Yakobo ahamia Misri na jamaa yake yote

¹Israeli Akasafiri, pamoja na yote aliyokuwa nayo, akaja Beer-sheba, akamchinjia sadaka Mungu wa Isaka babaye.[#Mwa 21:31; 26:24; 28:13; 31:42]

²Mungu akanena na Israeli katika ndoto ya usiku, akasema, Yakobo, Yakobo. Akasema, Mimi hapa.[#Mwa 15:1; Ayu 33:14,15]

³Akasema, Mimi ni Mungu, Mungu wa baba yako, usiogope kushuka mpaka Misri; maana nitakufanya uwe taifa kubwa huko.[#Mwa 12:2; 28:13; Kum 26:5; Kut 1:9]

⁴Mimi nitashuka pamoja nawe mpaka Misri; nami nitakupandisha tena bila shaka; na Yusufu ataweka mkono wake juu ya macho yako.[#Mwa 28:15; 48:21; 15:16; 50:13; Kut 3:8]

⁵Yakobo akaondoka Beer-sheba; wana wa Israeli wakamchukua baba yao na watoto wao wadogo, na wake zao katika magari aliyotuma Farao ili kumchukua.[#Mwa 15:13; Mdo 7:15]

⁶Wakatwaa na wanyama wao, na mali zao walizokuwa wamepata katika nchi ya Kanaani, wakaja Misri, Yakobo na uzao wake wote pamoja naye.[#Kum 26:5; Yos 24:4; Zab 105:23; Isa 52:4]

⁷Wanawe, na wana wa wanawe, pamoja naye, binti zake na binti za wanawe, na uzao wake wote, aliwaleta pamoja naye mpaka Misri.

⁸Haya ndiyo majina ya wana wa Israeli walioingia Misri, Yakobo na wanawe: Reubeni, mzaliwa wa kwanza wa Yakobo.[#Kut 1:1; 6:14; Hes 26:5; 1 Nya 5:1]

⁹Na wana wa Reubeni; Hanoki, na Palu, na Hesroni, na Karmi.

¹⁰Na wana wa Simeoni; Yemueli na Yamini, na Ohadi, na Yakini, na Sohari, na Shauli, mwana wa mwanamke Mkanaani.[#Kut 6:15; 1 Nya 4:24]

¹¹Na wana wa Lawi; Gershoni, na Kohathi, na Merari.

¹²Na wana wa Yuda; Eri, na Onani, na Shela, na Peresi, na Zera; lakini Eri na Onani walikufa katika nchi ya Kanaani. Na wana wa Peresi, ni Hesroni, na Hamuli.[#Mwa 38:3,29; 1 Nya 2:5]

¹³Na wana wa Isakari; Tola, na Puva, na Yashubu, na Shimroni.

¹⁴Na wana wa Zabuloni; Seredi, na Eloni, na Yaleeli.

¹⁵Hao ndio wana wa Lea, aliomzalia Yakobo katika Padan-aramu, na Dina, binti yake. Wanawe wote wa kiume na kike walikuwa watu thelathini na watatu.

¹⁶Na wana wa Gadi; Sefoni, na Hagi, na Shuni, na Esboni, na Eri, na Arodi, na Areli.[#Hes 26:15]

¹⁷Na wana wa Asheri; Imna, na Ishva, na Ishvi, na Beria, na Sera, dada yao. Na wana wa Beria ni Heberi, na Malkieli.[#1 Nya 7:30]

¹⁸Hao ndio wana wa Zilpa, ambaye Labani alimpa Lea, binti yake, naye akamzalia Yakobo hao, watu kumi na sita.[#Mwa 30:10]

¹⁹Wana wa Raheli, mkewe Yakobo, Yusufu na Benyamini.

²⁰Walizaliwa kwake Yusufu katika nchi ya Misri, Manase na Efraimu, aliomzalia Asenathi binti Potifera, kuhani wa Oni.[#Mwa 41:50-52]

²¹Na wana wa Benyamini; Bela, na Bekeri, na Ashbeli, na Gera, na Naamani, na Ehi, na Roshi, na Mupimu, na Hupimu, na Ardi.[#1 Nya 7:6,12]

²²Hao ndio wana wa Raheli, aliomzalia Yakobo, wote walikuwa watu kumi na wanne.

²³Na wana wa Dani; Hushimu.[#1 Nya 7:12]

²⁴Na wana wa Naftali; Yaseeli, na Guni, na Yaseri, na Shilemu.[#1 Nya 7:13]

²⁵Hao ndio wana wa Bilha, ambaye Labani alimpa Raheli, binti yake, naye akamzalia Yakobo hao; wote walikuwa watu saba.[#Mwa 29:29; 30:5,7]

²⁶Watu wote waliokuja pamoja na Yakobo mpaka Misri, waliokuwa wazawa wake, bila wake za wanawe, walikuwa watu sitini na sita.[#Kut 1:5]

²⁷Na wana wa Yusufu aliozaliwa katika Misri walikuwa wawili. Watu wote wa nyumba ya Yakobo walioingia Misri walikuwa sabini.[#Mdo 7:14; Kum 10:22]

Yakobo apata makao Gosheni

²⁸Yakobo akamtuma Yuda mbele yake kwa Yusufu, ili amwongoze njia mpaka Gosheni. Wakaja mpaka nchi ya Gosheni.[#Mwa 31:21]

²⁹Yusufu akatandika gari lake, akapanda kwenda kumlaki Israeli, babaye, huko Gosheni; akajionesha kwake, akamwangukia shingoni, akalia shingoni mwake kitambo kirefu.

³⁰Israeli akamwambia Yusufu, Na nife sasa, kwa kuwa nimekuona uso wako, ya kuwa ungali hai.[#Lk 2:29]

³¹Yusufu akawaambia ndugu zake na watu wa nyumbani mwa baba yake, Nitapanda mimi nimpashe Farao habari; nitamwambia, Ndugu zangu, na watu wa nyumbani mwa baba yangu, waliokuwa katika nchi ya Kanaani, wamenijia.

³²Na watu hao ni wachungaji, maana wamekuwa watu wa kuchunga wanyama, nao wameleta kondoo zao, na ng'ombe zao, na yote waliyo nayo.

³³Itakuwa Farao atakapowaita, na kuwauliza, Kazi yenu ni nini?[#Mwa 47:2,3]

³⁴Semeni, Watumishi wako tumekuwa wachunga wanyama tangu ujana wetu, na hata leo, sisi, na baba zetu; mpate kukaa katika nchi ya Gosheni; maana kila mchunga wanyama ni chukizo kwa Wamisri.[#Mwa 30:35; 34:5; 37:12; Kut 8:26]