¹Mniige mimi kama mimi ninavyomwiga Kristo.[#1 Kor 4:16; Flp 3:17]

Kufunika kichwa

²Basi nawasifu, kwa sababu mmenikumbuka katika mambo yote, nanyi mmeyashika yale mapokeo vile vile kama nilivyowatolea.

³Lakini nataka mjue ya kuwa kichwa cha kila mwanamume ni Kristo, na kichwa cha mwanamke ni mwanamume, na kichwa cha Kristo ni Mungu.[#1 Kor 3:23; Efe 5:23; Mwa 3:16]

⁴Kila mwanamume, asalipo, au anapotoa unabii, naye amefunikwa kichwa, anaaibisha kichwa chake.[#1 Kor 12:10; 14:1]

⁵Bali kila mwanamke asalipo, au anapotoa unabii, bila kufunika kichwa, anaaibisha kichwa chake; kwa maana ni sawasawa na yule aliyenyolewa.

⁶Maana mwanamke asipojifunika kichwa, na akatwe nywele. Au ikiwa ni aibu mwanamke kukatwa nywele zake au kunyolewa, na afunike kichwa.

⁷Kwa maana kweli haimpasi mwanamume kufunikwa kichwa, kwa sababu yeye ni mfano na utukufu wa Mungu. Lakini mwanamke ni utukufu wa mwanamume.[#Mwa 1:26-27; 5:1]

⁸Maana mwanamume hakutoka katika mwanamke, bali mwanamke katika mwanamume.[#Mwa 2:18-23; 1 Tim 2:13]

⁹Wala mwanamume hakuumbwa kwa ajili ya mwanamke, bali mwanamke kwa ajili ya mwanamume.

¹⁰Kwa hiyo imempasa mwanamke awe na dalili ya kumilikiwa kichwani, kwa ajili ya malaika.[#Mwa 6:2]

¹¹Lakini, katika Bwana si mwanamke pasipo mwanamume, wala mwanamume pasipo mwanamke.

¹²Maana kama mwanamke alitoka katika mwanamume, vile vile mwanamume naye huzaliwa na mwanamke; na vitu vyote asili yake hutoka kwa Mungu. Hukumuni ninyi wenyewe katika nafsi zenu.

¹³Je! Inapendeza mwanamke amwombe Mungu asipofunika kichwa?

¹⁴Je! Hayo maumbile yenyewe hayawafundishi ya kwamba mwanamume akiwa na nywele ndefu ni aibu kwake?

¹⁵Lakini mwanamke akiwa na nywele ndefu ni fahari kwake. Kwa sababu amepewa zile nywele ndefu ili ziwe badala ya mavazi.

¹⁶Lakini mtu yeyote akitaka kuleta fitina, sisi hatuna desturi kama hiyo, wala makanisa ya Mungu.

Matumizi mabaya katika chakula cha Bwana

¹⁷Lakini katika kuagiza haya, siwasifu, ya kwamba mnakusanyika, si kwa faida bali kwa hasara.

¹⁸Kwa maana kwanza mnapokutanika kanisani nasikia kuna migawanyiko kwenu; nami kwa kiasi fulani naamini;[#1 Kor 1:10-12; 3:3]

¹⁹kwa maana lazima kuwapo na uzushi kwenu, ili waliokubaliwa wawe dhahiri kwenu.[#1 Yoh 2:19; Kum 13:3]

²⁰Basi mnapokutanika pamoja haiwezekani kula chakula cha Bwana;

²¹kwa maana kila mmoja hutangulia kutwaa chakula chake katika kule kula; hata huyu ana njaa, na huyu amelewa.

²²Je! Hamna nyumba za kulia na kunywea? Au mnalidharau kanisa la Mungu, na kuwatahayarisha hao wasio na kitu? Niwaambieni? Niwasifu? La! Siwasifu kwa ajili ya hayo.[#Yak 2:5,6]

Kutolewa kwa chakula cha Bwana

²³Kwa maana mimi nilipokea kwa Bwana niliyowapa nanyi, ya kuwa Bwana Yesu usiku ule aliotolewa alitwaa mkate,[#Mt 26:26-28; Mk 14:22-24; Lk 22:19,20]

²⁴naye akiisha kushukuru akaumega, akasema, Huu ndio mwili wangu ulio kwa ajili yenu; fanyeni hivi kwa ukumbusho wangu.

²⁵Na vivi hivi baada ya kula akakitwaa kikombe, akisema, Kikombe hiki ni agano jipya katika damu yangu; fanyeni hivi kila mnywapo, kwa ukumbusho wangu.[#Kut 24:6-8; Yer 31:31-34; Zek 9:11]

²⁶Maana kila mwulapo mkate huu na kukinywea kikombe hiki, mwaitangaza mauti ya Bwana hata ajapo.[#Mt 26:29]

Kula chakula cha Bwana isivyostahili

²⁷Basi kila aulaye mkate huo, au kukinywea kikombe hicho cha Bwana isivyostahili, atakuwa amejipatia hatia ya mwili na damu ya Bwana.[#Ebr 6:6; 10:29]

²⁸Lakini mtu ajihoji mwenyewe, na hivyo aule mkate, na kukinywea kikombe.[#Mt 26:22; 2 Kor 13:5]

²⁹Maana alaye na kunywa, hula na kunywa hukumu ya nafsi yake, kwa kutokuupambanua ule mwili.

³⁰Kwa sababu hiyo wako wengi kwenu walio wagonjwa na dhaifu, na watu kadhaa wamelala.[#1 Kor 15:20; Efe 5:14; 1 The 5:6]

³¹Lakini kama tungejipambanua nafsi zetu, tusingehukumiwa.

³²Ila tuhukumiwapo, twarudiwa na Bwana, isije ikatupasa adhabu pamoja na dunia.[#Ebr 12:5,6]

³³Kwa hiyo, ndugu zangu, mnapokutanika mpate kula, ngojaneni;

³⁴mtu akiwa na njaa, na ale nyumbani kwake; msipate kukutanika kwa hukumu. Na hayo yaliyosalia nikija nitayatengeneza.