¹Wote walio chini ya nira ya utumwa, wawachukulie bwana zao kama wanaostahili heshima yote, ili jina la Mungu na mafundisho yetu yasitukanwe.[#Efe 6:5; Tit 2:9,10]

²Na wale walio na bwana waaminio wasiwadharau kwa kuwa ni ndugu; bali afadhali wawatumikie, kwa sababu hao wapatao faida ya kazi yao wamekuwa wenye imani na kupendwa.[#Flm 1:16]

Mafundisho ya uongo na utajiri halisi

Mambo hayo uyafundishe na kuyahimiza.

³Mtu awaye yote akitoa mafundisho mengine, wala hayakubali maneno yenye uzima ya Bwana wetu Yesu Kristo, wala mafundisho yapatanayo na utauwa,[#Gal 1:6-9; 2 Tim 1:13]

⁴amejivuna; wala hafahamu neno lolote; bali ana wazimu wa kuwazia habari za maswali, na mashindano ya maneno, ambayo katika hayo hutoka husuda, na ugomvi, na matusi, na shuku mbaya;

⁵na kuzozana miongoni mwa watu waliopotoka katika akili zao, walioikosa kweli, huku wakidhani ya kuwa utauwa ni njia ya kupata faida.[#2 Tim 3:8; 4:4; Tit 1:14]

⁶Lakini utauwa pamoja na kuridhika ni faida kubwa.[#1 Tim 4:8; Ebr 13:5; Flp 4:11,12]

⁷Kwa maana hatukuja na kitu duniani, tena hatuwezi kutoka na kitu;[#Mhu 5:14; Ayu 1:21]

⁸ila tukiwa na chakula na nguo tutaridhika na vitu hivyo.[#Mit 30:8]

⁹Lakini hao watakao kuwa na mali huanguka katika majaribu na mtego, na tamaa nyingi zisizo na maana, zenye kudhuru, zinazowaingiza watu katika upotevu na uharibifu.[#Mit 23:4; 28:22]

¹⁰Maana shina moja la mabaya ya kila namna ni kupenda fedha; ambayo wengine hali wakiitamani hiyo wamefarakana na Imani, na kujichoma kwa maumivu mengi.[#Efe 5:5]

Vita vizuri vya imani

¹¹Bali wewe, mtu wa Mungu, uyakimbie mambo hayo; ukafuate haki, utauwa, imani, upendo, subira, upole.[#2 Tim 2:22]

¹²Piga vita vile vizuri vya imani; shika uzima ule wa milele ulioitiwa, ukaungama maungamo mazuri mbele ya mashahidi wengi.[#1 Kor 9:25,26; 2 Tim 4:7]

¹³Nakuagiza mbele za Mungu anayevihifadhi hai vitu vyote, na mbele za Kristo Yesu, aliyeyaungama maungamo mazuri yale mbele ya Pontio Pilato,[#Yn 18:36,37; 19:11]

¹⁴kwamba uilinde amri hii pasipo mawaa, pasipo lawama, hata kufunuliwa kwake Bwana wetu Yesu Kristo;

¹⁵ambako yeye kwa majira yake atakudhihirisha, yeye aliyehimidiwa, Mwenye uweza peke yake, Mfalme wa wafalme, Bwana wa mabwana;[#1 Tim 1:11; Ufu 17:14; Kum 10:17]

¹⁶ambaye yeye peke yake hapatikani na mauti, amekaa katika nuru isiyoweza kukaribiwa; wala hakuna mwanadamu aliyewahi kumwona, wala awezaye kumwona. Heshima na uweza una yeye hata milele. Amina.[#Kut 33:20]

¹⁷Walio matajiri wa ulimwengu wa sasa uwaagize wasijivune, wala wasiutumainie utajiri usio yakini, bali wamtumaini Mungu atupaye vitu vyote kwa wingi ili tuvitumie kwa furaha.[#Zab 62:10; Lk 12:20; Rum 12:16]

¹⁸Waamuru watende mema, wawe matajiri katika kutenda mema, wawe wakarimu na wawe tayari kushiriki na wengine;

¹⁹huku wakijiwekea akiba iwe msingi mzuri kwa wakati ujao, ili wapate uzima ulio kweli kweli.[#Mt 6:20]

Maagizo kwa Timotheo na baraka

²⁰Ee Timotheo, ilinde hiyo amana; ujiepushe na mazungumzo yasiyo ya kimungu, yasiyo na maana, na mashindano ya elimu iitwayo elimu kwa uongo;[#1 Tim 4:7; 2 Tim 1:14]

²¹ambayo wengine kwa kuikiri wamepoteza Imani. Neema na iwe pamoja nanyi.[#1 Tim 1:6; 2 Tim 2:18]