Mfano wa wapangaji waovu

¹Akaanza kusema nao kwa mifano; Mtu mmoja alipanda shamba la mizabibu, akalizungushia ua, akachimba shimo la shinikizo, akajenga mnara, akapangisha wakulima, akasafiri.[#Mt 21:33-46; Lk 20:9-19; #Isa 5:1-2]

²Na kwa wakati wake akatuma mtumwa kwa wale wakulima, ili apokee kwa wakulima katika matunda ya mizabibu.

³Wakamtwaa, wakampiga, wakamtoa nje, bila chochote.

⁴Akatuma tena kwao mtumwa mwingine, na huyo wakamtia majeraha ya kichwa, wakamfanyia jeuri.

⁵Akamtuma mwingine, huyo wakamwua; na wengine wengi, hawa wakiwapiga na hawa wakiwaua.

⁶Basi alikuwa na mmoja bado, mwana mpendwa wake; huyu naye akamtuma kwao mwisho, akisema, Watamstahi mwanangu.

⁷Lakini wale wakulima wakasemezana, Huyu ni mrithi; haya, na tumwue, na urithi utakuwa wetu.

⁸Wakamkamata, wakamwua, wakamtupa nje ya shamba la mizabibu.[#Ebr 13:12]

⁹Basi atafanyaje yule bwana wa shamba la mizabibu? Atakuja na kuwaangamiza wale wakulima, na lile shamba la mizabibu atawapa wengine.

¹⁰Hata andiko hili hamjalisoma,[#Zab 118:22-23]

Jiwe walilolikataa waashi,

Hilo limekuwa jiwe kuu la pembeni.

¹¹Neno hili limetoka kwa Bwana,

Nalo ni ajabu machoni petu?

¹²Nao wakataka kumkamata, wakaogopa mkutano; maana walitambua ya kwamba ule mfano amewanenea wao. Wakamwacha wakaenda zao.

Swali juu ya kulipa kodi

¹³Wakatuma kwake baadhi ya Mafarisayo na Maherodi, ili wamnase kwa maneno.[#Mt 22:15-22; Lk 20:20-26; #Mk 3:6]

¹⁴Hata walipofika walimwambia, Mwalimu, twajua ya kuwa wewe u mtu wa kweli, wala hujali cheo cha mtu; kwa maana hutazami sura za watu; lakini katika kweli waifundisha njia ya Mungu. Je! Ni halali kumpa Kaisari kodi au siyo?

¹⁵Tumpe, tusimpe? Naye, akijua unafiki wao, akawaambia, Mbona mmenijaribu? Nileteeni dinari niione.

¹⁶Wakaileta. Akawaambia, Ni ya nani sanamu hii na anwani hii? Wakamwambia, Ni ya Kaisari.

¹⁷Yesu akajibu, akawaambia, Mpeni Kaisari yaliyo ya Kaisari, na yaliyo ya Mungu mpeni Mungu. Wakamstaajabia sana.[#Rum 13:7]

Swali juu ya kufufuka

¹⁸Kisha Masadukayo, watu wasemao ya kwamba hakuna kiyama, wakamwendea, wakamwuliza na kusema,[#Mdo 23:8; Mt 22:23-33; Lk 20:27-38]

¹⁹Mwalimu, Musa alituandikia ya kwamba ndugu ya mtu akifa, akamwacha mkewe wala hana mtoto, ndugu yake amtwae yule mkewe akampatie ndugu yake mzao.[#Kum 25:5,6; Mwa 38:8]

²⁰Basi kulikuwa na ndugu saba, wa kwanza akatwaa mke, akafa, asiache mzawa.

²¹Wa pili naye akamtwaa akafa, wala yeye hakuacha mzawa. Na wa tatu kadhalika;

²²hata na wote saba, wasiache mzawa. Mwisho wa wote yule mwanamke akafa naye.

²³Basi, katika kiyama atakuwa mke wa yupi katika hao? Maana wote saba walikuwa naye.

²⁴Yesu akajibu, akawaambia, Je! Hampotei kwa sababu hii, kwa kuwa hamyajui maandiko wala uweza wa Mungu?

²⁵Kwa maana watakapofufuka katika wafu, hawaoi wala hawaolewi, bali huwa kama malaika walioko mbinguni.

