Paulo na Barnaba wakiwa Ikonio

¹Ikawa huko Ikonio wakaingia pamoja katika sinagogi la Wayahudi; na kwa vile walivyonena, kundi kubwa la Wayahudi na la Wagiriki wakaamini.

²Lakini Wayahudi wasioamini wakawataharakisha watu wa Mataifa na kuwatia nia mbaya juu ya ndugu.[#Mdo 13:45]

³Basi wakakaa huko wakati mwingi, wakinena kwa ushujaa katika Bwana, aliyelishuhudia neno la neema yake, akiwajalia ishara na maajabu yatendeke kwa mikono yao.[#Mdo 19:11; Mk 16:20; Ebr 2:4]

⁴Lakini jamii ya watu wa mjini wakafarakana; hawa walikuwa upande wa Wayahudi, na hawa upande wa mitume.

⁵Hata palipotokea shambulio la watu wa Mataifa na Wayahudi pamoja na wakubwa wao juu yao, kuwatenda jeuri na kuwapiga kwa mawe,[#Mdo 14:19; 2 Tim 3:11]

⁶wao wakapata habari wakakimbilia Listra na Derbe, miji ya Likaonia, na nchi zilizo kandokando;[#Mt 10:23]

⁷wakakaa huko, wakiihubiri Injili.[#Mdo 11:19,20]

Paulo na Barnaba wakiwa Listra na Derbe

⁸Na huko Listra palikuwa na mtu mmoja, asiyeweza kutumia miguu yake na aliyekuwa kiwete tangu kuzaliwa kwake.[#Mdo 3:2; 9:33; Yn 9:1]

⁹Mtu huyo alimsikia Paulo alipokuwa akinena; naye Paulo akamkazia macho na kuona ya kuwa ana imani ya kuponywa,[#Mdo 3:4; Mt 9:28]

¹⁰akasema kwa sauti kuu, Simama kwa miguu yako sawasawa. Akasimama upesi akaenda.

¹¹Na makutano walipoona aliyoyafanya Paulo wakapaza sauti zao, wakisema kwa lugha ya Kilikaonia, Miungu wametushukia kwa mifano ya wanadamu.[#Mdo 28:6]

¹²Wakamwita Barnaba, Zeu, na Paulo, Herme, kwa sababu ndiye aliyekuwa mnenaji.

¹³Kuhani wa Zeu ambaye hekalu lake lilikuwa mbele ya mji, akaleta ng'ombe na mataji ya maua hadi malangoni, akitaka kutoa dhabihu pamoja na umati wa watu.

¹⁴Lakini mitume Barnaba na Paulo, walipopata habari, wakararua nguo zao, wakaenda mbio wakaingia katika umati wa watu, wakipiga kelele,

¹⁵wakisema, Akina bwana, mbona mnafanya haya? Sisi nasi tu wanadamu hali moja na ninyi; tunawahubiria Habari Njema, ili mgeuke na kuyaacha mambo haya ya ubatili na kumwelekea Mungu aliye hai, aliyeumba mbingu na nchi na bahari na vitu vyote vilivyomo;[#Kut 20:11; Zab 146:6; Isa 37:16; Yer 32:17; Yak 5:17]

¹⁶ambaye zamani zilizopita aliwaacha mataifa yote waende katika njia zao wenyewe.[#Mdo 17:30]

¹⁷Lakini hakujiacha pasipo ushuhuda, kwa kuwa alitenda mema, akiwapeni mvua kutoka mbinguni, na nyakati za mavuno, akiwashibisha mioyo yenu chakula na furaha.[#Zab 147:8; Yer 5:24]

¹⁸Na kwa maneno hayo wakawazuia watu kwa shida, wasiwatolee dhabihu.

¹⁹Lakini Wayahudi wakafika toka Antiokia na Ikonio, wakawashawishi makutano hata wakampiga kwa mawe Paulo, wakamburuta nje ya mji, wakidhania ya kuwa amekwisha kufa.[#2 Kor 11:25; 2 Tim 3:11]

²⁰Lakini wanafunzi walipokuwa wakimzunguka pande zote, akasimama, akaingia ndani ya mji; na kesho yake akatoka, akaenda zake pamoja na Barnaba mpaka Derbe.

Paulo na Barnaba warudi Antiokia ya Shamu

²¹Hata walipokwisha kuihubiri Injili katika mji ule, na kupata wanafunzi wengi, wakarejea mpaka Listra na Ikonio na Antiokia,[#Mt 28:19]

²²wakifanya imara roho za wanafunzi na kuwahimiza wakae katika ile Imani, na ya kwamba imetupasa kuingia katika ufalme wa Mungu kwa njia ya dhiki nyingi.[#Mdo 11:23; 1 The 3:3; Mt 7:14]

²³Na walipokwisha kuwachagulia wazee katika kila kanisa, na kuomba pamoja na kufunga, wakawaweka katika mikono ya Bwana waliyemwamini.[#Mdo 13:3]

²⁴Wakapita kati ya Pisidia wakaingia Pamfilia.

²⁵Na baada ya kuhubiri lile neno katika Perge wakateremka mpaka Atalia.

²⁶Na kutoka huko wakaabiri kwenda Antiokia. Huko ndiko walikoombewa neema ya Mungu kwa ile kazi waliyokwisha kuitimiza.[#Mdo 13:1,2]

²⁷Hata walipofika wakalikutanisha kanisa, wakawaeleza mambo yote aliyoyafanya Mungu pamoja nao, na ya kwamba amewafungulia Mataifa mlango wa imani.[#1 Kor 16:9; Mdo 11:18]

²⁸Wakaketi huko wakati usiokuwa mchache, pamoja na wanafunzi.