3. HABARI ZA HELIODORO

Heliodoro afika Yerusalemu

¹Zamani mji mtakatifu ulikaliwa kwa amani kabisa, na sheria ilishikwa sawasawa, kwa sababu ya wema wa Oniasi, kuhani mkuu, na jinsi alivyochukia uovu.

²Hata wafalme walipastahi mahali patakatifu na kulitukuza hekalu kwa zawadi bora sana.

³Hivyo, Seleuko, mfalme wa Asia, alilipa gharama zote za matoleo ya dhabihu kwa fedha ya hazina yake mwenyewe.

⁴Lakini mtu mmoja wa ukoo wa Benyamini, Simoni, aliyekuwa msimamizi wa hekalu, alikosana na kuhani mkuu juu ya madaraka ya soko la mji.

⁵Alipoona hawezi kumshinda Oniasi, alimwendea Apolonio wa Tarso, ambaye wakati huo alikuwa jemadari mkuu wa Koele-Shamu na Foinike,

⁶akamwambia ya kuwa hazina ya Yerusalemu imejaa mali, hata fedha iliyopo haihesabiki kwa wingi wake. Alisema fedha hiyo haimo katika hesabu iliyowekwa kwa gharama za dhabihu, na huenda ingewezekana kuchukuliwa na mfalme.

⁷Naye Apolonio, alipozungumza na mfalme, alimpa habari alizozisikia juu ya fedha hiyo Mfalme akamwita Heliodoro, waziri wake, akampeleka na amri ya kuishika mali hiyo.

⁸Heliodoro akaondoka mara, akifanya kama anataka kuikagua miji ya Koele-Shamu na Foinike, lakini nia yake kwa kweli ilikuwa kulitimiza kusudi la mfalme.

⁹Alipofika Yerusalemu alipokewa vizuri na kuhani mkuu na watu wa mji. Akawaambia habari alizozipata na sababu ya kuja kwake. Akauliza kama habari hiyo ni kweli.

¹⁰Kuhani mkuu akamweleza ya kuwa ni kweli kuna fedha iliyowekwa kwake, lakini ni mali ya wajane na yatima.

¹¹Sehemu nyingine ni mali ya Hirkano mwana wa Tobia, mtu wa cheo kikuu (si kama alivyosingiziwa na yule mtovu wa dini, Simoni). Nayo yote pamoja haizidi talanta mia nne za fedha na mia mbili za dhahabu.

¹²Tena, haiwezekani kabisa kuwadhulumu watu walioweka tumaini lao kwa utakatifu wa mahali na kwa enzi na salama ya hekalu lililothaminiwa duniani kote.

Mpango wa Heliodoro wa kuibia hekalu

¹³Lakini Heliodoro, aliyekuwa amepewa amri na mfalme, alijibu kwamba hata hivyo ni lazima fedha hizo zichukuliwe kwa hazina ya mfalme.

¹⁴Basi, akiisha kuweka siku, aliingia ili kuiangalia hesabu ya mali. Kulikuwa na huzuni nyingi mjini mwote.

¹⁵Makuhani, hali wamevaa mavazi yao ya kikuhani, walianguka kifudifudi mbele ya madhabahu, wakapaza sauti zao mbinguni wakimsihi Yeye aliyekuwa ameitoa sheria juu ya vitu vilivyowekwa akiba, na kumwomba ailinde mali hiyo kwa ajili yao walioiweka.

¹⁶Hakuna aliyeweza kuutazama uso wa kuhani mkuu bila kuchomwa moyoni. Sura yake ilivyobadilika rangi ilionesha uchungu wa roho yake.

¹⁷Hofu na tetemeko la mwili lililomshika liliwadhihirishia wale waliomtazama huzuni aliyokuwa nayo moyoni.

¹⁸Nao watu wa mjini walitoka mbio nyumbani mwao kwa wingi ili kushirikiana katika sala, wakiomba mahali pasiaibishwe.

¹⁹Wanawake, hali wamejifunga gunia kifuani, walisongana njiani. Na wanawali wasioruhusiwa kutoka nje walikwenda mbio, wengine kuchungulia madirishani.

²⁰Wote waliinua mikono yao kuelekea mbinguni wakitoa dua zao.

