Barnaba na Sauli wateuliwa

¹Na huko Antiokia katika kanisa lililokuwako palikuwa na manabii na waalimu, nao ni Barnaba, na Simeoni aitwaye Nigeri, na Lukio Mkirene, na Manaeni aliyekuwa ndugu wa kulelewa wa mfalme Herode, na Sauli.[#Mdo 11:27; #13:1 ‘Nigeri’ maana yake ‘mweusi’.]

²Basi hawa walipokuwa wakimfanyia Bwana ibada na kufunga, Roho Mtakatifu akasema, Nitengeeni Barnaba na Sauli kwa kazi ile niliyowaitia.[#Mdo 9:15]

³Ndipo wakiisha kufunga na kuomba, wakaweka mikono yao juu yao, wakawaacha waende zao.[#Mdo 6:6; 14:23; 1 Tim 4:14; 5:22]

Mitume wahubiri katika Kipro

⁴Basi watu hao, walipotumwa hadi Kipro na Roho Mtakatifu wakateremkia Seleukia, na kutoka huko wakasafiri baharini hata Kipro.[#Mdo 15:39]

⁵Na walipokuwa katika Salami wakalihubiri neno la Mungu katika masinagogi ya Wayahudi, nao walikuwa naye Yohana kuwa mtumishi wao.[#Mdo 12:12,25; 13:13]

⁶Walipokwisha kupita katikati ya kisiwa chote mpaka Pafo, wakaona mtu mmoja, mchawi, nabii wa uongo, Myahudi jina lake Bar-Yesu;

⁷mtu huyu alikuwa pamoja na mtawala Sergio Paulo, mtu mwenye akili. Yeye mtawala akawaita Barnaba na Sauli waje kwake, akataka kulisikia neno la Mungu.

⁸Lakini Elima, yule mchawi (maana ndiyo tafsiri ya jina lake), akashindana nao, akitaka kumtia yule mtawala moyo wa kuiacha ile imani.[#2 Tim 3:8]

⁹Lakini Sauli, ambaye ndiye Paulo, akiwa amejaa Roho Mtakatifu, akamkazia macho,

¹⁰akasema, Ewe mwenye kujaa hila na uovu wote, mwana wa Ibilisi, adui wa haki yote, huachi kuzipotoa njia za Bwana zilizonyooka?[#Hos 14:9]

¹¹Basi, angalia, mkono wa Bwana uko juu yako, nawe utakuwa kipofu, usilione jua kwa muda. Mara kiwi kikamwangukia na giza, akazungukazunguka na kumtafuta mtu wa kumshika mkono na kumwongoza.[#Mdo 9:8; Yn 9:39]

¹²Ndipo yule mtawala, alipoyaona yaliyotendeka, akaamini, akiyastaajabia mafundisho ya Bwana.

Paulo na Barnaba wakiwa Antiokia ya Pisidia

¹³Kisha Paulo na wenziwe wakang'oa nanga wakasafiri kutoka Pafo, wakafika Perge katika Pamfilia. Yohana akawaacha akarejea Yerusalemu.[#Mdo 12:12,25; 15:38]

¹⁴Lakini wao wakatoka Perge, wakapita kati ya nchi, wakafika Antiokia, mji wa Pisidia, wakaingia katika sinagogi siku ya sabato, wakaketi.

¹⁵Kisha, baada ya Torati na kitabu cha Manabii kusomwa, wakuu wa sinagogi wakatuma mtu kwao, na kuwaambia, Ndugu, kama mkiwa na neno la kuwafaa watu hawa, lisemeni.[#Mdo 15:21]

¹⁶Paulo akasimama, akawapungia mkono, akasema, Enyi Waisraeli, nanyi mnaomcha Mungu, sikilizeni.[#13:16 Katika Kigiriki ni waume wa Israeli.]

¹⁷Mungu wa watu hawa Israeli aliwachagua baba zetu, akawatukuza watu hao, walipokuwa wakikaa kama wageni katika nchi ya Misri, na kwa mkono ulioinuliwa akawatoa, akawaongoza.[#Kut 1:7; 12:51; Isa 1:2; Kut 6:1,6; 12:37,41; 14:8]

¹⁸Na kwa muda wa miaka kama arubaini akawavumilia katika jangwa.[#Hes 14:34; Kum 1:31; Kut 16:35]

¹⁹Na alipokwisha kuwaangamiza mataifa saba katika nchi ya Kanaani akawapa nchi yao iwe urithi kwa muda wa miaka kama mia nne na hamsini;[#Kum 7:1; Yos 14:1]

²⁰baada ya hayo akawapa waamuzi hata wakati wa nabii Samweli.[#Amu 2:16; 1 Sam 3:20]

²¹Hatimaye wakaomba kupewa mfalme; Mungu akawapa Sauli mwana wa Kishi, mtu wa kabila la Benyamini, kwa muda wa miaka arubaini.[#1 Sam 8:5; 10:21,24]

²²Na alipokwisha kumwondoa huyo, akamwinua Daudi awe mfalme wao ambaye alimshuhudia, akisema, Nimemwona Daudi, mwana wa Yese, mtu anayeupendeza moyo wangu, atakayefanya mapenzi yangu yote.[#1 Sam 13:14; 16:12,13; Zab 89:20; Isa 44:28; Ebr 1:5; 5:5]

²³Katika uzao wake mtu huyo Mungu amewaletea Israeli Mwokozi, yaani, Yesu, kama alivyoahidi;[#2 Sam 7:12; Isa 11:1]

²⁴Yohana alipokuwa amekwisha kuwahubiria watu wote wa Israeli habari za ubatizo wa toba, kabla ya kuja kwake.[#Mk 1:4; Lk 3:3]

