Hazina katika vyombo vya udongo

¹Kwa sababu hiyo, kwa kuwa tuna huduma hii, kwa jinsi tulivyopata rehema, hatulegei;[#2 Kor 3:6; 1 Kor 7:25]

²lakini tumekataa mambo ya aibu yaliyositirika, wala hatuenendi kwa hila, wala kulichanganya neno la Mungu na uongo; bali kwa kuidhihirisha iliyo kweli twajionesha kuwa na haki, dhamiri za watu zikitushuhudia mbele za Mungu.[#2 Kor 2:17; 1 The 2:5]

³Lakini ikiwa Injili yetu imesitirika, imesitirika kwa hao wanaopotea;[#1 Kor 1:18]

⁴ambao ndani yao mungu wa dunia hii amepofusha fikira zao wasioamini, wasiione nuru ya Injili ya utukufu wake Kristo aliye sura yake Mungu.[#Ebr 1:3; Efe 2:2; 2 The 2:11; Kol 1:15]

⁵Kwa maana hatujihubiri wenyewe, bali Kristo Yesu ya kuwa ni Bwana; na sisi wenyewe kuwa tu watumishi wenu kwa ajili ya Yesu.[#2 Kor 1:24]

⁶Kwa kuwa Mungu, aliyesema, Nuru itang'aa toka gizani, ndiye aliyeng'aa mioyoni mwetu, atupe nuru ya elimu ya utukufu wa Mungu katika uso wa Yesu Kristo.[#Mwa 1:3; 2 Kor 3:18; Isa 9:1]

⁷Lakini tuna hazina hii katika vyombo vya udongo, ili adhama kuu ya uwezo iwe ya Mungu, wala si kutoka kwetu.[#2 Kor 5:1; Mdo 9:15]

⁸Pande zote twateseka, bali hatusongwi; twaona shaka, bali hatukati tamaa;[#2 Kor 1:8; 7:5]

⁹twaudhiwa, bali hatuachwi; twatupwa chini, bali hatuangamizwi;

¹⁰siku zote twabeba katika mwili kuuawa kwake Yesu, ili uzima wa Yesu nao udhihirishwe katika miili yetu.[#1 Kor 15:31]

¹¹Kwa maana sisi tulio hai, siku zote twatolewa tufe kwa ajili ya Yesu, ili uzima wa Yesu nao udhihirishwe katika miili yetu ipatikanayo na mauti.[#Rum 8:36]

¹²Basi hapo mauti hufanya kazi ndani yetu, bali uzima ndani yenu.

¹³Lakini kwa kuwa tuna roho ile ile ya imani; kama ilivyoandikwa, Niliamini, na kwa sababu hiyo nilinena; sisi nasi twaamini, na kwa sababu hiyo twanena;[#Zab 116:10]

¹⁴tukijua ya kwamba yeye aliyemfufua Bwana Yesu atatufufua sisi nasi pamoja na Yesu, na kutuweka mbele yake pamoja nanyi.[#1 Kor 6:14]

¹⁵Kwa maana mambo yote ni kwa ajili yenu, ili neema hiyo ikiongezwa sana, kwa hao walio wengi shukrani izidishwe, na Mungu atukuzwe.[#2 Kor 1:3-6]

Kuishi kwa imani

¹⁶Kwa hiyo hatulegei; bali ijapokuwa utu wetu wa nje unachakaa, lakini utu wetu wa ndani unafanywa upya siku kwa siku.[#Efe 3:16]

¹⁷Maana dhiki yetu nyepesi, iliyo ya muda mfupi tu, yatuandalia utukufu wa milele uzidio kuwa mwingi sana;[#Rum 8:17,18]

¹⁸tusiviangalie vinavyoonekana, bali visivyoonekana. Kwa maana vinavyoonekana ni vya muda tu; bali visivyoonekana ni vya milele.[#Ebr 11:1,3; Kol 1:16]