Kugeuka sura

¹Akawaambia, Amin, nawaambia, Pana watu katika hawa wasimamao hapa, ambao hawataonja mauti kabisa, hata watakapouona ufalme wa Mungu umekuja kwa nguvu.

²Baada ya siku sita Yesu akawatwaa Petro, na Yakobo, na Yohana, akawaleta juu ya mlima mrefu faraghani, peke yao; akageuka sura yake mbele yao;[#2 Pet 1:17-18]

³mavazi yake yakimetameta, meupe mno, jinsi asivyoweza dobi duniani kuyafanya meupe.

⁴Wakatokewa na Eliya pamoja na Musa, nao walikuwa wakizungumza na Yesu.

⁵Petro akajibu, akamwambia Yesu, Rabi, ni vizuri sisi kuwapo hapa; na tufanye vibanda vitatu, kimoja chako wewe, kimoja cha Musa, na kimoja cha Eliya.

⁶Maana, hakujua la kunena, kwa kuwa waliingiwa na hofu nyingi.

⁷Kisha likatokea wingu, likawatia uvuli; sauti ikatoka katika lile wingu, Huyu ni Mwanangu, mpendwa wangu, msikieni yeye.[#Mt 3:17; Mk 1:11; Lk 3:22; 2 Pet 1:17; Kum 18:15; Mdo 3:22]

⁸Mara hiyo walipotazama huku na huku, hawakuona mtu pamoja nao ila Yesu peke yake.

Kuja kwa Eliya

⁹Na walipokuwa wakishuka mlimani aliwakataza wasimweleze mtu waliyoyaona, hadi Mwana wa Adamu atakapokuwa amefufuka katika wafu.[#Mk 8:30]

¹⁰Wakalishika neno lile, wakiulizana wao kwa wao, Huko kufufuka katika wafu maana yake nini?

¹¹Wakamwuliza, wakisema, Mbona waandishi hunena ya kwamba imempasa Eliya kuja kwanza?[#Mal 4:5; Mt 11:14]

¹²Akajibu akawaambia, Ni kweli Eliya yuaja kwanza, na kurejesha upya yote; lakini, pamoja na haya, ameandikiwaje Mwana wa Adamu ya kwamba atateswa sana na kudharauliwa?[#Mal 4:5; Isa 53:3]

¹³Lakini nawaambia, Eliya amekwisha kuja, nao wakamtenda yote waliyoyataka kama alivyoandikiwa.[#Mt 11:14; 1 Fal 19:2,10]

Kuponya kwa mvulana mwenye pepo

¹⁴Walipowafikia wanafunzi, waliona mkutano mkuu wakiwazunguka, na waandishi wakijadiliana nao;[#Mt 17:14-21; Lk 9:37-42]

¹⁵mara mkutano wote walipomwona walishangaa, wakamwendea mbio, wakamsalimu.

¹⁶Akawauliza, Mnajadiliana nini nao?

¹⁷Mtu mmoja katika mkutano akamjibu, Mwalimu, nimemleta mwanangu kwako, ana pepo bubu;

¹⁸na kila ampagaapo, humbwaga chini, naye hutoka povu na kusaga meno na kukonda; nikasema na wanafunzi wako wamtoe pepo, wasiweze.

¹⁹Akawajibu, akasema, Enyi kizazi kisichoamini, nikae nanyi hadi lini? Nichukuliane nanyi hadi lini? Mleteni kwangu.

²⁰Wakamleta kwake; hata alipomwona, mara yule pepo alimtia kifafa; naye akaanguka chini, akagaa-gaa, akitokwa na povu.

²¹Akamwuliza babaye, Amepatwa na haya tangu lini? Akasema, Tangu utoto.

²²Na mara nyingi amemtupa katika moto, na katika maji, amwangamize; lakini ukiweza neno lolote, utuhurumie, na kutusaidia.

²³Yesu akamwambia, Ukiweza! Yote yawezekana kwake aaminiye.[#Mk 11:23]

²⁴Mara babaye yule kijana akapaza sauti, akasema, Naamini, nisaidie kutoamini kwangu.[#Lk 17:5]

²⁵Naye Yesu akiona ya kuwa mkutano unakusanyika mbio, akamkemea yule pepo mchafu, akamwambia, Ewe pepo bubu na kiziwi, mimi nakuamuru, mtoke huyu, wala usimwingie tena.

²⁶Akalia, akamtia kifafa sana, akamtoka; naye akawa kama amekufa; hata wengi wakasema, Amekufa.[#Mk 1:26]

²⁷Lakini Yesu akamshika mkono akamwinua naye akasimama.

