Uovu wa Sodoma

¹Basi, wale malaika wawili wakaja Sodoma jioni; na Lutu alikuwa amekaa mlangoni pa Sodoma. Lutu akawaona akaondoka akaenda kuwalaki, akainama kifudifudi.[#Mwa 18:2,22]

²Akasema, Bwana zangu, karibuni nawasihi mwingie nyumbani mwa mtumwa wenu, mkalale, mkanawe miguu yenu, hata asubuhi mwondoke na mapema mkaende zenu. Wakasema, Sivyo, lakini tutakaa uwanjani usiku kucha.[#Ebr 13:2; Lk 24:28]

³Akawasihi sana, nao wakaja, wakaingia nyumbani mwake. Akawafanyia karamu, akawapikia mikate isiyochachwa nao wakala.[#Mwa 18:8]

⁴Hata kabla hawajalala, watu wa mji, wenyeji wa Sodoma, wakaizunguka nyumba, vijana kwa wazee, watu wote waliotoka pande zote.

⁵Wakamwita Lutu, wakamwambia, Wako wapi wale watu waliokuja kwako usiku huu? Uwalete kwetu, ili tuweze kuwajua kimwili.[#Amu 19:22-24; Isa 3:9; Mwa 4:1; Rum 1:24; Yud 1:7; #19:5 Katika Kiebrania hakuna kimwili.]

⁶Lutu akawatokea mlangoni, akafunga mlango nyuma yake.

⁷Akasema, Basi, nawasihi, ndugu zangu, msitende vibaya hivi.

⁸Tazama, ninao binti wawili ambao hawajajua mwanamume, nawasihi nitawatolea kwenu mkawafanyie vilivyo vyema machoni penu, ila watu hawa msiwatende neno, kwa kuwa wamekuja chini ya dari yangu.

⁹Wakasema, “Ondoka hapa!” Kisha wakasema, “Mtu huyu amekuja kukaa kwetu kama mgeni; naye kumbe anataka kuhukumu! Basi tutakutenda vibaya kuliko hawa”. Wakamsonga sana Lutu, wakakaribia wauvunje mlango.[#Kut 2:14; Mdo 7:26,28; 2 Pet 2:7,8]

¹⁰Lakini wale watu wakanyosha mikono yao, wakamwingiza Lutu kwao nyumbani, wakaufunga mlango.

¹¹Kisha wakawapiga hao watu walioko mlangoni kwa upofu, wadogo kwa wakubwa, hata wakashindwa kuupata mlango.[#2 Fal 6:18; Mdo 13:11]

Kuangamizwa kwa Sodoma na Gomora

¹²Basi wale watu wakamwambia Lutu, Je! Unaye mtu hapa zaidi? Wakwe, wanao wa kiume au wa kike, na wowote ulio nao katika mji uwatoe katika mahali hapa;[#Yos 6:22; Mwa 7:1; 2 Pet 2:9]

¹³maana tutapaharibu mahali hapa, kwa kuwa kilio chake kimezidi mbele za BWANA; naye BWANA ametutuma tupaharibu.[#1 Nya 21:15]

¹⁴Lutu akatoka na kusema na wachumba wa binti zake, akawaambia, “Ondokeni mahali hapa kwa sababu BWANA atauharibu mji huu”. Lakini akaonekana kama achezaye machoni pa wakwe zake.[#Yer 51:6,45; Hes 16:21,45; Ufu 18:4; Kut 9:21; Lk 17:28-30; 24:11]

¹⁵Hata alfajiri ndipo malaika wakamhimiza Lutu, wakisema, Ondoka, mtwae mkeo na binti zako wawili waliopo hapa, la sivyo utapotelea katika maangamizi ya mji huu.

¹⁶Akakawiakawia; nao wale watu wakamshika mkono, na mkono wa mkewe, na mkono wa binti zake wawili, kwa jinsi BWANA alivyomhurumia, wakamtoa wakamweka nje ya mji.[#2 Pet 2:7; Kut 34:7; 1 Sam 2:9; 1 Nya 16:34; Zab 25:10; 31:23; 32:10; Mit 2:8; Efe 2:4,5]

¹⁷Ikawa walipomtoa nje, mmoja alisema, Jiponye nafsi yako usitazame nyuma, wala usisimame katika hilo bonde popote; ujiponye mlimani, usije ukaangamia.[#Ebr 2:3; Mwa 19:26]

¹⁸Lutu akawaambia, Sivyo, bwana wangu!

