Siku za mwisho za Antioko Epifani

¹Mfalme Antioko alipokuwa akisafiri katika nchi za juu alisikia habari za Elimaisi, mji wa Uajemi, uliosifiwa sana kwa utajiri wake, fedha yake na dhahabu yake.

²Hekalu lake lilikuwa na mali nyingi, na humo mlikuwa na ngao za dhahabu, na dirii, na silaha za vita ambazo ziliwekwa humo na Iskanda, mwana wa Filipo, kuwatawala Wagiriki.

³Basi, alifika huko, akitaka kuutwaa mji na kuuteka nyara. Lakini haikuwezekana, kwa sababu shauri lake lilijulikana kwa watu wa mjini,

⁴wakajipanga kufanya vita naye. Akakimbia, akaondoka kwa moyo mzito kurudi Babeli.

⁵Akaletewa habari huko Uajemi ya kuwa majeshi waliokwenda kuipiga nchi ya Uyahudi wameshindwa;

⁶tena Lisia, aliyekwenda kwao na jeshi la nguvu sana, alikimbizwa mbele yao; nao wamepata nguvu nyingi kwa sababu ya silaha na zana za vita na nyara walizoziteka kwa majeshi waliyoyashinda.

⁷Zaidi ya hayo, wamelibomoa lile chukizo alilolijengesha juu ya madhabahu Yerusalemu, na kupazungushia patakatifu kuta ndefu, kama zamani, na mji wake Bethsura pia.[#1 Mak 1:54]

⁸Ikawa, mfalme alipoyasikia maneno hayo, alishikwa na bumbuazi akafadhaika mno.

⁹Akakaa huko siku nyingi, maana alilemewa na huzuni nyingi hata alidhani atakufa.

¹⁰Akawaita rafiki zake wote, akawaambia, usingizi umefarakana na macho yangu, hata moyo wangu umevunjika kwa taabu.

¹¹Nasema ndani yangu, Jinsi nilivyoteseka! Ninazama katika maji mengi! Katika enzi yangu nilikuwa mstahiki, mwenye kupendwa.

¹²Lakini sasa nayakumbuka mabaya niliyoyafanya Yerusalemu, jinsi nilivyovichukua vyombo vyote vya fedha na dhahabu vilivyokuwapo, na kupeleka majeshi kuwaharibu wenyeji wa Yerusalemu bila sababu.

¹³Nafahamu ya kuwa kwa sababu hiyo maovu haya yamenipata, hata, tazama ninakufa kihoro katika nchi ya kigeni.

Mwanzo wa utawala wa Antioko wa Tano

¹⁴Akamwita Filipo, mmoja wa rafiki zake, akamkabidhi ufalme wake wote.

¹⁵Akampa taji yake na vazi lake na pete yake ya mhuri, na amri ya kumlea mwanawe Antioko na kumwelimisha awe mfalme.

¹⁶Naye mfalme Antioko alikufa pale, mwaka mia mmoja arubaini na tisa.

¹⁷Lisia aliposikia ya kuwa mfalme amekufa, alimtawaza mwanawe Antioko, ambaye amemlea tangu utoto wake, akampa jina la Eupatori.

Mashambulizi kutoka Ashuru

¹⁸Basi, wale waliokuwamo ngomeni walikuwa wakiwaotea Waisraeli huko hekaluni, wakajaribu kuwapiga kila mara na kuwasaidia mataifa.

¹⁹Yuda akanuia kuwaharibu, akawakusanya watu wake wote kusudi awazingire.

²⁰Wakakutanika wakawahusuru, mwaka mia moja na hamsini; akafanya minara ya vita na mitambo ya kutupia silaha.

²¹Lakini wengine wao waliponyoka, hata Waisraeli wengine waasi walijiunga nao.

²²Wakamwendea mfalme wakasema, Hata lini utaacha kutekeleza hukumu na kuwapatia haki ndugu zetu?

²³Sisi tulikubali kumtumikia baba yako na kuyashika maagizo yake na kuzifuata amri zake.

²⁴Kwa sababu hiyo watu wetu wamefarakana nasi na kutuhusuru ngomeni; hata kama wakikamata watu wa kwetu huwaua na kuchukua mali yao.

²⁵Si kama wamenyosha mkono wao juu yetu tu, ila pia juu ya wote waliomo mipakani mwao.

²⁶Hata leo wanaizingira ngome ya Yerusalemu ili kuitwaa, tena wamepaimarisha patakatifu na Bethsura.

²⁷Usipowazuia upesi watafanya zaidi kuliko hayo, nawe hutaweza kuwapinga.

Antioko wa Tano na Lisia wanapigana na Wayahudi mapigano ya Beth-zakaria

²⁸Aliposikia haya, mfalme alikasirika sana. Akawakusanya rafiki zake wote, maofisa wa jeshi lake na wale waliokuwa juu ya wapanda farasi.

²⁹Askari wa mshahara walikuja kwake toka falme nyingine na visiwa vya baharini,

³⁰hata hesabu ya jeshi lake ilikuwa askari elfu mia moja, wapanda farasi elfu ishirini, na tembo hodari kwa vita thelathini na wawili.

³¹Walipitia Idumia wakapiga kambi kuelekea Bethsura, wakaipiga siku nyingi na kufanya mitambo ya vita. Nao waliokuwamo walitoka wakaichoma moto na kupigana kwa ushujaa.

