Mwisho wa Antioko Epifani

¹Ikatokea ya kuwa wakati huo Antioko alirudishwa kwa fujo kutoka nchi ya Shamu.

²Alikuwa ameingia katika mji wa Persepoli akajaribu kuiteka mali ya hekalu na kuushika mji. Mara watu wakachukua silaha wakamshambulia, hata Antioko alikimbizwa na wenyeji akalazimishwa kwenda zake kwa fedheha.

³Alipokuwa Ekbatana aliletewa habari za mambo yaliyompata Nikano na majeshi ya Timotheo.

⁴Akahamaki mno, akakusudia kuwalipa Wayahudi kisasi cha ubaya wa wale waliomkimbiza. Kwa hiyo alimwagiza mwendeshaji wa gari lake akaze mwendo bila kupumzika mpaka wafike huko. Hakika hukumu ya Mungu ilikuwa ikimfuatia! Maana alisema kwa kiburi. Nitakapofika Yerusalemu nitaujaza mji mizoga ya Wayahudi.

⁵Lakini BWANA aonaye yote, Mungu wa Israeli, alimpiga pigo la mauti lisiloonekana, na mara alipotaja maneno hayo alishikwa na maumivu makali ya tumboni yasiyotulizika, na uchungu wa ndani mkali sana.

⁶Ndiyo mateso ya haki kwake aliyekuwa ameumiza matumbo ya watu kwa mateso mengi ya kutisha!

⁷Lakini hakuacha jeuri yake kamwe. Kwa jinsi alivyofidhulika, hasira yake juu ya Wayahudi iliwaka kama moto. Akazidi kuhimiza mwendo. Ikawa gari lake linapokwenda kasi, aliponyoka akaanguka chini, akaumia vibaya sana katika viungo vyote vya mwili wake.

⁸Hata yeye aliyewaza kuyatawala mawimbi ya bahari – kwa jinsi alivyojivuna kupita kiasi cha binadamu – na kuweza kuvipima vilele vya milima kwa mizani, huyu sasa ameangushwa chini, na kuchukuliwa katika machela, ishara dhahiri kwa wote kwa uweza wa Mungu.

⁹Kisha funza walijaa katika mwili wa mtu huyu mkufuru, hata alipokuwa angali yu hai na katika maumivu na uchungu mwingi, nyama yake ikavurugika. Hata, kwa ajili ya uvundo, askari wote wa jeshi lake walimwonea kinyaa.

¹⁰Mtu huyu, ambaye zamani kidogo alijiona aweza kuzigusa nyota za mbinguni, sasa hana atakaye kumchukua kwa sababu ya mnuko wake.

¹¹Basi, hapo kiburi chake kilianza kupungua, maana moyo wake ulivunjika; akapata ufahamu chini ya mapigo ya Mungu, hali maumivu yake yanazidi kila dakika.

¹²Hata yeye mwenyewe asipoweza kuistahimili harufu yake, alisema kwamba, Ni haki binadamu ajidhili chini ya Mungu, wala asijihesabu kuwa sawa naye.

Antioko atoa ahadi kwa Mungu

¹³Zaidi ya hayo, huyu mwovu aliweka nadhiri kwa BWANA Mwenyezi, ambaye sasa haoneshi huruma kwake,

¹⁴akisema kama mji mtakatifu, ambao alikuwa akiuendea kwa haraka kuuangusha chini na kuufanya mahali pa mizoga, atauweka huru.

¹⁵Nao Wayahudi, ambao aliwahesabu kuwa hawastahili kuzikwa (ila kutupiwa pamoja na watoto wao kwa wanyama, na kuliwa na ndege), hao wote atawafanya sawasawa na raia wa Athene.

¹⁶Na hekalu takatifu, ambalo alikuwa kwanza ameliteka, aliahidi kulipamba kwa matoleo mazuri sana, na kurudisha vyombo vitakatifu, akivizidisha mara nyingi, na kulipa gharama za dhabihu kwa fedha yake mwenyewe.

¹⁷Hata pamoja na hayo yote, aliahidi kuifuata dini ya Kiyahudi, na kwenda kotekote kunako watu ili kuutangaza uweza wa Mungu!

Waraka wa Antioko kwa Wayahudi

¹⁸Lakini maumivu yake hayakupungua, kwa kuwa hukumu ya Mungu imempata kwa haki. Akakata tamaa, akaandika barua kwa Wayahudi kuwaomba hivi:

Barua ya Antioko na kifo chake

¹⁹Kwa Wayahudi washarifu, raia zake: Antioko, mfalme na jemadari mkuu, anawatakia furaha na afya na hali njema.

²⁰Kama ninyi na watoto wenu hamjambo, na mambo yenu yanakwenda vizuri, namshukuru Mungu.

²¹Kwa kuwa tumaini langu limewekwa mbinguni, nakumbuka kwa mapenzi heshima yenu na nia yenu njema. Nilipokuwa nikirudi toka nchi ya Shamu nilishikwa na ugonjwa mkubwa, basi naona sina budi kuuangalia usalama wa raia zangu.

²²Si kama nimekata tamaa juu ya hali yangu, la! Natumaini sana kupona katika ugonjwa wangu.

²³Ila nakumbuka ya kuwa baba yangu alipopeleka jeshi lake katika nchi za juu alimtaja mrithi wake,

²⁴ili, kama mambo yakitokea yasivyotazamiwa, au habari mbaya zikipatikana, watu wa nchi wajue ni nani aliyeusiwa ufalme, na kwa hiyo wasione wasiwasi.

²⁵Zaidi ya hayo, najua ya kuwa wakuu wa nchi za jirani zinazopakana na ufalme wangu wanangoja nafasi yao na kuvizia yatakayotokea. Kwa hiyo nimemweka mwanangu Antioko awe mfalme. Mara nyingi, nilipokuwa nikienda wilaya za juu kwa haraka, nilimkabidhi kwenu na kumtakia urafiki wenu; nami nimemwandikia yaliyoandikwa hapa.

²⁶Nawaonya, basi na kuwaomba, mzikumbuke fadhili mlizotendewa, katika nchi yenu na katika jamaa zenu, na kudumu wote katika nia yenu njema kwangu mimi na kwa mwanangu.

²⁷Naamini ya kuwa yeye, kwa upole na kwa wema, atafuata shauri langu la kuwatendea kwa huruma.

²⁸Hivyo yule mwuaji mkufuru, akipatwa na maumivu makali sana, kwa alivyowapatia watu wengine, alikufa milimani katika nchi ya kigeni kwa mauti ya kutisha mno.

²⁹Filipo, mtu mkuu katika jumba la mfalme, alipeleka maiti nyumbani, kisha, kwa hofu ya mwana wa Antioko, alimwendea Tolemayo Filometo huko Misri.