Paulo aenda Makedonia na Ugiriki

¹Ghasia ile ilipokoma, Paulo akatuma kuwaita wanafunzi akawaonya, akaagana nao, kisha akaondoka aende zake mpaka Makedonia.

²Naye akiisha kupita pande zile na kuwafariji kwa maneno mengi, akafika Ugiriki.

³Alipokwisha kukaa huko miezi mitatu, na Wayahudi kumfanyia vitimvi, alipotaka kwenda Shamu kwa njia ya bahari; basi akaazimu kurejea kwa njia ya Makedonia.

⁴Watu hawa wakafuatana naye, Sopatro Mberea, mwana wa Piro, na Aristarko na Sekundo, watu wa Thesalonike; na Gayo mtu wa Derbe, na Timotheo; na Tikiko na Trofimo watu wa Asia.[#Mdo 17:10; 19:29; Rum 16:21]

⁵Ila watu hao wamekwisha kutangulia wakamngojea Troa.[#Mdo 16:8]

⁶Sisi tukatweka baada ya siku za mikate isiyotiwa chachu, tukatoka Filipi, tukawafikia Troa, baada ya safari ya siku tano, tukakaa huko siku saba.

Ziara ya mwisho ya Paulo huko Troa

⁷Siku ya kwanza ya juma, tulipokuwa tumekutana ili kumega mkate, Paulo akawahutubia, maana aliazimia kusafiri siku iliyofuata, naye akafululiza maneno yake hadi usiku wa manane.[#1 Kor 16:2; Mdo 2:42,46]

⁸Palikuwa na taa nyingi katika ghorofa lile tulipokuwa tumekusanyika.

⁹Kijana mmoja, jina lake Eutiko, alikuwa ameketi dirishani, akalemewa na usingizi sana; hata Paulo alipoendelea sana kuhubiri, akazidiwa na usingizi wake akaanguka toka ghorofa ya tatu; akainuliwa amekwisha kufa.

¹⁰Paulo akashuka, akamwangukia, akamkumbatia, akasema, Msifanye ghasia, maana uzima wake ungalimo ndani yake.[#1 Fal 17:21]

¹¹Akapanda juu tena, akamega mkate, akala, akazidi kuongea nao hadi alfajiri, ndipo akaenda zake.

¹²Wakamleta yule kijana, akiwa mzima, wakafarijika faraja kubwa sana.

Safari ya kutoka Troa hadi Mileto

¹³Lakini sisi tukatangulia kwenda merikebuni, tukaabiri kwenda Aso, tukikusudia kumpakia Paulo huko; kwa maana ndivyo alivyoagiza, yeye mwenyewe aliazimia kwenda kwa miguu.

¹⁴Alipotufikia huko Aso, tukampakia, kisha tukafika Mitilene.

¹⁵Tukatweka kutoka huko, na siku ya pili tukafika mahali panapokabili Kio; siku ya tatu tukawasili Samo, tukakaa Trogilio, siku ya nne tukafika Mileto.

¹⁶Kwa sababu Paulo alikusudia kusafiri pasipo kupitia Efeso merikebuni, asije akakawia katika Asia; kwa maana alikuwa na haraka, akitaka kuwahi Yerusalemu siku ya Pentekoste, kama ikiwezekana.[#Mdo 18:21]

Paulo asema na viongozi wa Efeso

¹⁷Toka Mileto Paulo akatuma watu kwenda Efeso, akawaita wazee wa kanisa.

¹⁸Walipofika kwake, akawaambia, Ninyi wenyewe mnajua tangu siku ya kwanza nilipokanyaga hapa Asia, jinsi nilivyokuwa kwenu wakati wote,[#Mdo 18:19; 19:10]

¹⁹nikimtumikia Bwana kwa unyenyekevu wote, na kwa machozi, na majaribu yaliyonipata kutokana na njama za Wayahudi;[#Mdo 20:3]

²⁰ya kuwa sikujiepusha katika kuwatangazia neno lolote liwezalo kuwafaa bali niliwafundisha waziwazi, na nyumba kwa nyumba,

²¹nikiwashuhudia Wayahudi na Wagiriki wamtubie Mungu, na kumwamini Bwana wetu Yesu Kristo.

