Mawe yenye maandishi na madhabahu katika mlima

¹Musa na wazee wa Israeli wakawaagiza wale watu wakawaambia, Shikeni maagizo yote niwaagizayo leo.

²Na iwe, siku mtakayovuka Yordani kwenda nchi akupayo BWANA, Mungu wako, ujisimamishie mawe makubwa, ukayatalize matalizo,[#Yos 4:1; 8:30-32]

³uyaandike maneno yote ya torati hii juu yake, utakapokwisha kuvuka; ili upate kuingia nchi akupayo BWANA, Mungu wako, nchi imiminikayo maziwa na asali, kama alivyokuahidi BWANA, Mungu wa baba zako.

⁴Na iwe, mtakapokwisha vuka Yordani myasimamishe mawe haya, niwaagizayo hivi leo, katika mlima Ebali, nawe yatalize matalizo.[#Kum 11:29; Yos 8:30]

⁵Na huko umjengee madhabahu BWANA, Mungu wako, madhabahu ya mawe, usitumie chombo cha chuma juu yake.[#Kut 20:25; Yos 8:31]

⁶Jenga hiyo madhabahu ya BWANA, Mungu wako, kwa mawe yasiyochongwa; ukamtolee BWANA, Mungu wako, sadaka za kuteketezwa juu yake;

⁷ufanye na sadaka za amani, ukale huko; nawe furahi mbele za BWANA, Mungu wako.

⁸Kisha, andika juu ya mawe hayo maneno ya torati hii yote, waziwazi sana.[#Hab 2:2]

⁹Musa na makuhani Walawi wakawaambia Israeli wote wakasema, Nyamaza, usikize, Ee Israeli; leo umekuwa watu wa BWANA, Mungu wako.

¹⁰Basi isikize sauti ya BWANA, Mungu wako, ufanye maagizo yake na amri zake nikuagizavyo leo.

¹¹Musa akawaagiza wale watu siku iyo hiyo, akasema,

¹²Hawa na wasimame juu ya mlima wa Gerizimu kwa kuwabarikia watu, mkiisha vuka Yordani; Simeoni, na Lawi, na Yuda, na Isakari, na Yusufu, na Benyamini;[#Kum 11:29; Yos 8:33-35; Amu 9:7]

¹³na hawa na wasimame juu ya mlima wa Ebali kwa laana; Reubeni, na Gadi, na Asheri, na Zabuloni, na Dani, na Naftali.

¹⁴Kisha Walawi na wajibu, wawaambie watu wote wa Israeli kwa sauti kuu,[#Kum 33:10; Yos 8:33; Neh 8:7,8; Dan 9:11; Mal 2:7-9]

¹⁵Na alaaniwe mtu afanyaye sanamu ya kuchonga, au ya kusubu, machukizo kwa BWANA, kazi ya mikono ya fundi, akaisimamisha kwa siri. Na watu wote wajibu, waseme, Amina.[#Kut 20:4; 34:17; Law 19:4; 26:1; Kum 4:15-18; 5:8; Isa 44:9; Hos 13:2; Hes 5:22; Yer 11:5; 1 Kor 14:16]

¹⁶Na alaaniwe amdharauye baba yake au mama yake. Na watu wote waseme, Amina.[#Kut 20:12; Kum 5:16; Law 19:3]

¹⁷Na alaaniwe aondoaye mpaka wa jirani yake. Na watu wote waseme, Amina.[#Kum 19:14; Mit 22:28]

¹⁸Na alaaniwe ampotezaye kipofu akakosa njia. Na watu wote waseme, Amina.[#Law 19:14; Ayu 29:15; Mit 28:10; Mt 15:14; Ufu 2:14]

¹⁹Na alaaniwe apotoaye hukumu ya mgeni, na yatima, na mjane aliyefiliwa na mumewe. Na watu wote waseme, Amina.[#Kut 22:21; 23:9; Law 19:33-34; Kum 10:18; 24:17-18; Mal 3:5]

²⁰Na alaaniwe alalaye na mke wa baba yake, kwa kuwa amefunua mavazi ya babaye. Na watu wote waseme, Amina.[#Law 18:8; 20:11; Kum 22:30; 1 Kor 5:1]

²¹Na alaaniwe alalaye na mnyama wa aina yoyote. Na watu wote waseme, Amina.[#Kut 22:19; Law 18:23; 20:15]

²²Na alaaniwe alalaye na dada yake, binti ya babaye, au binti ya mamaye. Na watu wote waseme, Amina.[#Law 18:9; 20:17; 2 Sam 13:1]

²³Na alaaniwe alalaye na mkwewe, mamaye mkewe. Na watu wote waseme, Amina.[#Law 18:17; 20:14]

²⁴Na alaaniwe ampigaye mwenzake kwa siri. Na watu wote waseme Amina.[#Law 24:17; Hes 35:31]

²⁵Na alaaniwe atwaaye ujira wa kumwua asiye makosa. Na watu wote waseme, Amina.[#Kut 23:7; Kum 10:17; 16:19; Zab 15:5; Eze 22:12]

²⁶Na alaaniwe asiyeyaweka imara maneno ya torati hii kwa kuyafanya. Na watu wote waseme, Amina.[#Gal 3:10; Zab 119:21; Yer 11:3]