Salamu

¹Paulo, mtume wa Kristo Yesu kwa mapenzi ya Mungu, na Timotheo, ndugu yetu,[#Efe 1:1]

²kwa ndugu watakatifu na waaminifu katika Kristo, walioko Kolosai. Neema na iwe kwenu, na amani, zitokazo kwa Mungu Baba yetu.[#Rum 1:7; Efe 1:2]

Paulo amshukuru Mungu kwa ajili ya Wakolosai

³Twamshukuru Mungu, Baba yake Bwana wetu Yesu Kristo, siku zote tukiwaombea;[#1 Kor 13:13; Efe 1:16; 1 The 1:2,3]

⁴tangu tuliposikia habari za imani yenu katika Kristo Yesu, na upendo mlio nao kwa watakatifu wote;[#Efe 1:15]

⁵kwa sababu ya tumaini mlilowekewa akiba mbinguni; ambalo habari zake mlizisikia zamani kwa neno la kweli ya Injili;[#1 Pet 1:4; Efe 1:13,18]

⁶iliyofika kwenu, kama ilivyo katika ulimwengu wote, na kuzaa matunda na kukua, kama inavyokua kwenu pia, tangu siku mlipoisikia mkaifahamu sana neema ya Mungu katika kweli;[#1 Tim 3:16; Efe 1:13]

⁷kama mlivyofundishwa na Epafra, mwenzi wetu mpendwa, aliye mhudumu mwaminifu wa Kristo kwa ajili yenu;[#Kol 4:12; Flm 1:23]

⁸naye alitueleza upendo wenu katika Roho.

⁹Kwa sababu hiyo sisi nasi, tangu siku ile tuliposikia, hatuachi kufanya maombi na dua kwa ajili yenu, ili mjazwe maarifa ya mapenzi yake katika hekima yote na ufahamu wa rohoni;[#Efe 1:8,9,15-17; Flp 1:9]

¹⁰mwenende kama ulivyo wajibu wenu kwa Bwana, mkimpendeza kabisa; mkizaa matunda kwa kila kazi njema, na kuzidi katika maarifa ya Mungu;[#Efe 1:17; 2:10; 4:1; Flp 1:27]

¹¹mkiwezeshwa kwa uwezo wote, kwa kadiri ya nguvu ya utukufu wake, mpate kuwa na subira ya kila namna na uvumilivu pamoja na furaha;[#1 Kor 1:5; Efe 1:18,19; 3:16]

¹²mkimshukuru Baba, aliyewastahilisha kupokea sehemu ya urithi wa watakatifu katika nuru.[#Efe 1:11,18]

¹³Naye alituokoa kutoka kwa nguvu za giza, akatuhamisha na kutuingiza katika ufalme wa Mwana wake mpendwa;[#Kol 2:15; Lk 22:53; Efe 2:2; 6:12; 1:6]

¹⁴ambaye katika yeye tuna ukombozi, yaani, msamaha wa dhambi.[#Efe 1:7]

Ukuu wa Kristo

¹⁵Naye ni mfano wa Mungu asiyeonekana, mzaliwa wa kwanza wa viumbe vyote.[#Ebr 1:3; 2 Kor 4:4; 1 Tim 6:16; Yn 1:18]

¹⁶Kwa kuwa katika yeye vitu vyote viliumbwa, vilivyo mbinguni na vilivyo juu ya nchi, vinavyoonekana na visivyoonekana; ikiwa ni vitu vya enzi, au milki, au enzi, au mamlaka; vitu vyote viliumbwa kwa njia yake, na kwa ajili yake.[#Yn 1:3,10; Efe 1:10,21]

¹⁷Naye amekuwako kabla ya vitu vyote, na vitu vyote hushikana katika yeye.[#Mit 8:25-27; Efe 1:22]

¹⁸Naye ndiye kichwa cha mwili, yaani, cha kanisa; naye ni mwanzo, ni mzaliwa wa kwanza katika wafu, ili kwamba awe mtangulizi katika yote.[#Efe 1:22-23; 4:15; 5:23; Mdo 4:2; 26:23; Ufu 1:5]

¹⁹Kwa kuwa katika yeye ilipendeza utimilifu wote ukae;[#Efe 1:23; Kol 2:9; Yn 1:16]

²⁰na kwa yeye kuvipatanisha vitu vyote na nafsi yake akiisha kufanya amani kwa damu ya msalaba wake; kwa yeye, ikiwa ni vitu vilivyo juu ya nchi, au vilivyo mbinguni.[#Efe 1:7,10; 2:13,16; 1 Yoh 2:2]

²¹Na ninyi, mliokuwa hapo kwanza mmetengwa, tena adui katika nia zenu, kwa matendo yenu mabaya, amewapatanisha sasa;[#Efe 2:1,12; 4:18; Rum 5:10]

²²katika mwili wa nyama yake, kwa kufa kwake, ili awalete ninyi mbele zake, watakatifu, wasio na mawaa wala lawama;[#Efe 2:11,14,16; 5:27]

²³mkidumu tu katika ile imani, hali mmewekwa juu ya msingi, mkawa imara; msipogeuzwa na kuliacha tumaini la Injili mliyosikia habari zake, iliyohubiriwa kwa viumbe vyote vilivyo chini ya mbingu; ambayo mimi Paulo nilikuwa mhudumu wake.[#Mk 16:15; 1 Tim 3:16; Efe 3:17; Ebr 3:14]

Nia ya Paulo kwa Wakolosai

²⁴Sasa nayafurahia mateso niliyo nayo kwa ajili yenu; tena nayatimiliza katika mwili wangu yale yaliyopungua ya mateso ya Kristo, kwa ajili ya mwili wake, yaani, kanisa lake;[#Efe 3:1,13]

²⁵ambalo nimefanywa mhudumu wake, kulingana na uwakili wa Mungu, niliopewa kwa faida yenu, nilitimize neno la Mungu;[#Efe 3:2,7,8]

²⁶siri ile iliyofichwa tangu zamani zote na tangu vizazi vyote, bali sasa imefunuliwa kwa watakatifu wake;[#Rum 16:25,26; Efe 3:3,5,9,10]

²⁷ambao Mungu alipenda kuwajulisha jinsi ulivyo utajiri wa utukufu wa siri hii katika Mataifa, nao ni Kristo ndani yenu, tumaini la utukufu[#1 Tim 1:1; Rum 16:25; Efe 3:9; 1:18]

²⁸ambaye sisi tunamhubiri habari zake tukimwonya kila mtu, na kumfundisha kila mtu katika hekima yote, tupate kumleta kila mtu mtimilifu katika Kristo.[#Efe 4:13]

²⁹Nami najitaabisha kwa neno lilo hilo, nikijitahidi kwa kadiri ya kutenda kazi kwake atendaye kazi ndani yangu kwa nguvu.[#Flp 4:13; Efe 3:7,20]