²²Basi sasa, angalieni, nashika njia kwenda Yerusalemu nikiwa nimefungwa rohoni, nisiyajue mambo yatakayonikuta huko;[#Mdo 19:21]

²³isipokuwa Roho Mtakatifu mji kwa mji hunishuhudia akisema, ya kwamba vifungo na dhiki vyaningoja.[#Mdo 9:16; 21:4,11]

²⁴Lakini siyahesabu maisha yangu kuwa kitu cha thamani kwangu kama kuumaliza mwendo wangu na huduma ile niliyopokea kwa Bwana Yesu, kuishuhudia Habari Njema ya neema ya Mungu.[#2 Tim 4:7; Mdo 21:13]

²⁵Na sasa, tazameni, mimi najua ya kuwa ninyi nyote niliowahubiria ufalme wa Mungu, nikienda huku na huko, hamtaniona uso tena.

²⁶Kwa hiyo nawashuhudia wote siku hii ya leo, ya kuwa mimi sina hatia kwa damu ya mtu awaye yote.[#Mdo 18:6]

²⁷Kwa maana sikujiepusha na kuwahubiria habari ya kusudi lote la Mungu.

²⁸Jitunzeni nafsi zenu, na lile kundi lote nalo, ambalo Roho Mtakatifu amewaweka ninyi kuwa waangalizi ndani yake, mpate kulilisha kanisa lake Mungu, alilolinunua kwa damu yake mwenyewe.[#Zab 74:2; 1 Tim 4:16; 1 Pet 5:2]

²⁹Najua mimi ya kuwa baada ya kuondoka kwangu mbwamwitu wakali wataingia kwenu, wasilihurumie kundi;[#Mt 7:15; 10:16; Yn 10:12]

³⁰tena katika ninyi wenyewe watainuka watu wakisema mapotovu, wawavute hao wanafunzi wawafuatie wao.[#1 Yoh 2:19; Gal 4:17]

³¹Kwa hiyo kesheni, mkikumbuka ya kwamba miaka mitatu, usiku na mchana, sikuacha kumwonya kila mtu kwa machozi.[#Mk 13:35,37; 1 The 2:11]

³²Basi, sasa nawaweka katika mikono ya Mungu, na kwa neno la neema yake, ambalo laweza kuwajenga na kuwapa urithi pamoja nao wote waliotakaswa.[#Kum 33:3]

³³Sikutamani fedha wala dhahabu, wala mavazi ya mtu.[#Mt 10:8; 1 Kor 9:12; 1 Sam 12:3]

³⁴Ninyi wenyewe mnajua ya kuwa mikono yangu hii imetumika kwa mahitaji yangu na ya wale waliokuwa pamoja nami.[#Mdo 18:3; 1 Kor 4:12; 1 The 2:9]

³⁵Katika mambo yote nimewaonesha ya kuwa kwa kushika kazi hivi imewapasa kuwasaidia wanyonge, na kuyakumbuka maneno ya Bwana Yesu, jinsi alivyosema mwenyewe, Ni heri kutoa kuliko kupokea.

³⁶Alipokwisha kunena haya akapiga magoti, akaomba pamoja nao wote.[#Mdo 21:5]

³⁷Wakalia sana wote, wakamwangukia Paulo shingoni, wakambusubusu,[#Mdo 21:6; Rum 16:16; 1 Pet 5:14]

³⁸wakihuzunika zaidi kwa sababu ya neno lile alilosema, ya kwamba hawatamwona uso tena. Wakamsindikiza hata merikebuni.[#Mdo 20:25]