Hotuba ya Stefano kwa baraza

¹Kuhani Mkuu akasema, Je! Mambo hayo ndivyo yalivyo?

²Naye akasema, Ndugu zangu na baba zangu, sikilizeni: Mungu wa utukufu alimtokea baba yetu Abrahamu, alipokuwa katika Mesopotamia, kabla hajakaa Harani,[#Mwa 12:1; Zab 29:3; Mwa 11:31; 15:7]

³akamwambia, Toka katika nchi yako na katika jamaa zako, ukaende hata nchi nitakayokuonesha.[#Mwa 12:1; 48:4]

⁴Ndipo alipotoka katika nchi ya Wakaldayo, akakaa Harani, akatoka huko baada ya kufa babaye, Mungu akamhamisha mpaka nchi hii mnayokaa ninyi sasa.[#Mwa 11:31; 12:4]

⁵Wala hakumpa urithi humu hata kiasi cha kuweka mguu; akaahidi kwamba atampa, iwe milki yake, na ya uzao wake baadaye alipokuwa hana mtoto.[#Mwa 12:7; 13:15; 15:18; 17:8; 48:4; Kum 2:5]

⁶Mungu akanena hivi, ya kwamba wazawa wake watakuwa wageni katika nchi ya watu wengine, nao watawafanya kuwa watumwa wao, na kuwatenda mabaya kwa muda wa miaka mia nne.[#Mwa 15:13-14; Kut 2:22; 12:40]

⁷Na lile taifa watakaowafanya watumwa nitawahukumu mimi, alisema Mungu; na baada ya hayo watatoka, nao wataniabudu mahali hapa.[#Kut 3:12]

⁸Akampa agano la tohara; basi Abrahamu akamzaa Isaka, akamtahiri siku ya nane. Isaka akamzaa Yakobo. Yakobo akawazaa wale kumi na wawili, wazee wetu.[#Mwa 17:10-14; 21:2-4; 25:26; 29:31—35:18]

⁹Wale wazee wetu wakimwonea wivu Yusufu, wakamwuza aende Misri. Mungu akawa pamoja naye,[#Mwa 37:11,28; 39:2,21; 45:4]

¹⁰akamtoa katika dhiki zake zote, akampa fadhili na hekima mbele ya Farao, mfalme wa Misri; naye akamfanya awe mtawala juu ya Misri na nyumba yake yote.[#Mwa 41:39-41; 39:21; Zab 105:21]

¹¹Basi kukawa na njaa katika nchi yote ya Misri na Kanaani, na dhiki nyingi, wala baba zetu hawakupata chakula cha kuwatosha.[#Mwa 42:1-2; 41:54]

¹²Hata Yakobo aliposikia ya kwamba huko Misri kuna nafaka, akawatuma baba zetu mara ya kwanza.[#Mwa 42:2]

¹³Hata safari ya pili Yusufu akajitambulisha kwa ndugu zake, jamaa ya Yusufu ikawa dhahiri kwa Farao.[#Mwa 45:1,3,16]

¹⁴Yusufu akatuma watu akamwita Yakobo babaye na jamaa zake wote pia, watu sabini na watano.[#Mwa 45:9-10; 17:18; Mwa 46:27; Kut 1:5; Kum 10:22]

¹⁵Basi Yakobo akashuka mpaka Misri; akafa yeye na baba zetu;[#Mwa 46:1-7; 49:33; Kut 1:6]

¹⁶wakachukuliwa mpaka Shekemu wakazikwa katika kaburi lile, ambalo Abrahamu alilinunua kwa kima fulani cha fedha kutoka kwa wana wa Hamori, huko Shekemu.[#Mwa 23:3-16; 33:19; 50:7-13; Yos 24:32]

¹⁷Basi wakati wa ile ahadi ambayo Mungu alimpa Abrahamu ulipokuwa unakaribia, wale watu wakazidi na kuongezeka sana huko Misri,[#Kut 1:7-8]

¹⁸hata mfalme mwingine asiyemfahamu Yusufu akaanza kutawala katika Misri.

