Sauli awashinda Waamaleki lakini amsalimisha mfalme wao

¹Samweli akamwambia Sauli, BWANA alinituma nikutie mafuta, uwe mfalme wa watu wake Israeli; basi sasa, isikilize sauti na maneno ya BWANA.[#1 Sam 10:1; 9:16]

²BWANA wa majeshi asema hivi, Nimeyatia moyoni mwangu yale ambayo Waamaleki waliwatenda Waisraeli, jinsi walivyowapinga njiani, hapo walipopanda kutoka Misri.[#Kut 17:8-14; Kum 25:17-19]

³Basi sasa nenda ukawapige Waamaleki, na kuviharibu kabisa vitu vyote walivyonavyo, wala msiwaachilie; bali waueni, mwanamume na mwanamke, na mtoto anyonyaye, ng'ombe na kondoo, ngamia na punda.[#Law 27:28; Yos 6:17; Kut 20:5; Isa 14:21; Mwa 3:17; Yos 7:24]

⁴Ndipo Sauli akawaita watu, akawahesabu huko Telemu, askari wa miguu elfu mia mbili na watu elfu kumi wa Yuda.[#Yos 15:24]

⁵Sauli akaufikia mji wa Amaleki, akauvizia bondeni.

⁶Sauli akawaambia Wakeni, Haya! Nendeni zenu, mkashuke ili kujitenga na Waamaleki, nisije nikawaangamiza ninyi pamoja nao; maana mliwatendea wana wa Israeli mema, walipopanda kutoka Misri. Basi hao Wakeni wakaondoka, wakajitenga na Waamaleki.[#Hes 24:21; Amu 1:16; 4:11; Mwa 18:25; 19:12; Mdo 2:40; Ufu 18:4; Kut 18:10; Hes 10:29]

⁷Sauli akawapiga Waamaleki, toka Havila hadi Shuri, mashariki mwa Misri.[#1 Sam 14:48; Mwa 2:11; 25:18; 16:7; 1 Sam 27:8]

⁸Akamkamata Agagi, mfalme wa Waamaleki akiwa hai, akawaangamiza hao watu wote kwa upanga.[#1 Fal 20:34; Est 3:1; 1 Sam 30:1]

⁹Lakini Sauli na watu wake wakamwacha Agagi hai, na katika kondoo walio wazuri, na ng'ombe, na vinono, na wana-kondoo, na chochote kilicho chema, wala hawakukubali kuwaangamiza; bali chochote kilichokuwa kibaya na kisichofaa, ndicho walichoangamiza kabisa.[#Mit 15:27; 1 Tim 6:10]

Sauli akataliwa kama mfalme

¹⁰Ndipo neno la BWANA likamjia Samweli, kusema,

¹¹Najuta kwa sababu nimemtawaza Sauli awe mfalme; maana amerudi nyuma, asinifuate, wala hakufanya nilivyomwamuru. Samweli akasikitika, akamlilia BWANA usiku kucha.[#Mwa 6:6; 2 Sam 24:16; Yos 22:16; 1 Fal 9:6; Zab 36:3; Sef 1:6; Mt 24:13; 1 Sam 16:1; Lk 19:41,44; Rum 9:1-3]

¹²Samweli akaondoka asubuhi na mapema ili aonane na Sauli; Samweli akaambiwa ya kwamba, Sauli alifika Karmeli, na tazama, akajisimamishia mnara wa ukumbusho wake, akageuka, akapita, akateremkia Gilgali.[#Yos 15:55]

¹³Samweli akamwendea Sauli; naye Sauli akamwambia, Ubarikiwe na BWANA, nimeitimiza amri ya BWANA.[#Mwa 14:19; Amu 17:2; Rut 3:2; Lk 18:11]

¹⁴Samweli akasema, Maana yake nini basi, hiki kilio cha kondoo masikioni mwangu, na huu mlio wa ng'ombe ninaousikia?

¹⁵Sauli akasema, Wamewaleta kutoka kwa Waamaleki; maana watu waliwaacha hai kondoo na ng'ombe walio wazuri, ili wawatoe dhabihu kwa BWANA, Mungu wako, nao waliosalia tumewaangamiza kabisa.[#Mwa 3:12; Mit 28:13]

¹⁶Ndipo Samweli akamwambia Sauli, Ngoja, nami nitakuambia neno aliloniambia BWANA usiku huu. Naye akamwambia, Haya, sema.

¹⁷Basi Samweli akasema, Ingawa ulikuwa mdogo machoni pako mwenyewe, je! Hukufanywa kuwa kichwa cha makabila ya Israeli? Naye BWANA akakutia mafuta uwe mfalme wa Israeli.