²⁵Naye Yohana alipokuwa akimaliza mwendo wake alinena, Mnadhani mimi ni nani? Mimi siye. Lakini, angalieni, anakuja mmoja nyuma yangu ambaye mimi sistahili kumlegezea viatu vya miguu yake.[#Mt 3:11; Mk 1:7; Lk 3:16; Yn 1:20,27]

²⁶Ndugu zangu, wana wa ukoo wa Abrahamu, na hao miongoni mwenu wanaomcha Mungu, kwetu sisi neno la wokovu huu limepelekwa.[#Zab 107:20; Mdo 13:46]

²⁷Kwa maana wakaao Yerusalemu, na wakuu wao, kwa kuwa hawakumjua yeye, wala maneno ya manabii yanayosomwa kila sabato, wameyatimiza kwa kumhukumu.[#Mdo 3:17; Yn 16:3]

²⁸Na ijapokuwa hawakuona sababu ya kumwua wakamwomba Pilato auawe.[#Mt 27:22-23; Mk 15:13-14; Lk 23:21-23; Yn 19:15]

²⁹Hata walipokwisha kumaliza yote aliyoandikiwa, wakamteremsha kutoka kwa ule mti, wakamweka kaburini.[#Mt 27:57-61; Mk 15:42-47; Lk 23:50-56; Yn 19:38-42]

³⁰Lakini Mungu akamfufua katika wafu;[#Mdo 3:15]

³¹akaonekana siku nyingi na wale waliopanda naye kutoka Galilaya hadi Yerusalemu, ambao sasa ndio walio mashahidi wake mbele ya watu.[#Mdo 1:3]

³²Na sisi tunawahubiria Habari Njema ya ahadi ile waliyopewa mababa,[#Mdo 13:23]

³³ya kwamba Mungu amewatimizia watoto wetu ahadi hiyo, kwa kumfufua Yesu; kama ilivyoandikwa katika Zaburi ya pili,[#Zab 2:7]

Wewe ndiwe Mwanangu, mimi leo nimekuzaa.

³⁴Tena ya kuwa alimfufua katika wafu, asipate kurudia uharibifu, amenena hivi,[#Isa 55:3]

Nitawapa ninyi mambo matakatifu ya Daudi yaliyo amini.

³⁵Kwa hiyo anena na pengine,[#Zab 16:10; Mdo 2:27]

Hutamwachia Mtakatifu wako kuona uharibifu.

³⁶Kwa maana Daudi, akiisha kulitumikia shauri la Mungu katika kizazi chake, alilala, akawekwa pamoja na baba zake, akaona uharibifu.[#1 Fal 2:10; Amu 2:10; Mdo 2:29]

³⁷Bali huyu aliyefufuliwa na Mungu hakuona uharibifu.

³⁸Basi, na ijulikane kwenu, ndugu zangu, ya kuwa kwa huyo mnahubiriwa msamaha wa dhambi;[#Mdo 10:43; Hes 15:30; Ebr 9:9; 13:20]

³⁹na kwa yeye kila amwaminiye huhesabiwa haki katika mambo yale yote asiyoweza kuhesabiwa haki kwa Torati ya Musa.[#Rum 10:4]

⁴⁰Angalieni, basi, isiwajie habari ile iliyonenwa katika manabii.[#Hab 1:5]

⁴¹Tazameni, enyi mnaodharau,[#Hab 1:5]

kastaajabuni, mkatoweke;

kwa kuwa natenda kazi mimi siku zenu,

kazi ambayo msingeisadiki kabisa,

ijapo mtu akiwasimulia sana.

⁴²Na walipokuwa wakitoka, wakawasihi waambiwe maneno haya sabato ya pili.

⁴³Sinagogi ilipofumukana, Wayahudi na waongofu watauwa wengi wakawafuata Paulo na Barnaba; ambao, wakisema nao, wakawatia moyo kudumu katika neema ya Mungu.[#Mdo 11:23]

⁴⁴Hata sabato ya pili, watu wengi, karibu mji wote, wakakusanyika walisikie neno la Mungu.

⁴⁵Bali Wayahudi, walipowaona makutano, wakajaa wivu, wakayakanusha maneno yaliyonenwa na Paulo, wakibisha na kutukana.[#Mdo 13:50; 14:2]

⁴⁶Paulo na Barnaba wakanena kwa ushujaa wakasema, Ilikuwa lazima neno la Mungu linenwe kwenu kwanza; lakini kwa kuwa mnalisukumia mbali, na kujiona ninyi wenyewe kuwa hamkustahili uzima wa milele, angalieni, twawageukia Mataifa.[#Mdo 3:26; 18:6; Mt 10:6; Lk 7:30]

⁴⁷Kwa sababu ndivyo tulivyoamriwa na Bwana,[#Isa 42:6; 49:6]

Nimekuweka uwe nuru ya Mataifa,

Upate kuwa wokovu hata mwisho wa dunia.

⁴⁸Mataifa waliposikia hayo wakafurahi, wakalitukuza neno la Bwana, nao waliokuwa wamekusudiwa uzima wa milele wakaamini.[#Mdo 11:18; Rum 8:29]

⁴⁹Neno la Bwana likaenea katika nchi ile yote.

⁵⁰Lakini Wayahudi wakawachochea wanawake watauwa wenye cheo na wakuu wa mji, wakawataharakisha watu wawaudhi Paulo na Barnaba; wakawatoa katika mipaka yao.

⁵¹Nao wakawakung'utia mavumbi ya miguu yao, wakaenda Ikonio.[#Mt 10:14; Mk 6:11; Lk 9:5; 10:11; Mdo 18:6]

⁵²Lakini wanafunzi walijaa furaha na Roho Mtakatifu.