¹⁹Huyo akawafanyia hila kabila yetu, na kuwatenda mabaya baba zetu, akiwaamuru wawatupe watoto wao wachanga, ili wasiishi.[#Kut 1:10-11,22; Mwa 24:7]

²⁰Wakati huo akazaliwa Musa, naye alikuwa mzuri sana, akalelewa muda wa miezi mitatu katika nyumba ya babaye.[#Kut 2:2; Ebr 11:23]

²¹Wakati alipotupwa, binti Farao akamtwaa, akamlea awe kama mwanawe.[#Kut 2:3-10]

²²Musa akafundishwa hekima yote ya Wamisri, akawa hodari wa maneno na matendo.

²³Umri wake ulipokuwa kama miaka arubaini akaazimu moyoni mwake kwenda kuwatazama ndugu zake Waisraeli.[#Kut 2:11-15]

²⁴Akamwona mmoja akidhulumiwa, akamtetea, akamlipizia kisasi yule aliyekuwa akionewa, akampiga huyo Mmisri.[#Kut 2:12]

²⁵Alidhani kwamba ndugu zake watafahamu ya kuwa Mungu anawapa wokovu kwa mkono wake, lakini hawakufahamu.

²⁶Kesho yake akawatokea walipokuwa wakishindana, akataka kuwapatanisha, akisema, Enyi bwana zangu, ninyi ni ndugu. Mbona mnadhulumiana?[#Kut 2:13]

²⁷Lakini yeye aliyemdhulumu mwenziwe akamsukumia mbali, akisema, Ni nani aliyekuweka wewe kuwa mkuu na mwamuzi juu yetu?[#Kut 2:14; Lk 12:14]

²⁸Je! Wataka kuniua mimi kama ulivyomwua yule Mmisri jana?

²⁹Musa akakimbia kwa neno hilo, akakaa kama mgeni katika nchi ya Midiani, akazaa wana wawili huko.[#Kut 2:15,22; 18:3-4]

³⁰Hata miaka arubaini ilipotimia, malaika wa Bwana akamtokea katika jangwa la mlima wa Sinai katika muali wa moto, kichakani.[#Kut 3:1-10; Kum 33:16]

³¹Musa alipouona, akastaajabia maono yale, na alipokaribia ili atazame, sauti ya Bwana ikamjia,

³²Mimi ni Mungu wa baba zako, Mungu wa Abrahamu, na Mungu wa Isaka, na Mungu wa Yakobo. Musa akatetemeka, asithubutu kutazama.[#Kut 3:6]

³³Bwana akamwambia, Vua viatu miguuni mwako, kwa maana mahali hapa unaposimama ni nchi takatifu.[#Kut 3:5]

³⁴Hakika nimeona mateso ya watu wangu waliomo Misri, nimesikia kuugua kwao, nami nimeshuka niwatoe. Basi sasa, nitakutuma mpaka Misri.[#Kut 2:24; 3:7,10]

³⁵Musa huyo waliyemkataa, wakisema, Ni nani aliyekuweka kuwa mkuu na mwamuzi? Ndiye aliyetumwa na Mungu kuwa mkuu na mkombozi, kwa mkono wa yule malaika aliyemtokea katika kile kichaka.[#Kut 2:14]

³⁶Huyo ndiye aliyewatoa, akifanya ajabu na ishara katika nchi ya Misri, na katika Bahari ya Shamu, na katika jangwa muda wa miaka arubaini.[#Kut 7:3,10; 14:21; Hes 14:33]

³⁷Musa huyo ndiye aliyewaambia Waisraeli, Bwana Mungu wenu atawainulieni nabii, katika ndugu zenu, kama mimi; msikieni yeye.[#Kum 18:15,18; Mdo 3:22]

³⁸Yeye ndiye aliyekuwa katika kanisa jangwani pamoja na yule malaika aliyesema naye katika mlima wa Sinai, tena pamoja na baba zetu; ndiye aliyepokea maneno ya uzima ili atupe sisi.[#Kut 19:1—20:17; Kum 5:1-33; Mdo 7:53; Kum 9:10]

³⁹Mtu huyo baba zetu hawakutaka kumtii, bali wakamsukumia mbali, na kwa mioyo yao wakarejea Misri,[#Hes 14:3]

⁴⁰wakamwambia Haruni, Tutengenezee miungu, watakaotutangulia; maana huyo Musa, aliyetutoa katika nchi ya Misri, hatujui lililompata.[#Kut 32:1,23]

⁴¹Wakatengeneza ndama siku zile, wakaleta dhabihu kwa sanamu ile, wakafurahia kazi za mikono yao.[#Kut 32:2-6]

⁴²Basi Mungu akaghairi, akawaacha ili waliabudu jeshi la mbinguni, kama ilivyoandikwa katika kitabu cha manabii,[#Amo 5:25-27; Yer 19:13]

Je! Mlinitolea mimi dhabihu na sadaka

Miaka arubaini katika jangwa, enyi nyumba ya Israeli?

