Mafundisho ya mama wa mfalme Lemueli

¹Maneno ya mfalme Lemueli; mausia aliyofundishwa na mama yake.

²Ni nini, mwanangu? Tena ni nini, mwana wa tumbo langu?

Tena, ni nini mwana wa nadhiri zangu?

³Usiwape wanawake nguvu zako;[#Kum 17:17; Neh 13:26; Mit 7:26; Hos 4:11]

Wala moyo wako usiwape wale wanaowaharibu wafalme.

⁴Ee Lemueli, kunywa mvinyo hakuwafai wafalme, hakuwafai wafalme;[#Mhu 10:17]

Wala haifai wakuu waseme, Kiko wapi kileo?

⁵Wasije wakanywa na kuisahau sheria,[#Hos 4:11]

Na kuipotosha hukumu ya mtu aliye taabuni.

⁶Mpe kileo yeye aliye karibu na kupotea;[#Zab 104:15]

Kampe divai yeye aliye na uchungu nafsini.

⁷Anywe akausahau umaskini wake;

Asiikumbuke tena taabu yake.

⁸Fumbua kinywa chako kwa ajili yake aliye bubu;

Uwatetee watu wote walioachwa peke yao;

⁹Fumbua kinywa chako, uhukumu kwa haki;[#Law 19:15; Kum 1:16; 2 Sam 8:15; Isa 1:17,23; Zek 7:9; Yn 7:24; Ebr 1:9; Mit 21:13; Yer 22:16]

Uwapatie maskini na wahitaji haki yao.

Wimbo kwa mke Mwema

¹⁰Mke mwema, ni nani awezaye kumwona?

Maana thamani yake yapita thamani ya marijani.

¹¹Moyo wa mumewe humwamini,

Wala hatakosa kupata mapato.

¹²Humtendea mema wala si mabaya,

Siku zote za maisha yake.

¹³Hutafuta sufu na kitani;

Hufanya kazi yake kwa moyo wote.

¹⁴Afanana na merikebu za biashara;

Huleta chakula chake kutoka mbali.

¹⁵Tena huamka, kabla usiku haujaisha;[#Rum 12:11; Mt 24:45; Lk 12:42]

Huwapa watu wa nyumbani mwake chakula;

Na wajakazi wake sehemu zao.

¹⁶Huangalia shamba, akalinunua;

Kwa mapato ya mikono yake hupanda mizabibu.

¹⁷Hujifunga nguvu viunoni kama mshipi;

Hutia mikono yake nguvu.

¹⁸Huona kama bidhaa yake ina faida;

Taa yake haizimiki usiku.

¹⁹Hutia mikono yake katika kusokota;

Na mikono yake huishika pia.

²⁰Huwakunjulia maskini mikono yake;

Naam, huwanyoshea wahitaji mikono yake.

²¹Hawahofii theluji watu wa nyumbani mwake;

Maana wote wa nyumbani mwake huvikwa nguo nyekundu.

²²Hujifanyia mazulia ya urembo;

Mavazi yake ni kitani safi na urujuani.

²³Mume wake hujulikana malangoni;[#Kum 16:18; Mit 12:4; 1 Kor 11:7]

Aketipo pamoja na wazee wa nchi.

²⁴Hufanya nguo za kitani na kuziuza;

Huwapa wafanya biashara mishipi.

²⁵Nguvu na hadhi ndiyo mavazi yake;[#1 Tim 2:9,10]

Anaucheka wakati ujao.

²⁶Hufumbua kinywa chake kwa hekima,

Na sheria ya wema iko katika ulimi wake.

²⁷Huangalia sana njia za watu wa nyumbani mwake;[#Mit 14:1; 1 Tim 5:14; 2 Tim 3:15; Tit 2:4,5]

Wala hali chakula cha uvivu.

²⁸Wanawe huondoka na kumwita heri;[#1 Fal 2:19]

Mumewe naye humsifu, na kusema,

²⁹Binti za watu wengi wamefanya mema,

Lakini wewe umewapita wote.

³⁰Upendeleo hudanganya, na uzuri ni ubatili;[#Zab 112:1]

Bali mwanamke amchaye BWANA, ndiye atakayesifiwa.

³¹Mpe mapato ya mikono yake,

Na matendo yake yamsifu malangoni.