²¹Hakuna budi kuwahurumia makutano waliokuwa wameanguka kifudifudi wote, na kuhani mkuu katika fadhaa yake na hofu yake ya mambo yatakayotendeka.

Bwana alinda hekalu lake

²²Basi, hapo watu walikuwa wakimsihi Mwenyezi Mungu, ailinde salama salimini ile mali iliyowekwa kwake kwa ajili yao walioiweka;

²³na hapo Heliodoro amejiweka tayari kuitimiza amri aliyopewa.

Adhabu ya Heliodoro

²⁴Lakini yeye na kikosi chake wakiisha fika mbele ya nyumba ya hazina, mara BWANA wa roho zote na wa mamlaka yote alileta maono ya ajabu, hata wote waliothubutu kufuatana naye waliushtukia uweza wa Mungu wakazimia kwa hofu nyingi.

²⁵Maana waliona farasi mwenye mpandaji wa kutisha na matandiko ya fahari, naye alimwelemea Heliodoro na kumshambulia kwa miguu yake ya mbele. Mpandaji wake alionekana kama amevaa deraya ya dhahabu.

²⁶Vijana wengine wawili walitokea mbele yake, wenye nguvu za ajabu, wazuri mno, wamevaa nguo za fahari; wakisimama kando yake, mmoja huku na mmoja huko, wakampiga bila kukoma, wakimpa mapigo mabaya mengi.

²⁷Akaanguka chini ghafla, giza nene likamfunika. Watu wake wakamwinua, wakamweka katika machela, wakamchukua.

²⁸Huyu aliyekuwa anaingia sasa hivi katika nyumba ya hazina pamoja na wafuasi wake na kundi zima la askari walinzi, sasa yu hoi, amedhihirishiwa waziwazi enzi ya Mungu.

Oniasi amwombea Heliodoro

²⁹Kwa kazi ya Mungu ameangushwa, hana uwezo wa kusema, wala tumaini la kupona.

³⁰Wayahudi wakamsifu Mungu aliyepatukuza kwa ajabu mahali pake, hata hekalu, ambalo sasa hivi lilijaa hofu na wasiwasi, lilikuwa limejaa furaha na shangwe kwa ufunuo wa BWANA Mwenyezi.

³¹Basi, bila kukawia, sahibu zake Heliodoro walimsihi Oniasi amsihi Aliye Juu ili kwa rehema zake amjalie uzima huyu aliye kufani.

³²Naye kuhani mkuu, akidhani moyoni mwake ya kuwa mfalme aweza kuwashuku Wayahudi kama ndio waliomtenda Heliodoro mabaya, alitoa dhabihu kwa kupona kwake.

³³Ikawa, wakati kuhani mkuu alipokuwa akifanya kipatanisho, wale vijana walimtokea Heliodoro tena wamevaa nguo zile zile, wakasimama pale wakasema, Mpe kuhani mkuu Oniasi shukrani nyingi, maana ni kwa ajili yake tu BWANA kwa rehema zake amekujalia uzima.

³⁴Wewe umepigwa kutoka mbinguni, basi, watangazie watu wote utukufu wa enzi ya Mungu. Wakiisha sema hayo walitoweka.

Heliodoro Aongoka

³⁵Heliodoro akamtolea BWANA dhabihu, akaweka nadhiri kubwa sana kwake Yeye aliyemponya maisha yake. Akamwaga Oniasi kwa urafiki, akaondoka na jeshi lake kumrudia mfalme,

³⁶akiwashuhudia watu wote matendo ya Mungu Mkuu aliyoyaona kwa macho yake mwenyewe.

³⁷Mfalme alipomwuliza Heliodoro ni mtu wa namna gani afaaye kupelekwa Yerusalemu kwa safari ya pili,

³⁸alisema, Kama una adui au mfanya fitina katika ufalme, mpeleke huko, naye, kama akijaliwa kurudi, atakuwa amepigwa sana, kwa sababu bila shaka mahali patakatifu hukaliwa na uweza wa Mungu.

³⁹Yeye anayekaa juu mbinguni ana macho yake juu ya mahali pale akipalinda, nao wanaopakaribia kwa mabaya huwapiga na kuwaharibu.

⁴⁰Ndizo habari za Heliodoro na ulinzi wa hazina.