¹Kila mwanamke aliye na hekima hujenga nyumba yake;[#Rut 4:11; Mit 24:3,4]

Bali aliye mpumbavu huibomoa kwa mikono yake mwenyewe.

²Yeye aendaye kwa unyofu wake humcha BWANA;[#Ayu 12:4]

Bali aliye mkaidi katika njia zake humdharau.

³Katika kinywa cha mpumbavu mna fimbo ya kiburi,[#Mit 12:6]

Bali midomo ya wenye hekima huwahifadhi.

⁴Zizi ni safi ambapo hapana ng'ombe;

Bali nguvu za ng'ombe zaleta faida nyingi.

⁵Shahidi mwaminifu hatasema uongo;[#Kut 20:16]

Bali shahidi wa uongo, pumzi zake ni uongo.

⁶Mwenye dharau hutafuta hekima, asiipate;[#Mit 17:24]

Bali maarifa huwa mepesi kwa mwenye ufahamu.

⁷Toka mbele ya uso wa mpumbavu,

Maana hutaona kwake midomo ya maarifa.

⁸Akili za mwenye busara ni kujua njia yake;[#Lk 12:20; 1 Kor 3:19]

Lakini upumbavu wa wapumbavu ni udanganyifu.

⁹Wapumbavu huidharau hatia;[#Mit 1:22]

Bali upo upendeleo kwa wenye haki.

¹⁰Moyo huujua uchungu wa nafsi yake,

Wala mgeni haishiriki furaha yake.

¹¹Nyumba ya mtu mwovu itabomolewa;[#Ayu 8:15; Mit 3:33]

Bali hema la mwenye haki litafanikiwa.

¹²Iko njia ionekanayo kuwa sawa machoni pa mtu,[#Mit 16:25; Rum 6:21]

Lakini mwisho wake ni njia za mauti.

¹³Hata wakati wa kucheka moyo huwa na huzuni;[#Mhu 2:2]

Na mwisho wa furaha ni uzito wa moyo.

¹⁴Ageukaye moyoni hushiba njia zake mwenyewe;[#Mit 12:14; 2 Kor 1:12; Flp 4:7]

Na mtu mwema ataridhika nafsini mwake.

¹⁵Mjinga huamini kila neno;

Bali mwenye busara huangalia sana aendavyo.

¹⁶Mwenye hekima huhadhari, na kujitenga na uovu;[#Mit 22:3]

Bali mpumbavu hupuuza yote, na hajali.

¹⁷Yeye aonaye hasira upesi atatenda kwa ujinga;

Na mtu mwenye hila mbaya huzirwa.

¹⁸Wajinga hurithi upumbavu;

Bali wenye busara huvikwa taji la maarifa.

¹⁹Wabaya huinama mbele ya wema,

Na wasio haki malangoni mwao wenye haki.

²⁰Maskini huchukiwa hata na jirani yake;[#Mit 19:7]

Bali tajiri ana marafiki wengi.

²¹Amdharauye mwenzake afanya dhambi;[#Zab 41:1]

Bali amhurumiaye maskini ana heri.

²²Je! Hawakosi wawazao mabaya?

Bali fadhili na kweli zina wao wawazao mema.

²³Katika kila kazi mna faida;

Bali maneno ya midomo huleta hasara tu.

²⁴Taji la wenye hekima ni mali zao;

Bali upumbavu wa wajinga ni upumbavu tu.

²⁵Shahidi wa kweli huponya nafsi za watu;

Bali atoaye uongo hudanganya.

²⁶Kumcha BWANA ni tumaini imara;

Watoto wake watakuwa na kimbilio.

²⁷Kumcha BWANA ni chemchemi ya uzima,[#Mit 13:14]

Ili kuepukana na tanzi za mauti.

²⁸Utukufu wa mfalme ni wingi wa watu wake;

Bali uchache wa watu ni uharibifu wa mkuu wao.

²⁹Asiye mwepesi wa hasira ana fahamu nyingi;[#Mit 15:18; Mt 11:29; 1 Kor 13:4,5; Yak 1:19]

Bali mwenye roho ya hamaki hutukuza upumbavu.

³⁰Moyo ulio mzima ni uhai wa mwili;[#Ayu 5:2; Zab 112:10; Mdo 7:9; Rum 1:29; Yak 4:5]

Bali husuda ni ubovu wa mifupa.

³¹Amwoneaye maskini humsuta Muumba wake;[#Ayu 31:15,16; Mhu 5:8; Mit 17:5; 22:2; Mt 25:40; 1 Yoh 3:17]

Bali yeye awahurumiaye wahitaji humheshimu.

³²Mtu mbaya husukumwa chini katika kutenda mabaya kwake;[#Ayu 13:15; Zab 23:4; 2 Kor 1:9; 2 Tim 4:18]

Bali mwenye haki ana matumaini katika kufa kwake.

³³Hekima hukaa katika moyo wake mwenye ufahamu;

Bali yaliyo ndani ya wapumbavu hudhihirika.

³⁴Haki huinua taifa;

Bali dhambi ni aibu ya watu wowote.

³⁵Upendeleo wa mfalme humwelekea mtumwa atendaye kwa busara;[#Mt 24:45-47]

Bali hasira yake itakuwa juu yake aletaye aibu.