¹Laiti ungekuwa kama ndugu yangu,

Aliyeyanyonya matiti ya mamangu!

Kama ningekukuta huko nje,

Ningekubusu, asinidharau mtu.

²Ningekuongoza nyumbani mwa mamangu,[#Mit 9:2]

Naye angenifundisha;

Ningekunywesha divai iliyokolea,

Divai mpya ya mkomamanga wangu.

³Mkono wake wa kushoto ungekuwa chini ya kichwa changu,[#Wim 2:6; Isa 62:4,5; 2 Kor 12:9]

Nao wa kulia ungenikumbatia.

⁴Nawasihi, enyi binti za Yerusalemu,

Msiyachochee mapenzi, au kuyaamsha,

Hadi yatakapokuwa tayari.

Kurudi nyumbani

⁵Ni nani huyu apandaye kutoka nyikani,[#Yn 17:14]

Akimtegemea mpendwa wake?

Nilikuamsha chini ya huo mpera;

Huko mama yako alikuonea uchungu,

Aliona uchungu aliyekuzaa.

⁶Nitie kama mhuri moyoni mwako,[#Isa 49:16; Yer 22:24; Hag 2:23; Flp 3:8]

Kama mhuri juu ya mkono wako;

Kwa maana upendo una nguvu kama mauti,

Na wivu ni mkali kama ahera.

Mwako wake ni mwako wa moto,

Na miali yake ni miali ya Yahu.

⁷Maji mengi hayawezi kuuzimisha upendo,[#Mit 6:35]

Wala mito haiwezi kuuzamisha;

Kama mtu angetoa badala ya upendo

Mali yote ya nyumbani mwake,

Angedharauliwa kabisa.

⁸Kwetu sisi tuna dada mdogo,[#Zab 22:27]

Wala hana matiti;

Tumfanyieje dada yetu,

Siku atakapoposwa?

⁹Kama akiwa tu ukuta,[#Ufu 3:20]

Tumjengee buruji za fedha;

Na kama akiwa ni mlango,

Tumhifadhi kwa mbao za mierezi.

¹⁰Mimi nilikuwa ukuta,[#Kol 2:7; Eze 16:7]

Na matiti yangu kama minara;

Ndipo nikawa machoni pake

Kama mtu aliyeipata amani.

¹¹Sulemani alikuwa na shamba la mizabibu huko Baal-hamomi[#Mt 21:33]

Akawakodisha walinzi hilo shamba lake la mizabibu;

Kila mtu atoe vipande elfu moja vya fedha kwa matunda yake.

¹²Shamba langu la mizabibu, lililo langu mimi, liko mbele yangu.

Basi, Sulemani, wewe uwe na elfu zako,

Na hao wayalindao matunda yake wapewe mia mbili.

¹³Wewe ukaaye bustanini,[#Wim 2:14]

Hao rafiki huisikiliza sauti yako;

Unisikizishe mimi.

¹⁴Ukimbie, mpendwa wangu,[#Wim 2:17]

Nawe uwe kama paa, au ayala,

Juu ya milima ya manukato.