Kufufuka kwa Yesu

¹Siku ya kwanza ya juma, ilipoanza kupambazuka, walikwenda kaburini, wakiyaleta manukato waliyoweka tayari.[#Mt 28:1-8; Mk 16:1-8; Yn 20:1-13]

²Wakalikuta lile jiwe limevingirishwa mbali na kaburi,

³Wakaingia, wasiuone mwili wa Bwana Yesu.

⁴Ikawa walipokuwa wakifadhaika kwa ajili ya neno hilo, tazama, watu wawili walisimama karibu nao, wamevaa nguo za kumetameta;

⁵nao walipoingiwa na hofu na kuinama kifudifudi hadi nchini, hao waliwaambia, Kwa nini mnamtafuta aliye hai katika wafu?

⁶Hayupo hapa, amefufuka. Kumbukeni alivyosema nanyi alipokuwa bado yuko Galilaya,[#Mt 16:21; 17:22-23; 20:18-19; Mk 8:31; 9:31; 10:33-34; Lk 9:22; 18:31-33]

⁷akisema, Imempasa Mwana wa Adamu kutiwa mikononi mwa wenye dhambi, na kusulubiwa, na kufufuka siku ya tatu.

⁸Wakayakumbuka maneno yake.

⁹Wakaondoka kaburini, wakarudi; wakawaarifu wale kumi na mmoja na wengine wote habari za mambo hayo yote.

¹⁰Nao ni Mariamu Magdalene, na Yoana, na Mariamu mamaye Yakobo, na wale wanawake wengine waliokuwa pamoja nao;[#Lk 8:2,3]

¹¹hao waliwaambia mitume habari ya mambo hayo.

¹²Maneno yao yakaonekana kuwa kama upuzi kwao, wala hawakuwasadiki. Lakini Petro aliondoka akaenda mbio hadi kaburini, akainama akachungulia ndani, akaviona vile vitambaa vya sanda tu; akaenda zake akiyastaajabia yaliyotukia.

Matembezi ya kwenda Emau

¹³Na tazama, siku ile ile watu wawili miongoni mwao walikuwa wakienda katika kijiji kimoja, jina lake Emau, kilichokuwa mbali na Yerusalemu kama mwendo wa saa mbili.[#Mk 16:12,13]

¹⁴Nao walikuwa wakizungumza wao kwa wao habari za mambo hayo yote yaliyotukia.

¹⁵Ikawa katika kuzungumza na kuulizana kwao, Yesu mwenyewe alikaribia, akaandamana nao.[#Mt 18:20]

¹⁶Macho yao yakafumbwa wasimtambue.

¹⁷Akawaambia, Ni maneno gani haya mnayosemezana hivi mnapotembea? Wakasimama wamekunja nyuso zao.

¹⁸Akajibu mmoja wao, jina lake Kleopa, akamwambia, Je! Wewe peke yako u mgeni katika Yerusalemu, hata huyajui yaliyotukia humo siku hizi?

¹⁹Akawauliza, Mambo gani? Wakamwambia, Mambo ya Yesu wa Nazareti, aliyekuwa mtu nabii, mwenye uwezo katika kutenda na kunena mbele za Mungu na watu wote;[#Mt 21:11]

²⁰tena jinsi wakuu wa makuhani na wakubwa wetu walivyomtia katika hukumu ya kufa, wakamsulubisha.

²¹Nasi tulikuwa tukitumaini ya kuwa yeye ndiye atakayewakomboa Israeli. Zaidi ya hayo yote, leo ni siku ya tatu tangu yalipotendeka mambo hayo;[#Lk 1:68; 2:38; 19:11; Mdo 1:6]

²²tena, wanawake kadhaa wa kwetu walitushitusha, waliokwenda kaburini asubuhi na mapema,[#Lk 24:1-11]

²³wasiuone mwili wake; wakaja wakasema ya kwamba wametokewa na malaika waliosema kwamba yu hai.

²⁴Na wengine waliokuwa pamoja nasi walikwenda kaburini wakaona vivyo hivyo kama wale wanawake walivyosema, ila yeye hawakumwona.[#Lk 24:12; Yn 20:3-10]

²⁵Akawaambia, Enyi msiofahamu, wenye mioyo mizito ya kuamini yote waliyoyasema manabii!

