Watoto na wazazi

¹Enyi watoto, watiini wazazi wenu katika Bwana, maana hii ndiyo haki.[#Kol 3:20]

²Waheshimu baba yako na mama yako; hii ndiyo amri ya kwanza yenye ahadi,[#Kut 20:12; Kum 5:16]

³Upate heri na kuishi siku nyingi katika dunia.

⁴Nanyi, akina baba, msiwachokoze watoto wenu; bali waleeni katika adabu na maagizo ya Bwana.[#Kol 3:21; Isa 50:5; Mit 2:2; 3:11; 19:18; Kum 6:7,20-25; Zab 78:4]

Watumwa na mabwana

⁵Enyi watumwa, watiini wao walio bwana zenu kwa jinsi ya mwili, kwa hofu na kutetemeka, kwa unyofu wa moyo, kana kwamba mnamtii Kristo;[#Kol 3:22-25; Tit 2:9,10; 1 Pet 2:18]

⁶wala si kwa utumwa wa macho tu kama wajipendekazao kwa wanadamu bali kama watumwa wa Kristo, mkitenda yampendezayo Mungu kwa moyo;

⁷kwa nia njema kama kumtumikia Bwana wala si mwanadamu;

⁸mkijua ya kuwa kila neno jema alitendalo mtu atapewa lilo hilo na Bwana awe ni mtumwa au ni mtu huru.[#2 Kor 5:10]

⁹Nanyi, mabwana, watendeeni wao yayo hayo, pasipo kuwatisha, huku mkijua ya kuwa yeye aliye Bwana wao na wenu yuko mbinguni, wala kwake hakuna upendeleo.[#Kum 10:17; Kol 3:25; 4:1; 2 Nya 19:7; Mdo 10:34]

Silaha zote za Mungu

¹⁰Hatimaye, mzidi kuwa hodari katika Bwana na katika uweza wa nguvu zake.[#1 Kor 16:13; 1 Yoh 2:14]

¹¹Vaeni silaha zote za Mungu, mpate kuweza kuzipinga hila za Shetani.[#Efe 4:14; 2 Kor 10:4]

¹²Kwa maana kushindana kwetu sisi si juu ya damu na nyama; bali ni juu ya falme na mamlaka, juu ya wakuu wa giza hili, juu ya majeshi ya pepo wabaya katika ulimwengu wa roho.[#Efe 2:2; Yn 14:30; Kol 1:13; 1 Pet 5:8,9]

¹³Kwa sababu hiyo twaeni silaha zote za Mungu, mpate kuweza kushindana siku ya uovu, na mkiisha kuyatimiza yote, kusimama.[#1 Fal 20:11]

¹⁴Basi simameni, mkiwa mmejifunga kweli viunoni, na kuvaa dirii ya haki kifuani,[#Isa 11:5; 59:17; Lk 12:35; 1 Pet 1:13; 1 The 5:8]

¹⁵na kama viatu vilivyofungiwa miguuni mwenu muwe tayari kutangaza Injili ya amani;[#Isa 52:7; 40:3,9]

¹⁶zaidi ya yote mkiitwaa ngao ya imani, ambayo kwa hiyo mtaweza kuizima mishale yote yenye moto ya yule mwovu.[#1 Pet 5:9; 1 Yoh 5:4]

¹⁷Tena ipokeeni chapeo ya wokovu, na upanga wa Roho ambao ni neno la Mungu;[#Isa 59:17; 11:4; 49:2; 51:16; 1 The 5:8; Hos 6:5]

¹⁸kwa sala zote na maombi mkisali kila wakati katika Roho, mkikesha kwa jambo hilo na kudumu katika kuwaombea watakatifu wote;[#Mt 26:41; Kol 4:2,3]

¹⁹pia na kwa ajili yangu mimi, nipewe usemi kwa kufumbua kinywa changu, ili niihubiri kwa ujasiri ile siri ya Injili;[#Kol 4:3; 2 The 3:1; Mdo 4:29]

²⁰ambayo kwa ajili yake mimi ni mjumbe katika minyororo; hata nipate ujasiri katika huyo kunena jinsi inipasavyo kunena.[#2 Kor 5:20; Kol 4:4]

Mambo ya binafsi na baraka

²¹Basi ili nanyi pia mpate kuzijua habari zangu, ni hali gani, Tikiko, ndugu mpendwa, mhudumu mwaminifu katika Bwana, atawajulisheni mambo yote;[#Mdo 20:4; 2 Tim 4:12; Kol 4:7; #Kol 4:7-8]

²²ambaye ninamtuma kwenu kwa kusudi lilo hilo mpate kuzijua habari zetu, naye awafariji mioyo yenu.[#Kol 4:7,8]

²³Amani na iwe kwa ndugu, na upendo, pamoja na imani, zitokazo kwa Mungu Baba na kwa Bwana Yesu Kristo.

²⁴Neema na iwe pamoja na wote wampendao Bwana wetu Yesu Kristo kwa upendo usioisha.[#1 Pet 1:8]