Wana wa Israeli waufikia mlima wa Sinai

¹Mwezi wa tatu baada ya Waisraeli kutoka katika nchi ya Misri, siku iyo hiyo wakafika katika jangwa la Sinai.

²Nao walipokuwa wameondoka Refidimu na kufika jangwa la Sinai, wakatua katika lile jangwa; Israeli wakapiga kambi huko wakiukabili mlima.

³Musa akapanda kwa Mungu, na BWANA akamwita kutoka mlimani ule, akisema, Utawaambia nyumba ya Yakobo, na kuwaarifu wana wa Israeli, maneno haya;[#Mdo 7:38]

⁴Mmeona jinsi nilivyowatendea Wamisri, na jinsi nilivyowachukua ninyi juu ya mbawa za tai, nikawaleta ninyi kwangu mimi.[#Kum 32:11; Isa 63:9; Ufu 12:14]

⁵Sasa basi ikiwa mtaitii sauti yangu kweli kweli, na kulishika agano langu, hapo ndipo mtakapokuwa tunu kwangu kuliko makabila yote ya watu; maana dunia yote pia ni mali yangu,[#Kum 4:20; 7:6; 10:14; 14:2; 26:18; 32:8; 1 Fal 8:53; Zab 50:12; 135:4; Tit 2:14; 1 Kor 10:26]

⁶nanyi mtakuwa kwangu ufalme wa makuhani, na taifa takatifu. Hayo ndiyo maneno utakayowaambia wana wa Israeli.[#Ufu 1:6; 5:10; 20:6; 1 Pet 2:5,9; Law 20:24; Kum 7:6; Isa 62:12; 1 The 5:27]

⁷Musa akaenda akawaita wazee wa watu, akawafunulia maneno hayo yote, BWANA aliyokuwa amemwagiza.

⁸Watu wote wakaitika pamoja wakisema, Hayo yote aliyoyasema BWANA tutayatenda. Naye Musa akamwambia BWANA maneno ya hao watu.[#Kut 24:3,7; Kum 26:17]

Watu watakaswa

⁹BWANA akamwambia Musa, Tazama, mimi naja kwako katika wingu zito ili watu hawa wasikie nitakaposema nawe, nao wapate kukuamini nawe hata milele. Musa akamwambia BWANA hayo maneno ya watu.[#Kum 4:11,12; Zab 97:2; Mt 17:5; Yn 12:29]

¹⁰BWANA akamwambia Musa, Nenda kwa watu hawa, ukawatakase leo na kesho, wakazifue nguo zao,[#Ebr 10:22; Law 15:5]

¹¹wawe tayari kwa siku ya tatu; maana siku ya tatu BWANA atashuka katika mlima wa Sinai machoni pa watu hawa wote.[#Kut 34:5; Kum 33:2]

¹²Nawe utawawekea mipaka watu hawa pande zote, ukisema, Jihadharini, msipande mlima huu, wala msiuguse, hata pambizo zake; kila mtu atakayeugusa mlima huu, bila shaka atauawa.[#Ebr 12:18-20]

¹³Mkono wa mtu yeyote usimguse mtu huyo, ila hakika yake atapigwa kwa mawe, au kupigwa kwa mkuki; awe ni mnyama au awe ni mwanadamu, hataishi. Hapo parapanda itakapotoa sauti kwa kufululiza ndipo watakapoukaribia mlima.

¹⁴Musa akateremka mlimani akawaendea watu akawatakasa, nao wakafua nguo zao.

¹⁵Akawaambia watu; Muwe tayari siku ya tatu; msimkaribie mwanamke.[#1 Kor 7:5]

¹⁶Ikawa siku ya tatu, wakati wa asubuhi, palikuwa na ngurumo na umeme, na wingu zito juu ya mlima, na sauti ya baragumu iliyolia sana. Watu wote waliokuwa kituoni wakatetemeka.[#Ufu 4:5]

¹⁷Musa akawatoa hao watu katika kituo, akawaleta ili waonane na Mungu; wakasimama pande za chini za kile kilima.[#Kum 4:10]

¹⁸Mlima wa Sinai wote pia ukatoa moshi, kwa sababu BWANA alishuka katika moto; na ule moshi wake ukapanda juu kama moshi wa tanuri, mlima wote ukatetemeka sana.[#Amu 5:5; Zab 68:7,8; 2 Nya 7:1; Mwa 15:17; Ufu 15:8; Yer 4:24]

¹⁹Na hapo sauti ya baragumu ilipozidi kulia sana, Musa akanena, naye Mungu akamwitikia kwa sauti.[#Neh 9:13; Zab 81:7]

²⁰BWANA akaushukia mlima, juu ya kilele cha mlima; BWANA akamwita Musa aende hata kilele cha mlima; Musa akapanda juu.

²¹Ndipo BWANA akamwambia Musa, Shuka chini, uwaonye watu wasije wakafanya njia kuja kwa BWANA kutazama, kisha wengi miongoni mwao wakaangamia.[#1 Sam 6:19]

²²Makuhani nao, wamkaribiao BWANA, na wajitakase, BWANA asije akawakasirikia.[#Law 10:3; 2 Sam 6:7]

²³Musa akamwambia BWANA, Watu hawa hawawezi kuukaribia mlima wa Sinai; kwa kuwa wewe ulituusia, ukisema, Wekeni mipaka kandokando ya mlima, na kuutenga.

²⁴BWANA akamwambia, Nenda, ushuke wewe; nawe utakwea, wewe, na Haruni pamoja nawe; lakini wale makuhani na watu wasipenye kumkaribia BWANA, asije yeye akawafurikia juu yao.

²⁵Basi Musa akawateremkia hao watu na kuwaambia hayo.