Vita vya Beth-zakaria

³²Yuda akaiacha ngome, akapiga kambi Beth Zakaria kulielekea kambi la mfalme.

³³Mfalme akaondoka asubuhi na mapema, akapeleka jeshi lake upesi katika njia ya Beth Zakaria. Huko majeshi walijiweka tayari kwa vita wakapiga tarumbeta.

³⁴Wakawaonesha tembo damu ya zabibu na forsadi ili kuwachochea.

³⁵Wakawaeneza tembo katika vikosi vya askari, kila tembo askari elfu moja wenye deraya ya chuma na chapeo cha shaba nyeupe kichwani; na kwa kila tembo wapanda farasi wateule mia tano.

³⁶Hao hufuatana na tembo; kokote aendako yeye, wao huenda vile vile bila kufarakana naye.

³⁷Mgongoni mwa tembo kulikuwa na minara imara ya mti, iliyokazwa kwa ukanda maalumu, naye alipandwa na askari hodari wawili na Mhindi wake.

³⁸Baki ya wapanda farasi waliwekwa mbavuni mwa jeshi, huku na huko, tayari kuwashambulia adui na kuwalinda askari wa vikosi.

³⁹Jua lilipoziangaza ngao za dhahabu na shaba, milima ilirudisha nuru yake ikimetameta kama mienge ya moto.

⁴⁰Baadhi ya jeshi la mfalme walienezwa juu ya milima mirefu, na baadhi yao walikuwa uwandani chini, wakaenda mbele kwa taratibu na mpango mzuri.

⁴¹Wote waliosikia mshindo wa miguu yao na magongano ya silaha zao walitetemeka, maana jeshi lilikuwa kubwa sana, lenye nguvu.

⁴²Yuda na jeshi lake wakakaribia wakajitia vitani, na watu mia sita wa jeshi la mfalme waliuawa.

⁴³Eleazari Avarani aliona tembo mmoja aliyevikwa deraya ya kifalme kifuani, tena amewapita wengine wote kwa ukubwa; akadhani huyu amepandwa na mfalme mwenyewe.

⁴⁴Akatoa maisha yake kwa watu wake,

⁴⁵maana alijitia kwa ujasiri katika kikosi cha askari akamwendea kasi, akiua watu huku na huko, hata wakamwepa kila upande.

⁴⁶Akaingia chini ya tembo akamchoma tumboni akamwua. Tembo akamwangukia, akafa pale pale.

⁴⁷Lakini Wayahudi walipoiona nguvu ya ufalme, na mashambulio makali ya majeshi yake walirudi nyuma.

Kuzingirwa kwa hekalu

⁴⁸Watu wa jeshi la mfalme wakapanda Yerusalemu kukutana nao, mfalme akapiga kambi yake kuelekea Uyahudi na mlima Sayuni.

⁴⁹Watu wa Bethsura wakatoka mjini kwa sababu hawakuwa na chakula cha kutosha, kwa kuwa ni mwaka wa Sabato, akafanya mapatano nao;

⁵⁰akashika Bethsura, akaweka humo kikosi cha askari walinzi.

⁵¹Akapahusuru patakatifu kwa siku nyingi, akiweka pale zana za kubomolea ukuta, na mitambo ya vita, na vyombo vya kutupia moto na mawe, na vya kutupia vikuki, na makombeo.

⁵²Nao pia waliohusuriwa walifanya mitambo ya kuipinga mitambo yao, wakapigana kwa siku nyingi.

⁵³Lakini hawakuwa na chakula cha kutosha katika maghala, kwa sababu ni mwaka wa Sabato, tena wale waliokimbilia Uyahudi ili kujisalimisha na mataifa walikuwa wamekimaliza chakula kilichobaki.

⁵⁴Kwa hiyo ni watu wachache tu waliobaki katika patakatifu, maana njaa ilikuwa kali, nao wametawanyika kila mtu kwake.

Ashuru watoa mapatano

⁵⁵Lisia akasikia ya kuwa Filipo (ambaye mfalme Antioko, kabla ya kufa kwake, alimkabidhi kazi ya kumlea mwanawe Antioko hata awe mfalme)

⁵⁶amerudi kutoka Uajemi na Umedi pamoja na majeshi yaliyokwenda na mfalme naye yu tayari kujifanya mkuu wa nchi.

⁵⁷Basi aliona afadhali kuondoka upesi. Akawaambia mfalme na wakuu wa jeshi lake na askari, Kila siku tunazidi kudhoofika; chakula chetu kimepungua, na mahali tunapopahusuru pana nguvu sana; tena mambo ya ufalme yanatushurutisha.

⁵⁸Basi, tupeane yamini na watu hawa, tukafanye amani nao na taifa lao lote.

⁵⁹Tuagane nao wazifuate amri zao wenyewe, kama zamani, maana wamechukizwa na kufanya matata haya kwa ajili ya amri zao tulizozitangua.

⁶⁰Shauri hili liliwapendeza mfalme na wakuu wake. Akawapelekea maneno ya amani wakayakubali.

⁶¹Mfalme na wakuu wake waliwapa yamini yao, nao wakatoka katika ngome yao.

⁶²Lakini mfalme alipoingia katika ngome ya mlima Sayuni na kuona jinsi ilivyokuwa imara alivunja kiapo chake akatoa amri ukuta ulioizunguka ubomolewe.

⁶³Ndipo akatoka kwa haraka akarudia Antiokia, akamkuta Filipo ameushika mji; akafanya vita naye akautwaa mji kwa nguvu.