5. USHINDI WA UYAHUDI. KIFO CHA MDHALIMU NA KUTAKASWA HEKALU

Mashambulizi ya Yuda Makabayo

¹Basi, Yuda aitwaye Makabayo, na wale waliokuwa pamoja naye, walipitia katika miji kwa siri, wakiwaita jamaa zao na kuwachukua wale waliokuwa wamedumu katika dini ya Kiyahudi; hata wakakusanya watu wapatao elfu sita.

²Nao walikuwa wakimwitia BWANA, wakimsihi awatazame watu wanaoonewa na wote, na kulihurumia hekalu lililotiwa unajisi na watu waovu,

³na kuurehemu mji pia ulioachwa ukiwa, karibu na kuangushwa chini. Aiangalie damu inayomlilia,

⁴na kuyakumbuka maangamizi mabaya ya watoto wachanga wasio na hatia, na makufuru juu ya jina lake, na kuonesha jinsi anavyochukia uovu.

⁵Makabayo akiisha kuyaratibisha mambo ya kikosi chake, watu wa mataifa walimwona hashindiki. Maana sasa hasira ya Mungu ilikuwa imegeuka rehema.

⁶Alishambulia miji na vijiji bila kutazamiwa, akavichoma moto. Alijitwalia mahali penye maana akishinda adui si wachache.

⁷Kwa mashambulio hayo alitumia hasa wakati wa giza. Sifa za ushujaa wake zilivuma sana kila mahali.

Matendo ya kwanza ya ushujaa wake

⁸Basi Filipo, alipomwona huyu anaendelea kujichukulia ardhi kidogo kidogo na kuzidi kufanikiwa, alimwandikia Tolemayo, kiongozi wa Koele-Shamu na Foinike, kumtaka ampelekee mfalme msaada.

⁹Mara Tolemayo alimchagua Nikano mwana wa Patroklo, mmoja wa rafiki wakuu, akamtuma pamoja na watu wasiopungua elfu ishirini wa mataifa yote, ili aliharibu taifa lote la Wayahudi. Na pamoja naye alimpeleka Gorgia, jemadari mwenye mazoea mengi katika mambo ya vita.

¹⁰Lakini nia ya Nikano mwenyewe ilikuwa kuwauza Wayahudi utumwani apate kuzitimiza zile talanta elfu mbili mfalme alizodaiwa na Warumi.

¹¹Basi, bila kukawia, alipeleka kwenye miji ya pwani kuwataka wanunue watumwa wa Kiyahudi, akiahidi kuuza watumwa tisini kwa talanta moja, asiitazamie hukumu itakayomwangukia kutoka kwa Mwenyezi.

Maandalizi ya vita

¹²Yuda alipopata habari za mashambulio ya Nikano na kuwapa wafuasi wake habari za kukaribia jeshi lake,

¹³wale waliokuwa waoga na wenye shaka juu ya uamuzi wa haki wa Mungu walitoroka wakaenda zao.

¹⁴Wengine waliuza yote yaliyowasalia, wakamwomba Mungu awaokoe na yule mpotovu Nikano, aliyewauza kabla hajawakamata.

¹⁵Wakamsihi afanye hivyo, ikiwa si kwa ajili yao wenyewe, lakini kwa ajili ya maagano aliyoyafanya na babu zao, na kwa kuwa wameitwa kwa Jina lake takatifu la kutukuzwa.

¹⁶Makabayo alipowakusanya watu wake, jumla yao elfu sita aliwaambia wasiuogope wingi wa watu wa mataifa wanaowashambulia bila sababu, bali wapigane nao kwa ushujaa,

¹⁷wakiweka mbele ya macho yao mambo ya jeuri yaliyotendwa pasipo haki juu ya mahali patakatifu, na ukorofi uliofanyiwa mji uliodhihakiwa, na tena, utawala waliourithi kwa wazee wao ulivyoondolewa.

¹⁸Akasema, Wao, kwa upande wao, wanategemea silaha na matendo hodari; bali sisi tunamtegemea Mwenyezi Mungu ambaye, kwa mwinamo wa kichwa tu, aweza kuangusha si wao peke yao wanaotushambulia, ila na walimwengu wote pia.

