¹Basi mbingu na nchi zikamalizika kuumbwa, na jeshi lake lote.

²Na siku ya saba Mungu alimaliza kazi yake yote aliyoifanya; akastarehe siku ya saba, akaacha kufanya kazi yake yote aliyoifanya.[#Kut 31:17; Ebr 4:4,10]

³Mungu akaibarikia siku ya saba, akaitakasa kwa sababu katika siku hiyo Mungu alistarehe, akaacha kufanya kazi yake yote aliyoiumba na kuifanya.[#Kut 16:22-30]

⁴Hivyo ndivyo vizazi vya mbingu na nchi zilivyoumbwa.

Siku ile BWANA Mungu alipoziumba mbingu na nchi

⁵hapakuwa na mche wa kondeni bado, wala mboga ya kondeni haijachipuka bado, kwa maana BWANA Mungu hajainyeshea nchi mvua, wala hapana mtu wa kuilima ardhi;[#Zab 104:14; 65:9,11]

⁶maji yakapanda katika nchi, yakatia unyevu juu ya uso wote wa ardhi.

⁷BWANA Mungu akamfanya mtu kwa mavumbi ya ardhi, akampulizia puani pumzi ya uhai; mtu akawa kiumbe hai.[#1 Kor 15:45]

⁸BWANA Mungu akapanda bustani upande wa mashariki wa Edeni, akamweka ndani yake huyo mtu aliyemfanya.[#Mwa 13:10]

⁹BWANA Mungu akachipusha katika ardhi kila mti unaotamanika kwa macho na kufaa kwa kuliwa; na mti wa uzima katikati ya bustani, na mti wa ujuzi wa mema na mabaya.[#Eze 31:8; Mwa 3:22; Ufu 2:7; 22:2,14]

¹⁰Ukatoka mto katika Edeni wa kuitilia bustani maji, na kutokea hapo ukagawanyika kuwa vichwa vinne.[#Zab 46:4]

¹¹Jina la wa kwanza ni Pishoni; ndio unaozunguka nchi yote ya Havila, ambako kuna dhahabu;[#Mwa 25:18]

¹²na dhahabu ya nchi ile ni njema; huko kuna bedola, na vito shoham.

¹³Na jina la mto wa pili ni Gihoni; ndio unaozunguka nchi yote ya Kushi.

¹⁴Na jina la mto wa tatu ni Hidekeli; ndio unaopita mbele ya Ashuru. Na mto wa nne ni Frati.[#Dan 10:4]

¹⁵BWANA Mungu akamtwaa huyo mtu, akamweka katika bustani ya Edeni, ailime na kuitunza.

¹⁶BWANA Mungu akamwagiza huyo mtu, akisema, “Matunda ya kila mti wa bustani waweza kula,

¹⁷Lakini matunda ya mti wa ujuzi wa mema na mabaya usile, kwa maana siku utakapokula matunda ya mti huo utakufa hakika.”

¹⁸BWANA Mungu akasema, Si vema huyo mtu awe peke yake, nitamfanyia msaidizi wa kufanana naye.

¹⁹BWANA Mungu akafanyiza kutoka katika ardhi kila mnyama wa msituni, na kila ndege wa angani, akamletea Adamu ili aone atawaitaje; kila kiumbe hai, jina alilokiita Adamu likawa ndilo jina lake.[#Zab 8:6]

²⁰Adamu akawapa majina yao kila mnyama wa kufugwa, na ndege wa angani, na kila mnyama wa mwituni; lakini hakuonekana wa kumsaidia Adamu aliyefanana naye.

²¹BWANA Mungu akamletea Adamu usingizi mzito, naye akalala; kisha akatwaa ubavu wake mmoja, akafunika nyama mahali pake,[#Mwa 15:12]

²²na ule ubavu alioutwaa katika Adamu BWANA Mungu akaufanya mwanamke, akamleta kwa Adamu.[#Mit 18:22; Ebr 13:4]

²³Adamu akasema, Sasa huyu ni mfupa katika mifupa yangu, na nyama katika nyama yangu, basi ataitwa mwanamke, kwa maana ametwaliwa katika mwanamume.[#Mwa 29:14; Amu 9:2; 2 Sam 5:1; Efe 5:30; 1 Kor 11:8]

²⁴Kwa hiyo mwanamume atamwacha baba yake na mama yake naye ataambatana na mkewe, nao watakuwa mwili mmoja.[#Zab 45:10; Mt 19:5; Mk 10:7-8; 1 Kor 6:16; Efe 5:28-31]

²⁵Nao walikuwa uchi wote wawili, Adamu na mkewe, wala hawakuona haya.[#Kut 32:25; Isa 47:3]