Yakobo arudi Betheli

¹Mungu akamwambia Yakobo, Ondoka, panda uende Betheli, ukakae huko; ukamfanyie Mungu madhabahu huko; yeye aliyekutokea ulipomkimbia Esau, ndugu yako.[#Mwa 28:11-17,19; 27:43; 28:13]

²Yakobo akawaambia watu wa nyumbani mwake, na wote waliokuwa pamoja naye, Ondoeni miungu migeni iliyoko kwenu, mjisafishe mkabadili nguo zenu.[#Mwa 31:19; Yos 24:15; 1 Sam 7:3; Kut 19:10]

³Tuondoke, tupande kwenda Betheli, nami nitamfanyia Mungu madhabahu huko; yeye aliyenisikia siku ya shida yangu, akawa pamoja nami katika njia yote niliyoiendea.[#Mwa 32:7,24; Zab 107:6; Mwa 28:20; 31:3,42]

⁴Nao wakampa Yakobo miungu migeni yote iliyokuwa mikononi mwao, na vipuli vilivyokuwa masikioni mwao, naye Yakobo akazificha chini ya mwaloni ulioko Shekemu.[#Hos 2:13; Yos 24:26]

⁵Wakashika njia, hofu ya Mungu ikaishika miji iliyowazunguka, wala hawakuwafuata wana wa Yakobo.[#Kut 15:16; 23:27; Kum 11:25; Yos 2:9; 5:1; 2 Nya 14:14]

⁶Basi Yakobo akafika Luzu, katika nchi ya Kanaani, ndio Betheli, yeye na watu wote waliokuwa pamoja naye.[#Mwa 28:22]

⁷Akajenga huko madhabahu, akapaita mahali pale, El-Betheli; kwa sababu huko Mungu alimtokea, hapo alipomkimbia ndugu yake.[#Mhu 5:4; Mwa 28:13]

⁸Akafa Debora mlezi wa Rebeka, akazikwa chini ya Betheli, chini ya mwaloni; na jina lake likaitwa Alon-bakuthi.[#Mwa 24:59; #35:8 maana yake ni Mwaloni wa Vilio.]

⁹Mungu akamtokea Yakobo tena, aliporudi kutoka Padan-aramu akambariki.[#Hos 12:4]

¹⁰Mungu akamwambia, Jina lako ni Yakobo; hutaitwa tena Yakobo, lakini Israeli litakuwa jina lako. Akamwita jina lake, Israeli.[#Mwa 17:5; 32:28]

¹¹Mungu akamwambia, Mimi ni Mungu Mwenyezi, uzidi ukaongezeke. Taifa na kundi la mataifa watatoka kwako, na wafalme watatoka katika uzao wako.[#Mwa 17:4-8; 48:3,4; Kut 6:3; #35:11 Katika Kiebrania ni viunoni mwako.]

¹²Na nchi hii niliyowapa Abrahamu na Isaka nitakupa wewe, na uzao wako baada yako nitawapa nchi hiyo.[#Mwa 12:7; 13:15; 28:13; Kut 32:13]

¹³Mungu akakwea juu kutoka kwake mahali hapo aliposema naye.[#Mwa 17:22]

¹⁴Yakobo akasimamisha nguzo mahali aliposema naye, nguzo ya mawe, akamimina juu yake sadaka ya kinywaji, akamimina mafuta juu yake.[#Mwa 28:18-19]

¹⁵Yakobo akapaita mahali pale, Mungu aliposema naye, Betheli.

Kuzaliwa kwa Benyamini na kufa kwa Raheli

¹⁶Wakasafiri kutoka Betheli, na kabla ya kufika Efrata, Raheli akashikwa na uchungu wa kuzaa, na uchungu wake ulikuwa mkali.

¹⁷Ikawa alipokuwa anashikwa sana na uchungu, mkunga akamwambia, Usiogope, maana sasa utamzaa mwanamume mwingine.[#Mwa 30:24]

¹⁸Ikawa hapo katika kutoa roho yake, maana alikufa, akamwita jina lake Benoni, lakini babaye alimwita Benyamini.

¹⁹Akafa Raheli, akazikwa katika njia ya Efrata, ndio Bethlehemu.[#Mwa 48:7; Rut 1:2; 4:11; Mik 5:2; Mt 2:6]

²⁰Yakobo akasimamisha nguzo juu ya kaburi lake, ndiyo nguzo ya kaburi la Raheli hata leo.[#1 Sam 10:2]

²¹Kisha akasafiri Israeli akapiga hema yake upande wa pili wa mnara wa Ederi.[#Mik 4:8]

²²Ikawa Israeli alipokuwa akikaa katika nchi ile, Reubeni akaenda akalala na Bilha, suria wa babaye; Israeli akasikia habari.[#Mwa 49:4; 1 Nya 5:1]

Basi hao wana wa Yakobo walikuwa kumi na wawili.

²³Wana wa Lea ni Reubeni, mzaliwa wa kwanza wa Yakobo, na Simeoni, na Lawi, na Yuda, na Isakari, na Zabuloni.[#Mwa 46:8; Kut 1:2]

²⁴Wana wa Raheli, ni Yusufu na Benyamini.

²⁵Wana wa Bilha, kijakazi wa Raheli, ni Dani na Naftali.

²⁶Wana wa Zilpa, kijakazi wa Lea, ni Gadi na Asheri. Hawa ndio wana wa Yakobo aliozaliwa katika Padan-aramu.

Kufa kwa Isaka

²⁷Yakobo akaja kwa Isaka, babaye, huko Mamre, mji wa Arba, ndio Hebroni, walipokaa ugenini Abrahamu na Isaka.[#Mwa 13:18; Yos 14:15]

²⁸Siku za Isaka zilikuwa miaka mia moja na themanini.

²⁹Naye Isaka akakata roho, akafa, akakusanyika kwa watu wake, ni mzee, ameshiba siku. Esau na Yakobo, wanawe, wakamzika.[#Mhu 12:7; Mwa 15:15; 25:8,9; 49:31]