¹⁸Kisha BWANA akakutuma safarini, akasema, Nenda ukawaangamize kabisa wale Waamaleki wenye dhambi, upigane nao hadi watakapoangamia.

¹⁹Mbona basi hukuitii sauti ya BWANA, bali ukazirukia nyara ukafanya yaliyo maovu machoni pa BWANA?

²⁰Sauli akamwambia Samweli, Hakika mimi nimeitii sauti ya BWANA, nami nimemleta Agagi, mfalme wa Waamaleki, tena nimewaangamiza Waamaleki kabisa.

²¹Ila watu waliteka nyara, kondoo na ng'ombe walio wazuri, katika vitu vilivyowekwa wakfu, kusudi wavitoe dhabihu kwa BWANA, Mungu wako, huko Gilgali.

²²Naye Samweli akasema,[#Zab 50:8,9; Mit 21:3; Isa 1:11; Yer 7:22; Amo 5:21,24; Mik 6:6; Mt 9:13; 12:7; Ebr 10:6; Kut 19:5; Mhu 5:1; Yer 7:23; Hos 6:6; Mt 5:24; 9:13; Mk 12:33]

Je! BWANA huzipenda sadaka za kuteketezwa na dhabihu

Sawasawa na kuitii sauti ya BWANA?

Angalia, kutii ni bora kuliko dhabihu,

Na kusikiza ushauri kuliko mafuta ya beberu.

²³Kwani kuasi ni kama dhambi ya uchawi,[#Kum 18:10]

Na ukaidi ni kama uovu na kuabudu vinyago;

Kwa kuwa umelikataa neno la BWANA,

Yeye naye amekukataa wewe usiwe mfalme.

²⁴Ndipo Sauli akamwambia Samweli, Nimefanya dhambi; maana nimeivunja amri ya BWANA, pia na maneno yako; kwa sababu niliwaogopa wale watu, nikaitii sauti yao.[#2 Sam 12:13; Kut 9:27; Mt 27:4; Kut 23:2; Ayu 31:34; Mit 29:25; Isa 51:12; Lk 23:20-25; Ufu 21:8]

²⁵Basi sasa, nakuomba, unisamehe dhambi yangu; rudi pamoja nami, nipate kumwabudu BWANA.

²⁶Samweli akasema, Sitarudi pamoja nawe; kwa sababu umelikataa neno la BWANA, BWANA naye amekukataa wewe, usiwe mfalme wa Israeli.[#1 Sam 2:30]

²⁷Naye Samweli alipogeuka, aende zake, Sauli akaushika upindo wa vazi lake, nalo likararuka.[#1 Sam 28:17; 1 Fal 11:30-31]

²⁸Basi Samweli akamwambia, Leo BWANA amekurarulia ufalme wa Israeli, naye amempa jirani yako, aliye mwema kuliko wewe.

²⁹Tena Yeye aliye Nguvu za Israeli hatanena uongo, wala hataona majuto; maana siye mwanadamu, hata ajute.[#Hes 23:19; Eze 24:14; 2 Tim 2:13; Tit 1:2]

³⁰Akasema, Nimekosa; lakini uniheshimu sasa, nakuomba, mbele ya wazee wa watu wangu, na mbele ya Israeli, rudi pamoja nami, nimwabudu BWANA, Mungu wako.[#1 Sam 2:30; Zab 49:20; Mit 4:8; 26:1; Yn 5:44; 12:43; Rum 2:28,29]

³¹Basi Samweli akarudi na kuandamana na Sauli; naye Sauli akamwabudu BWANA.

³²Ndipo Samweli akasema, Nileteeni hapa Agagi, mfalme wa Waamaleki. Basi Agagi akamwendea kwa ulegevu. Naye Agagi akasema, Bila shaka uchungu wa mauti umeondoka.[#15:32 maana katika Kiebrania si dhahiri.]

³³Lakini Samweli akamjibu, Kama upanga wako ulivyofanya wanawake kufiwa na watoto wao, vivyo hivyo mama yako atafiwa miongoni mwa wanawake. Basi Samweli akamkata Agagi vipande mbele za BWANA huko Gilgali.[#Mwa 9:6; Kut 17:11; Amu 1:7; Mt 7:2; Yak 2:13; Ufu 16:6; 18:6; 1 Fal 18:40]

³⁴Na baada ya hayo Samweli akaenda zake kule Rama; naye Sauli akakwea kwenda nyumbani kwake huko Gibea ya Sauli.[#1 Sam 11:4]

³⁵Wala Samweli hakuenda tena kuonana na Sauli hata siku ya kufa kwake; lakini Samweli alikuwa akimlilia Sauli; naye BWANA akaghairi ya kuwa amemtawaza Sauli awe mfalme juu ya Israeli.