Wazawa wa Ketura

¹Abrahamu alioa mke mwingine jina lake akiitwa Ketura.

²Akamzalia Zimrani, na Yokshani, na Medani, na Midiani, na Ishbaki, na Sua.[#1 Nya 1:32]

³Yokshani akamzaa Sheba, na Dedani; na wana wa Dedani walikuwa Waashuri na Waletushi, na Waleumi.

⁴Na wana wa Midiani walikuwa, Efa, na Eferi, na Hanoki, na Abida, na Eldaa.

Hao wote walikuwa ni wana wa Ketura.

⁵Abrahamu akampa Isaka yote aliyokuwa nayo.[#Mwa 24:36]

⁶Lakini wana wa masuria aliokuwa nao Abrahamu, Abrahamu akawapa zawadi, naye akawaondoa katika mahali alipokaa Isaka mwanawe, wakati wa uhai wake, waende pande za mashariki, mpaka nchi ya Kedemu.[#Mwa 21:14; Amu 6:3]

Kifo cha Abrahamu

⁷Abrahamu aliishi miaka mia moja na sabini na mitano.

⁸Abrahamu akafariki, naye akafa katika uzee mwema, mzee sana, ameshiba siku, akakusanyika kwa watu wake.[#Mwa 15:15; 47:8,9; 35:29; 49:33; Mdo 13:36]

⁹Isaka na Ishmaeli wanawe wakamzika katika pango ya Makpela, katika shamba la Efroni mwana wa Sohari Mhiti, lielekealo Mamre.[#Mwa 49:29,30; 50:13]

¹⁰Katika lile shamba alilolinunua Abrahamu kwa wazawa wa Hethi, huko ndiko alikozikwa Abrahamu na Sara mkewe.[#Mwa 23:3-16]

¹¹Ikawa, baada ya kufa kwake Abrahamu, Mungu akambariki Isaka mwanawe. Naye Isaka akakaa karibu ya Beer-lahai-roi.[#Mwa 16:14; 24:62]

Uzao wa Ishmaeli

¹²Hivi ndivyo vizazi vya Ishmaeli, mwana wa Abrahamu, ambaye Hajiri, Mmisri, mjakazi wa Sara, alimzalia Abrahamu.[#1 Nya 1:29]

¹³Na haya ndiyo majina ya wana wa Ishmaeli, kwa majina yao, na kwa vizazi vyao.

Mzaliwa wa kwanza wa Ishmaeli, ni Nebayothi, na Kedari, na Abdeeli, na Mibsamu,

¹⁴na Mishma, na Duma, na Masa,

¹⁵na Hadadi, na Tema, na Yeturi, na Nafishi, na Kedema.

¹⁶Hao ndio wana wa Ishmaeli, na hayo ni majina yao, katika miji yao, na katika vituo vyao, maseyidi kumi na wawili kwa kufuata jamaa zao.[#Mwa 17:20]

¹⁷Ishmaeli aliishi miaka mia moja na thelathini na saba. Akakata roho, akafa, akakusanyika kwa watu wake.[#Mwa 25:8; 49:33; Mk 15:37]

¹⁸Wakakaa toka Havila mpaka Shuri, unaoelekea Misri, kwa njia ya kwenda Ashuru. Akakaa katikati ya ndugu zake wote.[#1 Sam 15:7; Mwa 16:12]

Kuzaliwa na kukua kwa Esau na Yakobo

¹⁹Na hivi ndivyo vizazi vya Isaka, mwana wa Abrahamu. Abrahamu alimzaa Isaka.[#Mt 1:2]

²⁰Isaka akawa mwenye miaka arubaini alipomtwaa Rebeka binti Bethueli, Mshami, wa Padan-aramu, ndugu wa Labani, Mshami, kuwa mke wake.[#Mwa 22:23; 24:29,67]

²¹Isaka akamwomba BWANA kwa ajili ya mke wake, maana alikuwa tasa. Naye BWANA akamwitikia, na Rebeka mkewe akachukua mimba.[#1 Sam 1:11; 1 Nya 5:20; 2 Nya 33:13; Ezr 8:23; Rum 9:10]

²²Watoto wakashindana tumboni mwake. Naye akasema, Ikiwa ni hivi, kuishi kwanifaa nini? Akaenda kumwuliza BWANA.[#1 Sam 9:9; 10:22]

²³BWANA akamwambia,[#Rum 9:12; Mwa 24:60]

Mataifa mawili yako tumboni mwako,

Na makabila mawili ya watu watafarakana tangu tumboni mwako.

Kabila moja litakuwa hodari kuliko la pili,

Na mkubwa atamtumikia mdogo.

²⁴Siku zake za kuzaa zilipotimia, tazama! Mapacha walikuwamo tumboni mwake.

²⁵Wa kwanza akatoka, naye alikuwa mwekundu mwili wote kama vazi la nywele. Wakamwita jina lake Esau.[#Mwa 27:11]

²⁶Baadaye ndugu yake akatoka, na mkono wake ukiwa umemshika Esau kisigino. Akaitwa jina lake Yakobo. Isaka alikuwa mwenye miaka sitini mkewe alipowazaa.[#Hos 12:3; Mwa 27:36]

²⁷Watoto wakakua, Esau alikuwa mtu ajuaye kuwinda wanyama, mtu wa nyikani, na Yakobo alikuwa mtu mtulivu, mwenye kukaa hemani.[#Mwa 27:3,5; Ayu 1:1,8; 2:3; Ebr 11:9]

²⁸Basi Isaka akampenda Esau, kwa sababu alikula mawindo yake, na Rebeka akampenda Yakobo.[#Mwa 27:6,19]

Esau auza haki ya uzawa wake

²⁹Yakobo akapika chakula cha dengu. Esau akaja kutoka mbugani, naye alikuwa amechoka sana.

³⁰Esau akamwambia Yakobo, Tafadhali, unipe hicho chakula chekundu nile, kwa kuwa ninazimia mimi. Kwa hiyo walimwita jina lake Edomu.[#25:30 maana yake ni Mwekundu.]

³¹Yakobo akamwambia, Kwanza niuzie leo haki yako ya mzaliwa wa kwanza.

³²Esau akasema, Tazama, mimi ni karibu kufa, itanifaa nini haki hii ya uzazi?

³³Yakobo akamwambia, Niapie kwanza. Naye akamwapia, akamwuzia Yakobo haki yake ya mzaliwa wa kwanza.[#Ebr 12:16]

³⁴Yakobo akampa Esau mkate na chakula cha dengu, naye akala, akanywa, kisha akaondoka, akaenda zake. Hivyo Esau akaidharau haki yake ya mzaliwa wa kwanza.[#1 Kor 15:32]