⁴³Nanyi mlichukua hema ya Moleki,

Na nyota za mungu wenu Refani,

Sanamu mlizozifanya ili kuziabudu;

Nami nitawafahamisha mwende mbali kupita Babeli.

⁴⁴Ile hema ya ushahidi ilikuwa pamoja na baba zetu jangwani, kama alivyoagiza yeye aliyesema na Musa, ya kwamba aifanye kulingana na mfano ule aliouona;[#Kut 25:9,40]

⁴⁵ambayo baba zetu, kwa kupokezana, wakaiingiza pamoja na Yoshua katika milki ya Mataifa wale, ambao Mungu aliwafukuza mbele ya baba zetu, mpaka siku za Daudi;[#Yos 3:14-17; 18:1; Mwa 17:8; 48:4; Kum 32:49]

⁴⁶aliyepata fadhili mbele za Mungu, naye aliomba ampatie Mungu wa Yakobo maskani.[#2 Sam 7:1-16; 1 Nya 17:1-14; Zab 132:5]

⁴⁷Lakini Sulemani alimjengea nyumba.[#1 Fal 6:1-38; 2 Nya 3:1-17]

⁴⁸Ila Yeye aliye juu hakai katika nyumba zilizojengwa kwa mikono, kama vile asemavyo nabii,[#Isa 66:1,2]

⁴⁹Mbingu ni kiti changu cha enzi,[#Isa 66:1-2]

Na nchi ni pa kuwekea miguu yangu;

Ni nyumba gani mtakayonijengea? Asema Bwana,

⁵⁰Au ni mahali gani nitakapostarehe?

Si mkono wangu uliofanya haya yote?

⁵¹Enyi wenye shingo gumu, msiotahiriwa mioyo wala masikio, siku zote mnampinga Roho Mtakatifu; kama baba zenu walivyofanya, na ninyi ni vivyo hivyo.[#Isa 63:10; Kut 32:9; Law 26:41; Hes 27:14; Yer 9:26]

⁵²Ni yupi katika manabii ambaye baba zenu hawakumwudhi? Nao waliwaua wale waliotabiri habari za kuja kwake yule Mwenye Haki; ambaye ninyi sasa mmekuwa wasaliti wake, mkamwua;[#2 Nya 36:16; Mt 23:31]

⁵³ninyi mlioipokea torati kwa agizo la malaika msiishike.[#Kut 20:1-26; Gal 3:19; Ebr 2:2]

Kupigwa mawe kwa Stefano

⁵⁴Basi waliposikia maneno haya, wakachomwa mioyo, wakamsagia meno.[#Mdo 5:33]

⁵⁵Lakini yeye akijaa Roho Mtakatifu, akakaza macho yake, akitazama mbinguni, akauona utukufu wa Mungu, na Yesu akisimama upande wa mkono wa kulia wa Mungu.[#Lk 22:69]

⁵⁶Akasema, Tazama! Naona mbingu zimefunguka, na Mwana wa Adamu amesimama mkono wa kulia wa Mungu.

⁵⁷Wakapiga kelele kwa sauti kuu, wakaziba masikio yao, wakamrukia kwa nia moja,

⁵⁸wakamtoa nje ya mji, wakampiga kwa mawe. Nao mashahidi wakaweka nguo zao miguuni pa kijana mmoja aliyeitwa Sauli.[#Mdo 22:20]

⁵⁹Wakampiga kwa mawe Stefano, naye akiomba, akisema, Bwana Yesu, pokea roho yangu.[#Zab 31:5; Lk 23:46]

⁶⁰Akapiga magoti, akalia kwa sauti kuu, Bwana, usiwahesabie dhambi hii. Akiisha kusema haya akalala. Na Sauli alikuwa akiona kitendo cha kuuawa kwake kuwa sawa.[#Lk 23:34]