Ndoto za Yusufu

¹Yakobo akakaa katika nchi aliyosafiri baba yake, katika nchi ya Kanaani.[#Mwa 36:7]

²Hivi ndivyo vizazi vya Yakobo. Yusufu, aliyekuwa mwenye miaka kumi na saba, alikuwa akichunga kondoo pamoja na ndugu zake; naye alikuwa kijana pamoja na wana wa Bilha, na wana wa Zilpa, wake wa baba yake. Yusufu akamletea baba yao habari zao mbaya.[#1 Sam 2:22-24]

³Basi Israeli akampenda Yusufu kuliko wanawe wote, maana ni mwana wa uzee wake, akamfanyia kanzu ndefu.[#2 Sam 13:18]

⁴Ndugu zake wakaona ya kuwa baba yao anampenda kuliko ndugu zake wote, wakamchukia, wala hawakuweza kusema naye kwa amani.[#Mwa 27:41; 49:23; 1 Sam 17:28; Yn 7:3,5; 1 Yoh 2:11; 3:10]

⁵Yusufu akaota ndoto, akawapa ndugu zake habari, nao wakazidi kumchukia;

⁶akawaambia, Tafadhalini, sikieni ndoto hii niliyoiota.

⁷Tazama, sisi tulikuwa tukifunga miganda shambani, kumbe! Mganda wangu ukaondoka ukasimama, na tazama, miganda yenu ikazunguka ikainama mbele ya mganda wangu.[#Mwa 42:6; 43:26; 44:14]

⁸Ndugu zake wakamwambia, Je! Kweli wewe utatumiliki sisi? Nawe utatutawala sisi? Wakazidi kumchukia kwa ajili ya ndoto yake, na kwa maneno yake.

⁹Akaota tena ndoto nyingine, akawaambia ndugu zake, akasema, Angalieni, nimeota ndoto nyingine; na tazama, jua na mwezi na nyota kumi na moja zikaniinamia.[#Mwa 46:29]

¹⁰Akawaambia baba yake na ndugu zake; baba yake akamkemea akamwambia, Ni ndoto gani hii uliyoiota? Je! Mimi na mama yako na ndugu zako tutakuja tukusujudie mpaka chini?[#Mwa 27:29]

¹¹Ndugu zake wakamhusudu; bali baba yake akalihifadhi neno hili.[#Mdo 7:9; Lk 2:19,51]

Yusufu auzwa na ndugu zake

¹²Ndugu zake wakaenda kuchunga kondoo za baba yao huko Shekemu.

¹³Israeli akamwambia Yusufu, Je! Ndugu zako hawachungi kondoo katika Shekemu? Njoo, nikutume kwao. Akamwambia, Mimi hapa.

¹⁴Akamwambia, Nenda, basi, ukaone kama ndugu zako hawajambo, na kundi nalo li salama, ukaniletee habari. Basi akamtuma kutoka bonde la Hebroni, na akafika Shekemu.[#Mwa 29:6; 1 Sam 17:18; Mwa 13:18]

¹⁵Mtu mmoja akamkuta, naye alikuwa anazungukazunguka katika nyika; yule mtu akamwuliza, akisema, Unatafuta nini?

¹⁶Akasema, Nawatafuta ndugu zangu; tafadhali uniambie mahali wanakochunga.[#Wim 1:7]

¹⁷Yule mtu akasema, Wametoka hapa, maana niliwasikia wakisema, Twendeni Dothani. Basi Yusufu akawafuata ndugu zake akawakuta huko Dothani.[#2 Fal 6:13]

¹⁸Wakamwona akiwa mbali, na kabla hajawakaribia, wakafanya shauri juu yake ili wamwue.[#1 Sam 19:1; Zab 31:13; Mt 27:1; Mk 14:1; Yn 11:53; Mdo 23:12]

¹⁹Wakasemezana wao kwa wao, Tazama, yule bwana wa ndoto anakuja.

²⁰Haya, twende, tukamwue na kumtupa katika shimo mojawapo, nasi tutasema, Mnyama mkali amemla; kisha tutaona zitakuwaje ndoto zake.[#Mit 1:11; 6:17; 1 Yoh 3:12,13]

²¹Reubeni akasikia akamwokoa katika mikono yao, akasema, Tusimwue.[#Mwa 42:22]

²²Reubeni akawaambia, Msimwage damu; mtupeni katika shimo hili lililopo nyikani, wala msimguse; ili apate kumwokoa katika mikono yao, akamrudishe kwa baba yake.

²³Ikawa Yusufu alipofika kwa ndugu zake, wakamvua Yusufu kanzu yake, kanzu ile ndefu aliyoivaa,

²⁴wakamtwaa wakamtupa katika shimo; na hilo shimo ilikuwa tupu, hamna maji.

²⁵Nao wakakaa kitako kula chakula; wakainua macho yao, wakaona, msafara wa Waishmaeli wanakuja wakitoka Gileadi na ngamia zao, wakichukua ubani na zeri na manemane, wakisafiri kuvichukua mpaka Misri.[#Mit 30:20; Amo 6:6; Yer 8:22]

²⁶Yuda akawaambia ndugu zake, Kwafaa nini kumwua ndugu yetu, na kuificha damu yake?[#Mwa 4:10; Ayu 16:18]

²⁷Haya, na tumuuze kwa hawa Waishmaeli, wala mikono yetu isimdhuru, maana yeye ni ndugu yetu, na damu yetu. Ndugu zake wakakubali.[#1 Sam 18:17; Mwa 29:14; 42:21]

²⁸Wakapita wafanya biashara Wamidiani; basi wakamtoa Yusufu, wakampandisha kumtoa katika shimo, wakamuuza Yusufu kwa Waishmaeli kwa vipande vya fedha ishirini; nao wakamchukua Yusufu mpaka Misri.[#Mdo 7:9; Mwa 39:1; Amu 6:3; Mwa 45:4,5; Zab 105:17; Mt 27:9]

²⁹Akarudi Reubeni birikani, kumbe! Yusufu hayumo katika birika, akararua nguo zake.[#Ayu 1:20]

³⁰Akarudi kwa ndugu zake, akasema, Mtoto hayuko, nami niende wapi?[#Yer 31:15; Mwa 42:13,36]

³¹Wakaitwaa kanzu ya Yusufu, wakachinja mwana-mbuzi, na kuichovya kanzu katika damu.

³²Wakaenda nayo ile kanzu ndefu, wakamletea baba yao, wakasema, Tumeona hii; basi, utambue kama kanzu hii ni ya mwanao, ama siyo.[#Mwa 37:23]

³³Akaitambua, akasema, Ndiyo kanzu ya mwanangu, mnyama mkali amemla; bila shaka Yusufu ameraruliwa.[#Mwa 44:28]

³⁴Yakobo akararua mavazi yake, akajivika gunia viunoni, na kumlilia mwanawe siku nyingi.[#Mwa 37:29]

³⁵Wanawe wote, na binti zake wote, wakaondoka wamtulize, lakini akakataa kutulizwa, akasema, La! Nitashuka kaburini kwa mwanangu, nikiomboleza. Basi baba yake akamlilia.[#2 Sam 12:17; Mwa 42:38]

³⁶Nao Wamidiani wakamuuza huko Misri, kwa Potifa, mmoja wa maofisa wa Farao, mkuu wa askari walinzi.[#Mwa 39:1]