²⁶Na kuhusu wafu ya kwamba wafufuliwa, hamjasoma katika kitabu cha Musa, Kuhusu kile kichaka jinsi Mungu alivyomwambia, akisema, Mimi ni Mungu wa Abrahamu, na Mungu wa Isaka, na Mungu wa Yakobo?[#Kut 3:2,6; Mt 8:11; Lk 16:22]

²⁷Yeye si Mungu wa wafu, bali wa walio hai. Hivyo mwapotea sana.

Amri ya kwanza

²⁸Na mmojawapo wa waandishi akafika, akawasikia wakisemezana naye, akatambua ya kuwa amewajibu vema, akamwuliza, Katika amri zote ni ipi iliyo ya kwanza?[#Lk 10:25-28; Mt 22:34-40; Lk 20:39,40; #Lk 10:25-28]

²⁹Yesu akamjibu, Ya kwanza ndiyo hii, Sikia, Israeli, Bwana Mungu wetu ni Bwana mmoja;[#Kum 6:4-5]

³⁰nawe mpende Bwana Mungu wako kwa moyo wako wote, na kwa roho yako yote, na kwa akili zako zote, na kwa nguvu zako zote.[#Yn 15:12]

³¹Na ya pili ndiyo hii, Mpende jirani yako kama nafsi yako. Hakuna amri nyingine iliyo kuu kuliko hizi.[#Law 19:18]

³²Yule mwandishi akamwambia, Hakika, Mwalimu, umesema vema ya kwamba Mungu ni mmoja, wala hakuna mwingine ila yeye;[#Kum 4:35; 6:4]

³³na kumpenda yeye kwa moyo wote, na kwa ufahamu wote, na kwa nguvu zote, na kumpenda jirani kama nafsi yako, kwafaa kuliko sadaka nzima za kuteketezwa na dhabihu zote pia.[#Hos 6:6; 1 Sam 15:22]

³⁴Naye Yesu, alipoona kwamba amejibu kwa busara, alimwambia, Wewe hu mbali na ufalme wa Mungu. Wala hakuthubutu mtu kumwuliza swali tena tokea hapo.[#Mdo 26:27-29]

Swali juu ya Mwana wa Daudi

³⁵Yesu alipokuwa akifundisha katika hekalu, alijibu, akasema, Husemaje waandishi ya kwamba Kristo ni Mwana wa Daudi?[#Mt 22:41-46; Lk 20:41-44]

³⁶Daudi mwenyewe alisema, kwa uweza wa Roho Mtakatifu,[#Zab 110:1; 2 Sam 23:2; Yn 7:42]

Bwana alimwambia Bwana wangu,

Uketi mkono wangu wa kulia,

Hata niwawekapo adui zako

Kuwa chini ya miguu yako.

³⁷Daudi mwenyewe asema ni Bwana; basi amekuwaje mwanawe? Na watu wengi walikuwa wakimsikiliza kwa furaha.

Yesu awashutumu waandishi

³⁸Akawaambia katika mafundisho yake, Jihadharini na waandishi, wapendao kutembea wakiwa wamevaa mavazi marefu, na kusalimiwa masokoni,[#Mt 23:1-39; Lk 20:45-47]

³⁹na kuketi mbele katika masinagogi, na viti vya mbele katika karamu;

⁴⁰ambao hula nyumba za wajane, na kwa unafiki husali sala ndefu; hawa watapata hukumu iliyo kubwa.

Sadaka ya mjane

⁴¹Naye akaketi kulielekea sanduku la hazina, akatazama jinsi mkutano watiavyo mapesa katika sanduku. Matajiri wengi wakatia mengi.[#Lk 21:1-4; #2 Fal 12:9]

⁴²Akaja mwanamke mmoja, mjane, maskini, akatia senti mbili, kiasi cha nusu pesa.

⁴³Akawaita wanafunzi wake, akawaambia, Amin, nawaambia, Huyu mjane maskini ametia zaidi kuliko wote wanaotia katika sanduku la hazina;

⁴⁴maana hao wote walitia baadhi ya mali iliyowazidi; bali huyu katika umaskini wake ametia vyote alivyokuwa navyo, ndiyo riziki yake yote pia.[#2 Kor 8:12]