¹Basi Isaka akamwita Yakobo, akambariki, akamwagiza akamwambia, Usitwae mke wa binti za Kanaani.[#Mwa 27:33]

²Ondoka, uende Padan-aramu, mpaka nyumba ya Bethueli baba ya mama yako, ukajitwalie huko mke katika binti za Labani, ndugu wa mama yako.

³Na Mungu Mwenyezi, akubariki, akuzidishe, na kukuongeza, ili uwe mtu wa watu wengi.[#Mwa 17:1,6]

⁴Akupe baraka ya Abrahamu, wewe na uzao wako pamoja nawe, upate kuirithi nchi ya kusafiri kwako, Mungu aliyompa Abrahamu.[#Mwa 17:4-8; Mwa 12:2; 22:17; 1 Nya 29:15; Zab 39:12; 2 Kor 5:6,7; Ebr 11:9,13; 1 Pet 1:17; 2:11]

⁵Basi Isaka akamtuma Yakobo, naye akaenda Padan-aramu, kwa Labani, mwana wa Bethueli, Mshami, ndugu wa Rebeka, mama yao Yakobo na Esau.

Esau amwoa binti wa Ishmaeli

⁶Esau akaona ya kwamba Isaka amembariki Yakobo na kumtuma Padan-aramu, ili ajitwalie mke huko, na katika kumbariki akamwagiza, akasema, Usioe mke wa binti za Kanaani,

⁷na ya kuwa Yakobo amewatii babaye na mamaye, akaenda Padan-aramu.

⁸Esau akaona ya kuwa binti za Kanaani hawakumpendeza Isaka, baba yake.[#Mwa 24:3]

⁹Basi Esau akaenda kwa Ishmaeli akamtwaa Mahalathi, binti Ishmaeli mwana wa Abrahamu, ndugu wa Nebayothi, kuwa mkewe pamoja na wakeze aliokuwa nao.[#Mwa 25:13; 36:3]

Ndoto ya Yakobo katika Betheli

¹⁰Yakobo akatoka Beer-sheba, kwenda Harani.[#Mdo 7:2]

¹¹Akafika mahali fulani akakaa huko usiku kucha, maana jua lilikuwa limekuchwa; akatwaa jiwe moja la mahali pale akaliweka chini ya kichwa chake, akalala usingizi pale pale.

¹²Akaota ndoto; na tazama, ngazi imesimamishwa juu ya nchi, na ncha yake yafika mbinguni. Tena, tazama, malaika wa Mungu wanapanda, na kushuka juu yake.[#Yn 1:51; Mwa 41:1; Ayu 33:15; Ebr 1:14]

¹³Na tazama, BWANA amesimama juu yake, akasema, Mimi ni BWANA, Mungu wa Abrahamu baba yako, na Mungu wa Isaka; nchi hii unayolala nitakupa wewe na uzao wako.[#Mwa 13:14-15; Mwa 35:1; 48:3; 26:24]

¹⁴Na uzao wako utakuwa kama mavumbi ya nchi, nawe utaenea upande wa magharibi, na mashariki, na kaskazini, na kusini; na katika wewe, na katika uzao wako, jamaa zote za dunia watabarikiwa.[#Mwa 12:3; 22:18; Mwa 13:14-16; Kum 12:20]

¹⁵Na tazama, mimi nipo pamoja nawe, nitakulinda kila uendako, nami nitakuleta tena mpaka nchi hii, kwa maana sitakuacha, hata nitakapokufanyia hayo niliyokuambia.[#Mwa 26:24; 35:6; 48:16; Zab 121:5; Kum 31:6; Hes 23:19]

¹⁶Yakobo akaamka katika usingizi wake, akasema, Kweli BWANA yupo mahali hapa, ijapokuwa mimi sikujua.[#Kut 3:5; Yos 5:15]

¹⁷Naye akaogopa akasema, Mahali hapa panatisha kama nini! Bila shaka, hapa ni nyumba ya Mungu, napo ndipo lango la mbinguni.

¹⁸Yakobo akaondoka asubuhi na mapema, akalitwaa lile jiwe aliloliweka chini ya kichwa chake, akalisimamisha kama nguzo, na kumimina mafuta juu yake.

¹⁹Akaita jina la mahali pale Betheli; lakini jina la mji ule hapo kwanza uliitwa Luzu.[#Amu 1:23; Hos 4:15]

²⁰Yakobo akaweka nadhiri akisema, Mungu akiwa pamoja nami, akinilinda katika njia niiendeayo, na kunipa chakula nile, na nguo nivae;[#Mwa 28:15; 31:13; Amu 11:30; 2 Sam 15:8; 1 Tim 6:8]

²¹nami nikirudi kwa amani nyumbani kwa baba yangu, ndipo BWANA atakuwa Mungu wangu.[#Amu 11:31; 2 Sam 15:8; 19:24; Kum 26:17; 2 Fal 5:17]

²²Na jiwe hili nililosimamisha kama nguzo litakuwa nyumba ya Mungu; na katika kila utakalonipa hakika nitakutolea wewe sehemu ya kumi.[#Mwa 35:7; Law 27:30]