²⁶Je! Haikumpasa Kristo kupata mateso haya na kuingia katika utukufu wake?

²⁷Akaanza kutoka Musa na manabii wote, akawaeleza katika maandiko yote mambo yaliyomhusu yeye mwenyewe.[#Kum 18:15; Zab 22:1-21; Isa 53:1-12]

²⁸Wakakikaribia kile kijiji walichokuwa wakienda, naye alifanya kama anataka kuendelea mbele.

²⁹Wakamshawishi wakisema, Kaa pamoja nasi, kwa kuwa kumekuchwa, na mchana unakwisha. Akaingia ndani kukaa nao.

³⁰Ikawa alipokuwa ameketi nao chakulani, alitwaa mkate, akaubariki, akaumega, akawapa.[#Lk 22:19]

³¹Yakafumbuliwa macho yao, wakamtambua; kisha akatoweka mbele yao.

³²Wakaambiana, Je! Mioyo yetu haikuwaka ndani yetu hapo alipokuwa akisema nasi njiani, na kutufunulia Maandiko?

³³Wakaondoka saa ile ile, wakarejea Yerusalemu, wakawakuta wale kumi na mmoja wamekutanika, wao na wale waliokuwa pamoja nao,

³⁴wakisema, Bwana amefufuka kweli kweli, naye amemtokea Simoni.[#1 Kor 15:4,5]

³⁵Nao waliwapa habari ya mambo yale ya njiani, na jinsi alivyotambulikana nao katika kuumega mkate.

Yesu awatokea wanafunzi wake

³⁶Na walipokuwa katika kusema habari hiyo, yeye mwenyewe alisimama katikati yao, akawaambia, Amani iwe kwenu.[#Mk 16:14-18; Yn 20:19-23; 1 Kor 15:5]

³⁷Wakashituka, wakaogopa sana, wakidhani ya kwamba wanaona roho.[#Mt 14:26]

³⁸Akawaambia, Mbona mnafadhaika? Na kwa nini mnaona shaka mioyoni mwenu?

³⁹Tazameni mikono yangu na miguu yangu, ya kuwa ni mimi mwenyewe. Nishikenishikeni, mwone; kwa kuwa roho haina mwili na mifupa kama mnavyoniona mimi kuwa nayo.

⁴⁰Na baada ya kusema hayo aliwaonesha mikono yake na miguu yake.

⁴¹Basi walipokuwa hawajaamini kwa furaha, huku wakistaajabu, aliwaambia, Mna chakula chochote hapa?

⁴²Wakampa kipande cha samaki wa kuokwa.[#Yn 21:5,10]

⁴³Akakitwaa, akala mbele yao.

⁴⁴Kisha akawaambia, Hayo ndiyo maneno yangu niliyowaambia nilipokuwa ningali pamoja nanyi, ya kwamba ni lazima yatimizwe yote niliyoandikiwa katika Torati ya Musa, na katika vitabu vya Manabii na Zaburi.[#Lk 9:22,45; 18:31-33]

⁴⁵Ndipo akawafunua akili zao wapate kuelewa maandiko.

⁴⁶Akawaambia, Ndivyo ilivyoandikwa, kwamba Kristo atateswa na kufufuka siku ya tatu;[#1 Tim 3:16]

⁴⁷na kwamba mataifa yote watahubiriwa kwa jina lake habari ya toba na ondoleo la dhambi, kuanza tangu Yerusalemu.

⁴⁸Nanyi ndinyi mashahidi wa mambo haya.

⁴⁹Na tazama, nawaletea juu yenu ahadi ya Baba yangu; lakini kaeni humu mjini, hadi mvikwe uwezo utokao juu.[#Mdo 1:4; Yn 15:26; 16:7]

Kupaa kwa Yesu

⁵⁰Akawaongoza mpaka Bethania, akainua mikono yake akawabariki.[#Mdo 1:9-11]

⁵¹Ikawa katika kuwabariki, alijitenga nao; akachukuliwa juu mbinguni.

⁵²Wakamwabudu; kisha wakarudi Yerusalemu wakiwa na furaha kuu.[#Yn 16:22; 14:28]

⁵³Nao daima walikuwa ndani ya hekalu, wakimsifu Mungu.