Vita kwa majirani

¹Ikawa, mataifa waliozunguka waliposikia ya kuwa madhabahu imejengwa, na patakatifu pamewekwa wakfu kama zamani, walikasirika sana.

²Wakafanya shauri kuuharibu ukoo wa Yakobo uliokuwako katikati yao, wakaanza kuwaua na kuwaangamiza.

³Yuda akapigana na wana wa Esau huko Akrabimu katika Idumia, kwa sababu walikuwa wakiwaudhi Waisraeli kwa mashambulio yao. Akawapiga pigo kubwa sana, akawavunja kabisa, akawateka nyara.

⁴Akayakumbuka matata ya wana wa Baea, ambao walikuwa mtego na kikwazo kwa watu, wakiwaotea njiani.

⁵Akawazingira katika ngome zao, akawahusuru, akawaangamiza kabisa na kuiteketeza minara yao pamoja na wote waliokuwamo.

⁶Akavuka kuwaendea Waamoni, akakuta jeshi kubwa la nguvu na watu wengi, na viongozi wao Timotheo.

⁷Akapigana nao vita vingi, wakapondwa mbele yake na kushindwa kabisa.

⁸Akashika Yazeri na miji yake, akarudi Uyahudi.

Uhuru wa Wayahudi wa Galilaya

⁹Watu wa mataifa waliokaa Gileadi wakajipanga juu ya Waisraeli waliokuwamo mipakani mwao ili kuwaua; nao waliikimbilia ngome ya Dathema,

¹⁰Akapeleka barua kwa Yuda na ndugu zake kusema, Mataifa wanaotuzunguka wamejiunga pamoja ili kutuua.

¹¹Wanajiweka tayari kuja kuishika ngome tuliyoikimbilia. Kiongozi wao ni Timotheo.

¹²Njoni, basi, mtuopoe mikononi mwao, maana wengi wetu wamekwisha kufa,

¹³na ndugu wote waliokuwamo katika nchi ya Tobu wameuawa. Wamechukua mateka wake zao na watoto wao na mali yao, na kuua watu wapatao elfu moja.

¹⁴Walipokuwamo katika kuzisoma barua hizi, wajumbe wengine walifika kutoka Galilaya na nguo zao zimeraruliwa,

¹⁵wakileta habari kwamba Watu wa Tolemaisi na Tiro na Sidoni, na Galilaya yote ya mataifa, wamejikusanya pamoja ili kutuua.

¹⁶Yuda na watu wake walipoyasikia maneno hayo walifanya baraza kubwa ili kushauriana pamoja juu ya njia ya kuwasaidia ndugu zao waliokuwamo katika taabu kubwa na hatari ya kushambuliwa na adui.

¹⁷Yuda akamwambia Simoni ndugu yake, Chagua watu, uende kuwaokoa ndugu zetu huko Galilaya, na mimi na ndugu yangu Yonathani tutakwenda Gileadi.

¹⁸Akawaacha Yusufu mwana wa Zakaria na Azaria wawe juu ya watu katika Uyahudi, pamoja na baki ya jeshi wailinde nchi.

¹⁹Akawaagiza akisema, Mwe juu ya watu hawa, lakini msipeleke vita juu ya mataifa mpaka sisi tutakaporudi.

²⁰Simoni akatwaa watu elfu tatu kwenda nao Galilaya, na Yuda elfu nane kwenda Gileadi.

Vita huko Galilaya na Gileadi

²¹Simoni akaenda Galilaya, akapigana mara nyingi na mataifa, akawashinda.

²²Akawafuatia mpaka mlango wa Tolemaisi; watu wa mataifa wapatao elfu tatu walianguka, akawateka nyara.

²³Akawachukua Wayahudi waliokuwako Galilaya na Arabata, pamoja na wake zao na watoto wao, na vyote walivyokuwa navyo, akarudi nao Uyahudi kwa furaha kuu.

