Maisha mapya katika Kristo

¹Basi mkiwa mmefufuliwa pamoja na Kristo, yatafuteni yaliyo juu Kristo aliko, ameketi katika mkono wa kulia wa Mungu.[#Zab 110:1; Kol 2:12]

²Yafikirini yaliyo juu, siyo yaliyo katika nchi.[#Mt 6:33]

³Kwa maana mlikufa, na uhai wenu umefichwa pamoja na Kristo katika Mungu.[#Rum 6:2]

⁴Kristo atakapofunuliwa, aliye uhai wetu, ndipo na ninyi mtafunuliwa pamoja naye katika utukufu.[#1 Kor 15:43; Flp 1:21; Gal 2:20]

⁵Basi, viueni viungo vyenu vilivyo vya kidunia, uasherati, uchafu, tamaa mbaya, mawazo mabaya, na kutamani, ndiyo ibada ya sanamu;[#Rum 6:6; 8:13; Efe 4:19; 5:3,5]

⁶kwa ajili ya mambo hayo huja ghadhabu ya Mungu.[#Efe 5:6]

⁷Katika hayo ninyi nanyi mlitembea zamani, mlipoishi katika hayo.

⁸Lakini sasa yawekeni mbali nanyi haya yote, hasira, na ghadhabu, na uovu, na masuto, na matusi vinywani mwenu.[#Efe 4:25-31; 5:4]

⁹Msiambiane uongo, kwa kuwa mmevua kabisa utu wa kale, pamoja na matendo yake;[#Efe 4:22]

¹⁰mkivaa utu mpya, unaofanywa upya katika ufahamu kulingana na mfano wake yeye aliyeuumba.[#Mwa 1:26; Efe 4:24]

¹¹Hapo hapana Mgiriki wala Myahudi, kutahiriwa wala kutotahiriwa, mgeni wala mshenzi, mtumwa wala muungwana, bali Kristo ni yote, na katika yote.[#Gal 3:28]

¹²Basi, kwa kuwa mmekuwa wateule wa Mungu, watakatifu wapendwao, jivikeni moyo wa rehema, utu wema, unyenyekevu, upole, uvumilivu,[#Efe 4:2,32; 5:2; 1 Pet 2:9]

¹³mkichukuliana, na kusameheana, mtu akiwa na sababu ya kumlaumu mwenzake; kama Bwana alivyowasamehe ninyi, vivyo na ninyi.[#Efe 4:32; 5:2; Mt 6:14]

¹⁴Zaidi ya hayo yote jivikeni upendo, ndio kifungo cha ukamilifu.[#Rum 13:8,10; Efe 4:3]

¹⁵Na amani ya Kristo iamue mioyoni mwenu; ndiyo mliyoitiwa katika mwili mmoja; tena iweni watu wa shukrani.[#Efe 4:4; Flp 4:7; 1 Kor 12:13,27]

¹⁶Neno la Kristo na likae kwa wingi ndani yenu katika hekima yote, mkifundishana na kuonyana kwa zaburi, na nyimbo, na tenzi za rohoni; huku mkimwimbia Mungu kwa neema mioyoni mwenu.[#Efe 5:19-20]

¹⁷Na kila mfanyalo, kwa neno au kwa tendo, fanyeni yote katika jina la Bwana Yesu, mkimshukuru Mungu Baba kupitia kwake.[#1 Kor 10:31; Efe 5:20]

Mawaidha kwa familia

¹⁸Ninyi wake, watiini waume zenu, kama ipendezavyo katika Bwana.[#Efe 5:22—6:9; 1 Pet 3:1]

¹⁹Ninyi waume, wapendeni wake zenu msiwe na uchungu nao.[#Efe 5:25; 1 Pet 3:7]

²⁰Ninyi watoto, watiini wazazi wenu katika mambo yote; maana jambo hili lapendeza katika Bwana.[#Efe 6:1]

²¹Ninyi akina baba, msiwachokoze watoto wenu, wasije wakakata tamaa.[#Efe 6:4]

²²Ninyi watumwa, watiini hao ambao kwa mwili ni bwana zenu, katika mambo yote, si kwa utumwa wa macho, kama wajipendekezao kwa wanadamu, bali kwa unyofu wa moyo, mkimcha Bwana.[#Efe 6:5-8]

²³Lolote mfanyalo, lifanyeni kwa moyo, kama kwa Bwana, wala si kwa wanadamu,

²⁴mkijua ya kuwa mtapokea kwa Bwana ujira wa urithi. Mnamtumikia Bwana Kristo.

²⁵Maana adhulumuye atapata mapato ya udhalimu wake, wala hakuna upendeleo.[#Kum 10:17; Rum 2:11; Efe 6:9]