¹⁹Tazama, mtumwa wako ameona kibali machoni pako, nawe umezidisha rehema zako ulizonifanyia kwa kuponya nafsi yangu, nami siwezi kukimbilia mlimani nisipatwe na yale mabaya, nikafa.[#1 Tim 1:14-16]

²⁰Basi mji huu u karibu, niukimbilie, nao ni mdogo, nijiponye sasa huko, sio mdogo huu? Na nafsi yangu itaishi.

²¹Akamwambia, Tazama, nimekukubali hata kwa neno hili, kwamba sitauangamiza mji huo uliounena.

²²Hima, ujiponye huko, maana siwezi kufanya neno lolote, hadi uingiapo humo. Kwa hiyo jina la mji ule likaitwa Soari.[#Mwa 13:10; 14:2; #19:22 ‘yaani mdogo’]

²³Jua lilikuwa limechomoza juu ya nchi Lutu alipoingia Soari.

²⁴Ndipo BWANA akanyesha juu ya Sodoma na juu ya Gomora kiberiti na moto kutoka mbinguni kwa BWANA.[#Mt 10:15; 11:23-24; Lk 10:12; 17:29; 2 Pet 2:6; Yud 1:7; Kum 29:23; Zab 11:6; Isa 13:19; Yer 20:16; 50:40; Eze 16:49,50; Hos 11:8; Amo 4:11; Sef 2:9]

²⁵Akaangusha miji hiyo na Bonde lote, na wote waliokaa katika miji hiyo, na yote yaliyomea katika nchi ile.[#Mwa 14:3; Zab 107:34]

²⁶Lakini mkewe Lutu, akiwa nyuma ya mumewe, aliangalia nyuma akawa nguzo ya chumvi.[#Lk 17:32]

²⁷Abrahamu akatoka asubuhi kwenda mahali aliposimama mbele za BWANA,[#Mwa 18:22]

²⁸naye akatazama upande wa Sodoma na Gomora na nchi yote ya hilo Bonde, akaona, na tazama, moshi wa nchi ukapanda, kama moshi wa tanuri.[#Ufu 18:9]

²⁹Ikawa Mungu alipoiharibu miji ya Bondeni, Mungu akamkumbuka Abrahamu, akamtoa Lutu katika maangamizi alipoiangamiza miji hiyo aliyokaa Lutu.[#Mwa 8:1; 18:23]

Asili ya Wamoabi na Waamoni

³⁰Lutu akapanda kutoka Soari akakaa mlimani, na binti zake wawili pamoja naye, kwa sababu aliogopa kukaa katika Soari. Akakaa katika pango, yeye na binti zake wawili.[#Mwa 19:17,19]

³¹Yule mkubwa akamwambia mdogo, Baba yetu ni mzee, wala hakuna mwanamume katika nchi atuingilie kama ilivyo desturi ya dunia yote.[#Mwa 16:2,4; 38:8; Kum 25:5]

³²Haya, na tumnyweshe baba yetu mvinyo, tukalale naye, ili tumhifadhie baba yetu uzao.[#Lk 21:34; 1 Kor 15:33; Mk 12:19]

³³Wakamnywesha baba yao mvinyo usiku ule, akaondoka huyo mkubwa akalala naye, wala yeye hana habari alipolala wala alipoondoka.

³⁴Ikawa siku ya pili, mkubwa akamwambia mdogo, Tazama, nimelala jana na baba yangu, tumnyweshe mvinyo tena usiku huu, ukaingie ukalale naye ili tupate uzao kwa baba yetu.

³⁵Wakamnywesha tena baba yao mvinyo usiku ule, akaondoka mdogo akalala naye, wala yeye hana habari alipolala wala alipoondoka.

³⁶Basi hao binti wote wawili wa Lutu wakapata mimba kwa baba yao.

³⁷Yule mkubwa akazaa mwana, akamwita jina lake Moabu; huyo ndiye baba wa Wamoabi, hata leo.[#Kum 2:9]

³⁸Na yule mdogo naye akazaa mwana akamwita jina lake Benami; huyo ndiye baba wa Waamoni hata leo.[#Kum 2:19]