¹⁹Kisha aliwakumbusha habari za msaada uliotolewa mara kwa mara zamani za wazee wao. Jinsi katika siku za Senakeribu, watu mia moja themanini na elfu tano walikufa;

²⁰na katika mapigano yaliyofanyika huko Babeli juu ya Wagalata, walipigana watu elfu tano tu pamoja na Wamakedonia elfu nne, na Wamakedonia walipokuwa katika hatari ya kushindwa wale elfu nane waliwaangamiza wale elfu mia moja na ishirini, kwa msaada uliotoka mbinguni, wakateka nyara nyingi sana.

Yuda amshinda Nikano

²¹Baada ya kuwatia moyo kwa maneno hayo, wawe tayari kufa kwa ajili ya sheria yao na nchi yao, aligawanya jeshi lake katika vikosi vinne,

²²akawaweka ndugu zake Simoni, Yusufu na Yonathani pamoja naye kuwa wakuu wa vikosi, akimpa kila mtu watu elfu moja na mia tano;

²³na pamoja nao Eleazari, ili akisome kitabu kitakatifu mbele ya watu. Akawapa neno la shime, “Msaada wa Mungu”, akatoka akiongoza kikosi cha kwanza, akazusha vita na Nikano.[#1 Mak 3:48]

²⁴Kwa msaada wa Mwenyezi Mungu, waliua adui zaidi ya elfu tisa. Wakajeruhi na kuchangua wengi zaidi wa jeshi la Nikano, wakawafukuza wote.

²⁵Wakaipata hata ile fedha ya watu waliokuja kuwanunua. Lakini, baada ya kuwafuatia kitambo, walisimama, kwa kuwa mchana unakwisha.

²⁶Ilikuwa mkesha wa Sabato, ndiyo sababu hawakuweza kuwafuatia zaidi.

²⁷Basi, baada ya kuzikusanya silaha za adui na kuwanyang'anya mali yao, walishughulika na mambo ya Sabato, wakimhimidi BWANA na kumshukuru sana aliyewaokoa siku hiyo na kuwawekea chanzo cha rehema zake.

²⁸Sabato ilipokwisha, waliwagawia majeruhi na wajane na yatima sehemu ya nyara, na baki yake waligawana wao na watoto wao.

²⁹Walipokwisha kufanya hivyo, walimsihi BWANA mwenye rehema akubali kupatanishwa kabisa na watumishi wake.

Yuda awashinda Timotheo na Bakide

³⁰Katika mapigano mengine na majeshi ya Timotheo na Bakide, waliua watu zaidi ya elfu ishirini, wakakamata ngome ndefu sana, wakapata mateka wengi mno. Wakawapa majeruhi na wajane na yatima, na wazee pia, sehemu sawasawa na sehemu zao.

³¹Wakazikusanya silaha za adui wakazipanga kwa uangalifu katika ngome kuu, na mali iliyobaki wakaileta Yerusalemu.

³²Walimwua jemadari wa jeshi la Timotheo, mtu mwovu sana aliyewatenda Wayahudi mabaya mengi.

³³Tena, walipokuwa wakiushangilia ushindi wao katika mji wa babu zao, waliwachoma moto wale walioiteketeza milango mitakatifu, pamoja na Kalisthene na wengine waliokuwa wamekimbilia kibanda kidogo kujisalimisha. Hivyo watu hao walipewa malipo ya haki ya kukufuru kwao.

Nikano akiri ushujaa wa Wayahudi

³⁴Naye Nikano, mwenye kulaaniwa mara tatu, aliyewaleta wachuuzi elfu moja kuwanunua Wayahudi,

³⁵kwa msaada wa BWANA alidhiliwa na wale aliowahesabu kuwa si kitu kabisa. Ikambidi avue nguo zake rasmi na kwenda pekee kama mtumwa mtoro, akipitia njia za kandokando hata akafika Antiokia, bahati yake maangamizo ya jeshi lake tu!

³⁶Yeye aliyeahidi kukusanya fedha iliyodaiwa na Warumi kwa kuwakamata watu wa Yerusalemu, alitangaza kwamba Wayahudi wana shujaa anayewapigania, na kwa sababu hiyo Wayahudi hawashindiki wakizifuata amri alizozitoa.