Onyo la kutomsahau Mungu katika fanaka

¹Amri hii ninayokuamuru leo mtaizingatia, mpate kuishi na kuongezeka, na kuingia katika nchi ile ambayo BWANA aliwaapia baba zenu; nanyi mtaimiliki.

²Nawe utaikumbuka njia ile yote BWANA, Mungu wako aliyokuongoza miaka hii arubaini katika jangwa, ili akunyenyekeze, kukujaribu kuyajua yaliyo moyoni mwako, kwamba utashika amri zake, au sivyo.[#Zab 136:16; Amo 2:10; 2 Nya 32:31; Yn 2:25]

³Akakunyenyekeza, akakuacha uone njaa, akakulisha kwa mana, usiyoijua wewe wala baba zako hawakuijua; apate kukujulisha ya kuwa mwanadamu haishi kwa mkate tu, bali huishi kwa kila litokalo katika kinywa cha BWANA.[#Mt 4:4; Lk 4:4; Kut 16:2; Zab 78:23-25; 105:40,41; 1 Kor 10:3,4; Zab 104:29; Lk 12:29-31; Ebr 13:5,6]

⁴Mavazi yako hayakuchakaa, wala mguu wako haukuvimba, miaka hiyo arubaini.[#Kum 29:5; Neh 9:21]

⁵Nawe fikiri moyoni mwako, ya kuwa kama vile baba amrudivyo mwanawe, ndivyo BWANA, Mungu wako, akurudivyo.[#2 Sam 7:14; Zab 89:32; Mit 3:12; Ebr 12:5; Ufu 3:19]

⁶Nawe uzishike amri za BWANA, Mungu wako, upate kwenda katika njia zake, na kumcha.

⁷Kwa kuwa BWANA, Mungu wako, anakuingiza katika nchi nzuri, nchi yenye vijito vya maji, na chemchemi, na visima, vibubujikavyo katika mabonde na milima;

⁸nchi ya ngano na shayiri, na mizabibu, na mitini, na mikomamanga; nchi ya mizeituni yenye mafuta, na asali;

⁹nchi utakayokula mikate humo, pasina shida, hutapungukiwa na kitu ndani yake; nchi ambayo mawe yake ni chuma, na milima yake mnaweza kuchimba shamba.

¹⁰Nawe utakula ushibe, utamshukuru BWANA, Mungu wako, kwa nchi nzuri aliyokupa.[#Zab 103:2; 1 Kor 10:31; 1 The 5:18; 1 Tim 4:3]

¹¹Jihadhari, usije ukamsahau BWANA, Mungu wako, kwa kutozishika amri zake, na hukumu zake, na sheria zake, ninazokuamuru leo.[#Hos 13:5-6]

¹²Angalia, utakapokuwa umekula na kushiba, na kujenga nyumba nzuri na kukaa ndani yake;[#Mit 30:9; Hos 13:6]

¹³na makundi yako ya ng'ombe na kondoo yatakapoongezeka, na fedha yako na dhahabu yako itakapoongezeka, na kila kitu ulicho nacho kitakapoongezeka;

¹⁴basi hapo moyo wako usiinuke, ukamsahau BWANA, Mungu wako, aliyekutoa katika nchi ya Misri, katika nyumba ya utumwa;[#1 Kor 4:7; Zab 106:21]

¹⁵aliyekuongoza katika jangwa lile kubwa lenye kitisho, lenye nyoka za moto na nge, nchi ya kiu isiyokuwa na maji; aliyekutolea maji katika mwamba mgumu,[#Isa 63:12; Yer 2:6; Hes 21:6; Hos 13:5; Hes 20:11]

¹⁶aliyekulisha jangwani kwa mana, wasiyoijua baba zako; apate kukutweza, apate kukujaribu, ili kukutendea mema mwisho wako.[#Kut 16:15; Rum 8:28; 2 Kor 4:17; Ebr 12:11; Yak 1:12; 1 Pet 1:7]

¹⁷Hapo usiseme moyoni mwako, Nguvu zangu na uwezo wa mkono wangu ndio ulionipatia utajiri huo.[#Kum 9:4; 1 Kor 4:7]

¹⁸Bali utamkumbuka BWANA, Mungu wako, maana ndiye akupaye nguvu za kupata utajiri; ili alifanye imara agano lake alilowapa baba zako, kama hivi leo.[#Mit 10:22; Hos 2:8]

¹⁹Lakini itakuwa, kama ukimsahau BWANA, Mungu wako, na kuiandama miungu mingine, na kuitumikia na kuiabudu, nawaonya leo ya kuwa mtaangamia bila shaka.

²⁰Kama vile mataifa yale ambayo BWANA anawaangamiza mbele yenu, ndivyo mtakavyoangamia; kwa sababu hamkutaka kuisikiliza sauti ya BWANA, Mungu wenu.[#Omb 1:1-22; 2:17; Eze 5:5-17; Dan 9:12; Zek 1:6]