²⁸Alipoingia nyumbani, wanafunzi wake wakamwuliza kwa faragha, Mbona sisi hatukuweza kumtoa?

²⁹Akawaambia, Namna hii haiwezi kutoka kwa neno lolote, isipokuwa kwa kuomba.[#1 Kor 7:5; #9:29 Makala zingine zina ‘na kufunga’.]

Yesu asema juu ya kufa na kufufuka kwake tena

³⁰Wakatoka huko, wakapita katikati ya Galilaya; naye hakutaka mtu kujua.[#Mt 17:22,23; Lk 9:43-45; #Yn 7:1]

³¹Kwa sababu alikuwa akiwafundisha wanafunzi wake, akawaambia, Mwana wa Adamu yuaenda kutiwa katika mikono ya watu, nao watamwua; na akiisha kuuawa, baada ya siku tatu atafufuka.[#Mk 8:31; 10:32-34]

³²Lakini hawakulifahamu neno lile, wakaogopa kumwuliza.[#Lk 9:45; 18:34]

Ni nani mkubwa wa wote

³³Wakafika Kapernaumu; hata alipokuwamo nyumbani, akawauliza, Mlishindania nini njiani?[#Mt 18:1-9; Lk 9:46-50; #Mt 17:24]

³⁴Wakanyamaza; kwa maana njiani walikuwa wakibishana wao kwa wao, ni nani aliye mkubwa.[#Lk 22:24]

³⁵Akaketi chini, akawaita wale Kumi na Wawili akawaambia, Mtu atakaye kuwa wa kwanza atakuwa wa mwisho kuliko wote, na mtumishi wa wote.[#Mt 20:26-27; 23:11; Mk 10:43-44; Lk 22:26]

³⁶Akatwaa kitoto, akamweka katikati yao, akamkumbatia, akawaambia,[#Mk 10:16]

³⁷Mtu akimpokea mtoto mmoja wa namna hii kwa jina langu, anipokea mimi; na mtu akinipokea mimi, humpokea, si mimi, bali yeye aliyenituma.[#Mt 10:40; Lk 10:16; Yn 13:20]

Mtoa Pepo Mwingine

³⁸Yohana akamjibu, akamwambia, Mwalimu, tulimwona mtu akitoa pepo kwa jina lako, ambaye hafuatani nasi; tukamkataza, kwa sababu hafuatani nasi.[#Hes 11:27,28]

³⁹Yesu akasema, Msimkataze, kwa kuwa hakuna mtu atakayefanya mwujiza kwa jina langu na punde baadaye akaweza kuninena kwa uovu;[#1 Kor 12:3]

⁴⁰kwa sababu asiye kinyume chetu, yu upande wetu.[#Mt 12:30; Lk 11:23]

⁴¹Kwa kuwa yeyote atakayewanywesha ninyi kikombe cha maji, kwa kuwa ninyi ni watu wa Kristo, amin, nawaambia, hatakosa thawabu yake.[#Mt 10:42]

Majaribu ya dhambi

⁴²Na yeyote atakayemkosesha mmojawapo wa wadogo hawa waniaminio, afadhali afungiwe jiwe la kusagia shingoni mwake, na kutupwa baharini.

⁴³Na mkono wako ukikukosesha, ukate; ni afadhali kuingia katika uzima ukiwa kibutu, kuliko kuwa na mikono miwili, na kwenda zako Jehanamu, kwenye moto usiozimika; [[#Mt 5:30]

⁴⁴ambamo humo funza wao hafi, wala moto hauzimiki.]

⁴⁵Na mguu wako ukikukosesha, ukate; ni afadhali kuingia katika uzima, ukiwa kiguru, kuliko kuwa na miguu miwili, na kutupwa katika Jehanamu; [

⁴⁶ambamo humo funza wao hafi, wala moto hauzimiki.]

⁴⁷Na jicho lako likikukosesha, ling'oe, ulitupe; ni afadhali kuingia katika ufalme wa Mungu, una chongo, kuliko kuwa na macho mawili, na kutupwa katika Jehanamu;[#Mt 5:29]

⁴⁸ambamo humo funza wao hafi, wala moto hauzimiki.[#Isa 66:24]

⁴⁹Kwa sababu kila mtu atatiwa chumvi kwa moto.[#Law 2:13]

⁵⁰Chumvi ni njema; lakini chumvi ikiwa si chumvi tena, mtaitia nini ikolee? Muwe na chumvi ndani yenu, mkakae kwa amani ninyi kwa ninyi.[#Mt 5:13; Lk 14:34-35; Kol 4:6]