Yuda, aende zake mahali pake mwenyewe.

²⁶Wakawapigia kura; kura ikamwangukia Mathiya; naye akahesabiwa kuwa pamoja na mitume kumi na mmoja.[#Mit 16:33]