Maofisa tawala wa Sulemani

¹Basi mfalme Sulemani akawa mfalme juu ya Israeli wote.

²Na hawa ndio wakuu aliokuwa nao; Azaria mwana wa Sadoki, kuhani,

³Elihorefu na Ahiya, wana wa Shausha, waandishi; Yehoshafati mwana wa Ahiludi mwenye kuandika tarehe;[#2 Sam 8:16; #4:3 Au, mkumbushi.]

⁴na Benaya mwana wa Yehoyada alikuwa jemadari wa jeshi; na Sadoki na Abiathari walikuwa makuhani;[#1 Fal 2:35; 2:27]

⁵na Azaria mwana wa Nathani alikuwa afisa mkuu tawala; na Zabudi mwana wa Nathani alikuwa kuhani, rafiki yake mfalme.[#2 Sam 8:18; 20:26; 15:37; 16:16; 1 Nya 27:33]

⁶Na Ahishari alikuwa mkuu wa kasri; na Adoramu mwana wa Abda alikuwa msimamizi wa shokoa.[#1 Fal 5:14]

⁷Sulemani alikuwa na maafisa tawala kumi na wawili juu ya Israeli wote, walioleta chakula cha mfalme na nyumba yake; kila mtu alikuwa na mwezi mmoja katika mwaka kuleta chakula.

⁸Na haya ndiyo majina yao. Mwana wa Huri, mlimani mwa Efraimu.

⁹Mwana wa Dekari, kutoka Makasi, na Shaalbimu na Beth-shemeshi na Elon-beth-hanani.

¹⁰Mwana wa Hesedi, katika Arubothi; na Soko ilikuwa kwake na nchi yote ya Heferi.

¹¹Mwana wa Abinadabu katika Nafath-dori yote; ndiye aliyekuwa naye Tafathi binti Sulemani kuwa mke wake.

¹²Baana mwana wa Ahiludi, katika Taanaki na Megido, na Beth-sheani yote, iliyo kando ya Sarethani, chini ya Yezreeli, tangu Beth-sheani mpaka Abel-mehola, hata kupita Yokmeamu.

¹³Mwana wa Geberi katika Ramoth-gileadi; na kwake ilikuwa miji ya Yairi mwana wa Manase iliyomo Gileadi; na kwake ilikuwa wilaya ya Argobu, iliyomo Bashani, miji mikubwa sitini yenye kuta na makomeo ya shaba.[#Hes 32:41; Kum 3:4]

¹⁴Ahinadabu mwana wa Ido, katika Mahanaimu.

¹⁵Ahimaasi, katika Naftali; naye ndiye aliyemwoa Basemathi binti Sulemani.

¹⁶Baana mwana wa Hushai, katika Asheri na Bealothi.

¹⁷Yehoshafati mwana wa Parua, katika Isakari.

¹⁸Shimei mwana wa Ela, katika Benyamini.

¹⁹Geberi mwana wa Uri, katika nchi ya Gileadi, nchi ya Sihoni mfalme wa Waamori, na Ogu mfalme wa Bashani; naye alikuwa mkuu pekee katika nchi hiyo.[#Kum 3:8]

Utukufu wa utawala wa Sulemani

²⁰Yuda na Israeli walikuwa wengi kama mchanga wa pwani kwa wingi, wakila, na kunywa, na kufurahi.[#Mwa 22:17; 1 Fal 3:8; Mit 14:28; 1 Sam 30:16; 1 Nya 12:39; Ayu 1:18; Zab 72:3; Mik 4:4; Zek 9:15; Mdo 2:46]

²¹Sulemani akatawala juu ya falme zote, toka Mto mpaka nchi ya Wafilisti, na hata mpaka wa Misri; walimletea tunu, na kumtumikia Sulemani siku zote za maisha yake.[#Mwa 15:18; Kut 23:31; Kum 11:24; Yos 1:4; 2 Nya 9:26; Zab 72:8]

²²Na vyakula vya Sulemani vya siku moja vilikuwa kori thelathini za unga mzuri, na kori sitini za ngano,[#4:22 Kori ni kipimo cha Kiebrania cha kadiri lita 220.]

²³na ng'ombe kumi walionona, na ng'ombe ishirini za malisho, na kondoo mia moja, pamoja na ayala, na paa, na kulungu, na kuku walionona.

²⁴Kwani alikuwa akitawala nchi yote upande huu wa Mto, toka Tifsa mpaka Gaza, juu ya wafalme wote wa upande huu wa Mto; naye alikuwa na amani pande zake zote.[#Mwa 10:19]

²⁵Yuda na Israeli wakakaa salama, kila mtu chini ya mzabibu wake na chini ya mtini wake, tokea Dani mpaka Beer-sheba, siku zote za Sulemani.[#Kum 33:28,29; Zab 33:12; 144:12-15; Yer 23:6; Mik 4:4; Zek 3:10]

²⁶Tena Sulemani alikuwa na mabanda ya farasi elfu arubaini kwa magari yake, na wapandao farasi elfu kumi na mbili.[#Kum 17:16; 1 Fal 10:25,26; 2 Nya 9:25; Zab 20:7]

²⁷Na maofisa wale wakaleta chakula kwa mfalme Sulemani na kwa wote walioijia meza ya mfalme Sulemani, kila mtu katika mwezi wake, kisipunguke kitu.

²⁸Shayiri pia na majani kwa farasi, na kwa wanyama wenye mbio, wakaleta mahali walipokuwapo, kila mtu kwa kadiri ya kazi yake.[#Est 8:14; Mik 1:13]

Sifa za hekima ya Sulemani

²⁹Mungu akampa Sulemani hekima, na akili nyingi sana, na moyo mkuu, kama mchanga ulioko pwani.

³⁰Hekima ya Sulemani ikapita hekima ya watu wote wa mashariki, na hekima zote za Misri.[#Mwa 25:6; Ayu 28:28; Mit 2:1; Mdo 7:22; #4:30 Katika Kiebrania ni wana wote.]

³¹Kwa kuwa alikuwa na hekima kuliko watu wote; kuliko Ethani Mwezrahi, na Hemani, na Kalkoli, na Darda, wana wa Maholi; zikaenea sifa zake kati ya mataifa yote yaliyozunguka.[#1 Nya 15:19; 6:33]

³²Naye akanena mifano elfu tatu, na nyimbo zake zilikuwa elfu moja na tano.[#Mit 1:1; Mhu 12:9; Wim 1:1]

³³Akanena habari za miti tangu mwerezi ulioko Lebanoni hata hisopo umeao ukutani; pia akanena habari za wanyama, na za ndege, na vitambaavyo, na samaki.

³⁴Watu wakaja kutoka mataifa yote, toka wafalme wote wa ulimwengu, waliokuwa wamepata habari za hekima yake, ili waisikie hekima ya Sulemani.[#1 Fal 10:1; 2 Nya 9:1]