Karama za Roho

¹Basi, ndugu zangu, kuhusu karama za roho, sitaki mkose kufahamu.

²Mwajua ya kuwa mlipokuwa watu wa Mataifa, mlichukuliwa kufuata sanamu zisizonena, kama mlivyoongozwa.[#Hab 2:18,19]

³Kwa hiyo nawaarifu, ya kwamba hakuna mtu anenaye katika Roho wa Mungu, kusema, Yesu amelaaniwa; wala hawezi mtu kusema, Yesu ni Bwana, isipokuwa katika Roho Mtakatifu.[#Mk 9:39; Mt 7:21; 1 Yoh 4:2,3]

⁴Basi kuna karama tofauti; bali Roho ni yeye yule.[#Rum 12:6-8; Efe 4:4]

⁵Tena kuna huduma tofauti, na Bwana ni yeye yule.[#Efe 4:11]

⁶Kisha kuna uwezo tofauti wa kutenda kazi, bali Mungu ni yeye yule azitendaye kazi zote katika wote.

⁷Lakini kila mmoja hupewa ufunuo wa Roho kwa kufaidiana.[#1 Kor 14:26]

⁸Maana mtu mmoja kwa Roho apewa neno la hekima; na mwingine neno la maarifa, apendavyo Roho yeye yule;

⁹mwingine imani katika Roho yeye yule; na mwingine karama za kuponya katika Roho yule mmoja;

¹⁰na mwingine matendo ya miujiza; na mwingine unabii; na mwingine kupambanua roho; mwingine aina za lugha; na mwingine fasiri za lugha;[#1 Kor 14:5; Mdo 2:4]

¹¹lakini kazi hizi zote huzitenda Roho huyo mmoja, yeye yule, akimgawia kila mtu peke yake kama apendavyo yeye.[#Rum 12:3; Efe 4:7; 1 Kor 7:7]

Mwili mmoja wenye viungo vingi

¹²Maana kama vile mwili ni mmoja, nao una viungo vingi, na viungo vyote vya mwili ule, navyo ni vingi, ni mwili mmoja; vivyo hivyo na Kristo.[#Rum 12:4-5; 1 Kor 10:17]

¹³Kwa maana katika Roho mmoja sisi sote tulibatizwa kuwa mwili mmoja, kwamba tu Wayahudi, au kwamba tu Wagiriki; ikiwa tu watumwa au ikiwa tu huru; nasi sote tulinyweshwa Roho mmoja.[#Gal 3:28]

¹⁴Kwa maana mwili si kiungo kimoja, bali ni vingi.

¹⁵Mguu ukisema, Kwa kuwa mimi si mkono, mimi si wa mwili; je! Unakuwa si wa mwili kwa sababu hiyo?

¹⁶Na sikio likisema, Kwa kuwa mimi si jicho, mimi si wa mwili; je! Linakuwa si la mwili kwa sababu hiyo?

¹⁷Kama mwili wote ukiwa jicho, kuko wapi kusikia? Kama wote ni sikio kuko wapi kunusa?

¹⁸Bali Mungu amevitia viungo kila kimoja katika mwili kama alivyotaka.

¹⁹Lakini kama vyote vingekuwa kiungo kimoja, mwili ungekuwa wapi?

²⁰Lakini sasa viungo ni vingi, ila mwili ni mmoja.

²¹Na jicho haliwezi kuuambia mkono, Sina haja na wewe; wala tena kichwa hakiwezi kuiambia miguu, Sina haja na ninyi.

²²Bali zaidi sana vile viungo vya mwili vidhaniwavyo kuwa vinyonge zaidi vinahitajiwa zaidi.

²³Na vile viungo vya mwili vidhaniwavyo kuwa havina heshima, viungo vile tunavipa heshima zaidi; na viungo vyetu visivyo na uzuri vina uzuri zaidi sana.

²⁴Kwa maana viungo vyetu vilivyo na uzuri havina uhitaji; bali Mungu ameuungamanisha mwili, na kukipa heshima zaidi kile kiungo kilichopungukiwa;

²⁵ili kusiwe na mgawanyiko katika mwili, bali viungo vitunzane kila kiungo na mwenziwe.

²⁶Na kiungo kimoja kikiumia, viungo vyote huumia nacho, na kiungo kimoja kikitukuzwa, viungo vyote hufurahi pamoja nacho.

²⁷Basi ninyi mmekuwa mwili wa Kristo, na kila mmoja wenu akiwa kiungo cha mwili huo.[#Rum 12:5; Efe 5:30]

²⁸Na Mungu ameweka wengine katika kanisa, wa kwanza mitume, wa pili manabii, wa tatu waalimu, kisha miujiza, kisha karama za kuponya wagonjwa, aina za usaidizi, maongozi na aina za lugha.[#Efe 4:11,12]

²⁹Je! Wote ni mitume? Wote ni manabii? Wote ni waalimu? Wote wanatenda miujiza?

³⁰Wote wana karama za kuponya wagonjwa? Wote wanena kwa lugha? Wote wafasiri?

³¹Jitahidini sana kupata karama zilizo kuu. Na nitawaonesheni njia iliyo bora zaidi.[#1 Kor 14:1]