Yuda na Yonathani katika Gileadi

²⁴Nao Yuda Makabayo na nduguye Yonathani walivuka Yordani wakaenda safari ya siku tatu jangwani,

²⁵wakakutana na Wanebayothi, nao waliwapokea kwa amani, wakawapa habari za yote yaliyowapata ndugu zao katika Gileadi,

²⁶kwamba wengi wao wamefungiwa katika Bozra na Beseri na Alema na Kasfori na Makedi na Karnaimu, ambayo yote ni miji mikubwa na yenye ngome;

²⁷na kwamba wamefungiwa katika miji mingine ya Gileadi pia. Hata wameiweka kesho iwe siku ya kuzizingira ngome hizo, wapate kuzitwaa na kuwaharibu watu wote kwa siku moja.

²⁸Basi, Yuda na jeshi lake wakageuka mara wakapitia njia ya jangwani mpaka Bozra. Akautwaa mji, akawaua wanaume wote kwa upanga, akateka nyara akauchoma mji moto.

²⁹Akaondoka huko usiku akaendelea mpaka ngomeni,

³⁰hata asubuhi walipotazama, kumbe! Watu wengi wasiohesabika wanaleta ngazi na mitambo ya vita ili kuitwaa ngome, maana mapigano yameanza.

³¹Yuda alipoona ya kuwa vita vimeanza, na makelele ya mjini yanapanda mbinguni pamoja na sauti za tarumbeta na milio ya vita,

³²aliwaambia watu wa jeshi lake, Wapiganieni ndugu zenu leo.

³³Akawaendea na vikosi vitatu, wakipiga tarumbeta na kusali kwa sauti kuu.

³⁴Watu wa jeshi la Timotheo wakatambua ya kuwa ni Makabayo, wakakimbia mbele yake. Akawapiga kwa pigo kubwa, wakaanguka siku ile watu kama elfu nane.

³⁵Akaugeukia Mizpa akaupiga, akautwaa, akawaua wanaume wote waliokuwamo, akachukua mateka akauchoma mji moto.

³⁶Akaondoka hapo, akashika Kasfori, Makedi, Beseri, na miji mingine ya Gileadi.

³⁷Baada ya hayo, Timotheo akaunda jeshi jingine, akapiga kambi kuelekea Rafoni ng'ambo ya mto.

³⁸Yuda akatuma watu walipeleleze jeshi lake, wakamletea habari ya kuwa, Watu wote wa mataifa ya jirani wamejiunga nao, jeshi kubwa mno!

³⁹Tena, wameajiri Waarabu kuwasaidia. Wamepiga kambi ng'ambo ya mto, tayari kukushambulia. Yuda akaenda kukutana nao,

⁴⁰hata, walipofika karibu na mto, Timotheo aliwaambia maofisa wake, Kama yeye akitangulia kuvuka ili kutujia hatutaweza kumpinga; bila shaka atatushinda.

⁴¹Lakini kama akiona hofu na kukaa upande ule, sisi tutavuka kwa kumwendea na kumshinda.

⁴²Yuda akaufikia mto, akaweka maofisa wa jeshi lake ukingoni mwa mto akawaagiza, Msimwache mtu yeyote atue; sharti kila mtu ajitie vitani.

⁴³Naye mwenyewe alivuka kwanza, na jeshi lake lote nyuma yake; watu wote wa mataifa wakapondwa mbele yao, hata walitupa silaha zao wakavikimbilia vitalu vya hekalu ya Karnaimu.

⁴⁴Nao waliutwaa mji, wakiteketeza kitalu cha hekalu, na wote waliokuwamo. Karnaimu ikatiishwa kabisa, wala haikuweza kusimama tena mbele ya Yuda.

Kurudi Yerusalemu

⁴⁵Yuda akakusanya pamoja Waisraeli wote waliokuwako Gileadi, tangu wadogo mpaka wakubwa, pamoja na wake zao na watoto wao, na vyombo vyao, jamii kubwa mno, ili kuwapeleka kwenye nchi ya Uyahudi.

