Chukulianeni mizigo

¹Ndugu zangu, mtu akishikwa katika kosa lolote, ninyi mlio wa Roho mrejesheni upya mtu kama huyo kwa roho ya upole, ukijiangalia nafsi yako usije ukajaribiwa wewe mwenyewe.[#Mt 18:15; Yak 5:19]

²Mchukuliane mizigo na hivyo kuitimiza sheria ya Kristo.

³Maana mtu akijiona kuwa ni kitu, naye si kitu, ajidanganya nafsi yake.

⁴Lakini kila mtu na aipime kazi yake mwenyewe, ndipo atakapokuwa na sababu ya kujisifu ndani ya nafsi yake tu, wala si kwa mwenzake.[#2 Kor 13:5]

⁵Maana kila mtu atauchukua mzigo wake mwenyewe.[#Rum 14:12]

⁶Mwanafunzi na amshirikishe mwalimu wake katika mema yote.[#1 Kor 9:14]

⁷Msidanganyike, Mungu hadhihakiwi; kwa kuwa chochote apandacho mtu, ndicho atakachovuna.

⁸Maana yeye apandaye kwa mwili wake, katika mwili wake atavuna uharibifu; bali yeye apandaye kwa Roho, katika Roho atavuna uzima wa milele.[#Rum 8:13; Yn 6:63; 3:6]

⁹Tena tusichoke katika kutenda mema; maana tutavuna kwa wakati wake, tusipozimia roho.[#2 The 3:13]

¹⁰Kwa hiyo kadiri tupatavyo nafasi na tuwatendee watu wote mema; na hasa jamaa ya waaminio.[#2 Pet 1:7]

Mawaidha ya mwisho na baraka

¹¹Tazameni niandikavyo kwa herufi kubwa niwaandikiapo kwa mkono wangu mimi mwenyewe!

¹²Wote watakao kuonekana ni wazuri kwa mambo ya mwili, ndio wanaowashurutisha kutahiriwa; makusudi wasiudhiwe kwa ajili ya msalaba wa Kristo, hilo tu.[#Gal 5:11; Flp 3:18]

¹³Kwa maana hata wao wenyewe waliotahiriwa hawaishiki sheria; bali wanataka ninyi mtahiriwe, wapate kuona fahari katika miili yenu.

¹⁴Lakini mimi, la hasha, nisione fahari juu ya kitu chochote ila msalaba wa Bwana wetu Yesu Kristo, ambao kwa huo ulimwengu umesulubishwa kwangu, na mimi kwa ulimwengu.[#1 Kor 1:31; 2:2]

¹⁵Kwa sababu kutahiriwa si kitu, wala kutotahiriwa, ila kiumbe kipya.[#Gal 5:6; 1 Kor 7:19]

¹⁶Na wote watakaoenenda kwa kanuni hiyo, amani na iwe kwao na rehema, naam, kwa Israeli wa Mungu.[#Zab 125:5; 128:6; Flp 3:3]

¹⁷Tangu sasa mtu asinitaabishe; kwa maana ninachukua mwilini mwangu chapa zake Yesu.[#2 Kor 4:10]

¹⁸Ndugu zangu, neema ya Bwana wetu Yesu Kristo na iwe pamoja na roho zenu. Amina.