¹Hivyo mwigeni Mungu, kama watoto wanaopendwa;[#Mt 5:48; Kol 3:12]

²mkaende katika upendo, kama Kristo naye alivyowapenda ninyi tena akajitoa kwa ajili yetu, sadaka na dhabihu kwa Mungu, kuwa harufu ya manukato.[#Kut 29:18; Zab 40:6; Gal 2:20; Ebr 10:10; Kol 3:13; Eze 20:41]

Zikataeni njia za kipagani

³Lakini uasherati usitajwe kwenu kamwe, wala uchafu wowote wa kutamani, kama iwastahilivyo watakatifu;[#Efe 4:19; Kol 3:5]

⁴wala aibu wala maneno ya upuzi wala ubishi; hayo hayapendezi; bali kuwepo kushukuru.[#Efe 4:29; Kol 3:8]

⁵Maana neno hili mnalijua hakika, ya kwamba hakuna mwasherati wala mchafu wala mwenye tamaa, (ndiye mwabudu sanamu), aliye na urithi katika ufalme wa Kristo na Mungu.[#1 Kor 6:9,10; Kol 3:5; Mdo 8:21]

⁶Mtu asiwadanganye kwa maneno yasiyo na maana; kwa kuwa kwa sababu ya hayo hasira ya Mungu huwajia wana wa uasi.[#Rum 1:18; Kol 2:4,8]

⁷Basi msishirikiane nao.

⁸Kwa maana zamani ninyi mlikuwa giza, bali sasa mmekuwa nuru katika Bwana; nendeni kama watoto wa nuru,[#Efe 2:11,13; Lk 16:8; 1 Pet 2:9; Yn 12:36]

⁹kwa kuwa tunda la nuru ni katika wema wote na haki na kweli;

¹⁰mkihakiki ni nini impendezayo Bwana.[#Rum 12:2]

¹¹Wala msishirikiane na matendo yasiyozaa ya giza, bali myakemee;[#Yn 16:8]

¹²kwa kuwa yanayotendeka kwao kwa siri, ni aibu hata kuyanena.[#Rum 1:24]

¹³Lakini chochote kinachoangazwa na nuru hudhihirishwa, maana chochote kile kilichoadhihirika ni nuru.[#Yn 3:20,21]

¹⁴Hivyo husema,[#Isa 26:19; 60:1; Rum 13:11; 6:13]

Amka, wewe usinziaye,

Ufufuke katika wafu,

Na Kristo atakuangaza.

¹⁵Basi angalieni sana jinsi mnavyoenda; si kama watu wasio na hekima bali kama watu wenye hekima;[#Mt 10:16; Kol 4:5]

¹⁶mkiukomboa wakati kwa maana nyakati hizi ni za uovu.[#Kol 4:5]

¹⁷Kwa sababu hiyo msiwe wajinga, bali mfahamu ni nini yaliyo mapenzi ya Bwana.[#Rum 12:2]

¹⁸Tena msilewe kwa mvinyo, ambamo mna ufisadi; bali mjazwe Roho;[#Mit 23:31; Lk 21:34]

¹⁹mkisemezana kwa zaburi na tenzi na nyimbo za rohoni, huku mkiimba na kumshangilia Bwana mioyoni mwenu;[#Kol 3:16-17; Zab 33:2,3]

²⁰na kumshukuru Mungu Baba sikuzote kwa mambo yote, katika jina lake Bwana wetu Yesu Kristo.[#Kol 3:17]

Nyumba ya Kikristo

²¹Hali mnanyenyekeana katika kicho cha Kristo.[#1 Pet 5:5]

²²Enyi wake, watiini waume zenu kama kumtii Bwana wetu.[#Kol 3:18; 1 Pet 3:1; Mwa 3:16]

²³Kwa maana mume ni kichwa cha mkewe, kama Kristo naye ni kichwa cha kanisa; naye ni mwokozi wa mwili.[#1 Kor 11:3; Kol 1:18]

²⁴Lakini kama vile kanisa limtiivyo Kristo vivyo hivyo wake nao wawatii waume zao katika kila jambo.

²⁵Enyi waume, wapendeni wake zenu, kama Kristo naye alivyolipenda kanisa, akajitoa kwa ajili yake;[#Kol 3:19; 1 Pet 3:7]

²⁶ili makusudi alitakase na kulisafisha kwa maji katika neno;[#Tit 3:5]

²⁷apate kujiletea kanisa tukufu, lisilo na dosari wala kunyanzi wala lolote kama hayo; bali liwe takatifu lisilo na mawaa.[#Zab 45:13; 2 Kor 11:2]

²⁸Vivyo hivyo imewapasa waume nao kuwapenda wake zao kama miili yao wenyewe. Ampendaye mkewe hujipenda mwenyewe.

²⁹Maana hakuna mtu anayeuchukia mwili wake popote; bali huulisha na kuutunza, kama Kristo naye anavyolitendea kanisa.

³⁰Kwa kuwa tu viungo vya mwili wake.[#Efe 1:23; 1 Kor 6:15; Mwa 2:23]

³¹Kwa sababu hiyo mtu atamwacha baba yake na mama yake, ataambatana na mkewe na hao wawili watakuwa mwili mmoja.[#Mwa 2:24]

³²Siri hiyo ni kubwa; ila mimi nanena habari ya Kristo na kanisa.[#Ufu 19:7]

³³Lakini kila mtu ampende mke wake kama nafsi yake mwenyewe; wala mke asikose kumstahi mumewe.