Wasia wa Yakobo kwa wanawe

¹Yakobo akawaita wanawe, akasema, Kusanyikeni, ili niwaambie yatakayowapata siku zijazo.[#Kum 4:30; 33:1; Amo 3:7; Hes 24:14]

²Kusanyikeni, msikie, enyi wana wa Yakobo,[#Zab 34:11]

Msikilizeni Israeli, baba yenu.

³Reubeni, u mzaliwa wangu wa kwanza,[#Kum 21:17]

Nguvu zangu, na malimbuko ya uwezo wangu.

Umewapita wengine kwa ukuu na kwa nguvu.

⁴Umekuwa kama maji yavukavyo mpaka, basi nawe hutafana tena,[#Kum 27:20; 1 Nya 5:1]

Kwa sababu ulikipanda kitanda cha baba yako,

Ukakitia unajisi; alikipandia kitanda changu.

⁵Simeoni na Lawi ni ndugu;[#Mit 18:9; Mwa 34:25]

Panga zao ni silaha za jeuri.

⁶Nafsi yangu, usiingie katika siri yao,[#Mit 1:15; Zab 26:9]

Fahari yangu usiungane na kusanyiko lao,

Maana katika ghadhabu yao walimwua mtu,

Na kwa ukaidi wao walikata mshipa wa ng'ombe;

⁷Ghadhabu yao na ilaaniwe, maana ilikuwa kali,[#Yos 21:1; 1 Nya 4:24]

Na hasira yao, maana ilikuwa haina huruma.

Nitawagawa katika Yakobo,

Nitawatawanya katika Israeli.

⁸Yuda, ndugu zako watakusifu,

Mkono wako utakuwa shingoni mwa adui zako.

Wana wa baba yako watakuinamia.

⁹Yuda ni mwanasimba,[#Hes 24:9]

Kutoka katika mawindo, mwanangu, umepanda;

Aliinama akajilaza kama simba,

Na kama simba mke; ni nani atakayemwamsha?

¹⁰Fimbo ya enzi haitaondoka katika Yuda,[#Hes 24:17; Zab 60:7; 1 Nya 5:2; Isa 11:1; Eze 21:27; Dan 9:25; Mt 21:9; Lk 1:32; Isa 2:2; 11:10; 60:1-5; Hag 2:7; Lk 2:30; 2 Fal 18:32]

Wala mfanya sheria kati ya miguu yake,

Hata atakapokuja Yeye, mwenye milki,

Ambaye mataifa watamtii.

¹¹Atafunga punda wake katika mzabibu,

Na mwanapunda wake katika mzabibu mzuri.

Amefua nguo zake kwa mvinyo,

Na mavazi yake kwa damu ya zabibu.

¹²Macho yake yatakuwa mekundu kwa mvinyo,

Na meno yake yatakuwa meupe kwa maziwa.

¹³Zabuloni atakaa pwani ya bahari,[#Kum 33:18]

Naye atakuwa kama pwani za kuegesha merikebu,

Na mpaka wake utakuwa kando ya Sidoni.

¹⁴Isakari ni punda hodari,

Ajilazaye kati ya mazizi ya kondoo;

¹⁵Akaona mahali pa raha, kuwa pema,

Na nchi, ya kuwa ni nzuri,

Akainama bega lake lichukue mizigo,

Akawa mtumishi kwa kazi ngumu.

¹⁶Dani atahukumu watu wake,[#Amu 13:2; 15:20]

Kama moja ya makabila ya Israeli;

¹⁷Dani atakuwa nyoka barabarani,[#Amu 18:27]

Bafe katika njia,

Aumaye visigino vya farasi,

Na apandaye akaanguka chali.

¹⁸Wokovu wako nimeungoja, Ee BWANA.[#Zab 25:3,5; 62:5; Isa 25:9; 40:31; Rum 2:7; 1 Kor 1:7; Flp 3:20; Tit 2:13]

¹⁹Gadi, jeshi litamsonga,[#Kum 33:20]

Lakini atawasonga wao mpaka visigino.

²⁰Asheri, chakula chake kitakuwa kinono,

Naye atatoa tunu za kifalme.

²¹Naftali ni ayala aliyefunguliwa;

Anatoa maneno mazuri.

²²Yusufu ni mti mchanga wenye kuzaa,

Mti mchanga wenye kuzaa karibu na chemchemi,

Matawi yake yametanda ukutani.

²³Wapiga mishale walimtenda machungu,[#Mwa 37:24]

Wakamlenga na kumbana sana

²⁴Lakini upinde wake ukakaa imara,[#Ayu 29:20; Zab 132:2,5; 80:1; Isa 28:16]

Mikono yake ikapata nguvu,

Kwa mikono ya Mwenye Enzi wa Yakobo;

Kwa jina la mchungaji, yeye mwamba wa Israeli,

²⁵Naam, kwa Mungu wa baba yako atakayekusaidia;[#Kum 33:13]

Kwa baraka za juu mbinguni.

Baraka za vilindi vilivyo chini,

Baraka za maziwa, na za mimba.

²⁶Baraka za baba yako

Ni nyingi kuliko za milima ya kale,

Vitu vinavyotamanika vya vilima vya milele;

Na vikae juu ya kichwa cha Yusufu,

Juu ya utosi wa kichwa chake, yeye aliyeteuliwa kati ya ndugu zake.

²⁷Benyamini ni mbwamwitu mwenye kuraruararua[#Amu 20:21,25; Hes 23:24; Est 8:11; Eze 39:10; Zek 14:1,7]

Asubuhi atakula mawindo,

Na jioni atagawanya mateka.

²⁸Hayo yote ndiyo makabila ya Israeli kumi na mawili. Na hayo ndiyo aliyowaambia baba yao, na kuwabariki; mmoja mmoja kwa baraka zake aliwabariki.

Kufa kwa Yakobo na kuzikwa kwake

²⁹Akawaamuru, akasema, Mimi ninakwenda kukusanywa pamoja na watu wangu; mnizike pamoja na baba zangu, katika pango iliyomo shambani mwa Efroni, Mhiti;[#Mwa 15:15; 25:8; 2 Sam 19:37; Mwa 47:30; 50:13]

³⁰katika ile pango iliyomo shambani mwa Makpela, iliyo mbele ya Mamre katika nchi ya Kanaani, aliyoinunua Abrahamu pamoja na shamba kwa Efroni Mhiti, pawe milki yake ya kuzikia.[#Mwa 23:16]

³¹Humo walimzika Abrahamu, na Sara mkewe; humo wakamzika Isaka, na Rebeka mkewe; nami humo nikamzika Lea;[#Mwa 23:19; 25:9; 35:29]

³²shamba na pango lililomo lililonunuliwa kwa wazawa wa Hethi.

³³Basi Yakobo alipokwisha kuwaagiza wanawe, akakunja miguu yake kitandani, akafa, akakusanywa pamoja na watu wake.