Utawala wa Yothamu

¹Yothamu alikuwa na umri wa miaka ishirini na mitano alipoanza kutawala; akatawala katika Yerusalemu miaka kumi na sita; na jina la mamaye aliitwa Yerusha binti Sadoki.[#2 Fal 15:32; 1 Nya 3:12; Isa 1:1; Hos 1:1; Mik 1:1]

²Akafanya yaliyo ya adili machoni pa BWANA, kama alivyofanya Uzia babaye; isipokuwa hakuingia hekaluni mwa BWANA. Lakini watu waliendelea kufanya maovu.[#2 Nya 26:16-21; Zab 119:120; 2 Fal 15:35]

³Ndiye aliyelijenga lango la juu la nyumba ya BWANA, na juu ya ukuta wa Ofeli akajenga sana.[#2 Nya 33:14; Neh 3:26]

⁴Tena akajenga miji katika milima ya Yuda, na mwituni akajenga ngome na minara.

⁵Kisha akapigana na mfalme wa Waamoni, akawashinda. Na Waamoni wakampa mwaka ule ule talanta mia moja za fedha, na kori elfu kumi za ngano, na elfu kumi za shayiri. Hayo ndiyo waliyomtolea Waamoni, mwaka wa pili pia, na mwaka wa tatu.[#2 Nya 20:1; 26:8; 2 Fal 3:4; Yer 49:1-6]

⁶Basi Yothamu akawa na nguvu, kwa kuwa alizitengeneza njia zake mbele za BWANA, Mungu wake.[#1 Sam 2:30; 1 Nya 12:14; 19:3; Zab 34:8; 40:4]

⁷Na mambo yote ya Yothamu yaliyosalia, na vita vyake vyote, na njia zake, tazama, yameandikwa katika Kitabu cha Wafalme wa Israeli na Yuda.

⁸Alikuwa na umri wa miaka ishirini na mitano alipoanza kutawala; akatawala miaka kumi na sita huko Yerusalemu.

⁹Yothamu akalala na babaze, wakamzika katika mji wa Daudi; na Ahazi mwanawe akatawala mahali pake.