⁴⁶Wakafika Efroni, mji mkubwa njiani, wenye nguvu. Haikuwezekana kupita kwa upande wa kulia wala wa kushoto, ila lazima kuupitia katikati.

⁴⁷Nao wa mjini wakatoka wakaiziba milango yake kwa mawe.

⁴⁸Yuda akatuma mtu kwao kwa maneno ya amani, kusema, Twaomba ruhusa kuipitia nchi yenu ili tufike kwetu. Hakuna mtu kwao atakayewadhuru, ila tutapita tu kwa miguu yetu. Lakini walikataa kumfungulia.

⁴⁹Yuda akaagiza ipigwe mbiu katika jeshi, kwamba kila mtu atue mahali alipo.

⁵⁰Watu wa jeshi wakatua. Akaupiga mji kutwa kucha, ukatiwa mikononi mwake.

⁵¹Akawaua wanaume wote kwa upanga, akaubomoa mji na kuuteka nyara, akaupitia juu ya miili ya wale waliouawa.

⁵²Wakavuka Yordani mpaka uwanda mkubwa kuelekea Beth-sheani.

⁵³Njiani mwote Yuda alikuwa akiwachunga wale waliokuwa nyuma, na kutia watu moyo, mpaka walipofikia nchi ya Uyahudi.

⁵⁴Wakaupandia mlima Sayuni kwa furaha na shangwe, wakatoa sadaka za kuteketezwa, kwa kuwa wamerudi kwa amani wala hakuna hata mmoja aliyekufa njiani.

Kushindwa kwa Yusufu na Azaria

⁵⁵Wakati Yuda na Yonathani walipokuwako Gileadi, na nduguye Simoni alikuwako Galilaya mbele ya Tolemaisi,

⁵⁶Yusufu mwana wa Zakaria na Azaria, wakuu wa jeshi lililoachwa Uyahudi, walisikia habari za matendo yao ya ushujaa, na za vita walivyovipigana,

⁵⁷wakasema, Tujipatie jina na sisi pia; tuende tupigane na mataifa yanayotuzunguka.

⁵⁸Wakawapa amri watu wa jeshi lao, wakashika njia ya Yamnia.

⁵⁹Gorgia na watu wake wakatoka mjini kupigana nao,

⁶⁰Yusufu na Azaria wakakimbizwa, wakafuatiwa hata kwenye mipaka ya Uyahudi, na siku ile walianguka Waisraeli wapatao elfu mbili.

⁶¹Hasara kubwa hii iliwapata kwa sababu hawakuwatii Yuda na ndugu zake, wakidhani wataweza kuonesha ushujaa wao.

⁶²Bali hao hawakuwa wa ukoo wa watu wale waliojaliwa kuiokoa Israeli kwa mikono yao.

Ushindi wa Wayahudi katika nchi ya Edomu na ya Wafilisti

⁶³Mtu huyo Yuda na ndugu zake walitukuzwa mno machoni pa Israeli na pa mataifa yote, kila lilipotajwa jina lao,

⁶⁴hata watu wengi waliwajia kuwapa pongezi.

Ushindi wa Hebroni na Filistia

⁶⁵Kisha, Yuda na ndugu zake wakaondoka wakapigana na wana wa Esau katika nchi ya kusini, wakapiga Hebroni na miji yake, wakizivunja ngome zake na kuiteketeza minara iliyoizunguka.

⁶⁶Akaondoka kwenda nchi ya Wafilisti akipitia Marisa.

⁶⁷Siku ile kulikufa vitani makuhani kadha wa kadha waliokwenda kupigana kwa jinsi isiyofaa, wakitumaini kufanya mambo ya ujasiri.

⁶⁸Yuda akaugeukia Ashdodi katika nchi ya Wafilisti, akazivunja madhabahu zao na kuziteketeza sanamu za miungu yao. Akateka nyara miji yao, akarudia Uyahudi.