Salamu

¹Mzee, kwa Gayo mpenzi, nimpendaye katika kweli.[#Mdo 19:29; Rum 16:23; 1 Kor 1:14; 2 Yoh 1:1]

Gayo apongezwa kwa ukarimu wake

²Mpenzi naomba ufanikiwe katika mambo yote na kuwa na afya yako, kama vile roho yako ifanikiwavyo.[#2 Yoh 1:4]

³Maana nilifurahi mno walipokuja ndugu na kuishuhudia kweli yako, kama uendavyo katika kweli.

⁴Sina furaha iliyo kuu kuliko hii, kusikia ya kwamba watoto wangu wanakwenda katika kweli.

⁵Mpenzi, kazi ile ni ya uaminifu uwatendeayo hao ndugu na hao wageni nao,

⁶waliokushuhudia upendo wako mbele ya kanisa; utafanya vizuri ukiwasafirisha kama ipasavyo kwa Mungu.[#Tit 3:13]

⁷Kwa maana, kwa ajili ya Jina hilo, walitoka, wasipokee kitu kwa Mataifa.[#Mdo 20:35; 1 Kor 9:12,15]

⁸Basi imetupasa sisi kuwakaribisha watu kama hao, ili tuwe watenda kazi pamoja na kweli.[#Ebr 13:2; 2 Yoh 1:10]

Diotrefe na Demetrio

⁹Nililiandikia kanisa neno, lakini Diotrefe, apendaye kuwa wa kwanza kati yao, hatukubali.

¹⁰Kwa hiyo, nikija, nitayakumbuka matendo yake atendayo, atoavyo upuzi juu yetu kwa maneno maovu; wala hatoshwi na hayo, ila yeye mwenyewe hawakaribishi hao ndugu, na wale watakao kuwakaribisha, huwazuia, na kuwatoa katika kanisa.

Salamu za mwisho

¹¹Mpenzi, usiuige ubaya, bali uige wema. Yeye atendaye mema ni wa Mungu, bali yeye atendaye mabaya hakumwona Mungu.[#1 Yoh 3:6,9]

¹²Demetrio ameshuhudiwa na watu wote, tena na ile kweli yenyewe. Nasi pia tunashuhudia, nawe wajua ya kwamba ushuhuda wetu ni kweli.[#Yn 19:35; 21:24]

¹³Nilikuwa na mambo mengi ya kukuandikia, lakini sipendi kukuandikia kwa wino na kalamu.[#2 Yoh 1:12]

¹⁴Lakini natarajia kukuona karibuni, nasi tutasema uso kwa uso.

¹⁵Amani kwako. Rafiki zetu wakusalimu. Wasalimu hao rafiki zetu, kila mtu kwa jina lake.