¹Maana kila kuhani mkuu aliyetwaliwa katika wanadamu amewekwa kwa ajili ya wanadamu katika mambo yanayomhusu Mungu, ili atoe matoleo na dhabihu kwa ajili ya dhambi;

²awezaye kuwachukulia kwa upole wao wasiojua na wenye kupotea, kwa kuwa yeye mwenyewe ana udhaifu;[#Ebr 4:15]

³na kwa sababu hiyo imempasa, kama kwa ajili ya watu, vivyo hivyo kwa ajili ya nafsi yake mwenyewe, kutoa dhabihu kwa ajili ya dhambi.[#Law 9:7; 16:6]

⁴Na hapana mtu ajitwaliaye mwenyewe heshima hii, ila yeye aitwaye na Mungu, kama vile Haruni.[#Kut 28:1]

⁵Vivyo hivyo Kristo naye hakujitukuza nafsi yake kufanywa kuhani mkuu, lakini yeye aliyemwambia,[#Zab 2:7; Mdo 13:33]

Ndiwe mwanangu,

Mimi leo nimekuzaa.

⁶Kama asemavyo mahali pengine,[#Zab 110:4; Ebr 7:1]

Ndiwe kuhani milele

Kwa mfano wa Melkizedeki.

⁷Yeye, siku hizo za mwili wake, alimtolea yule, awezaye kumwokoa na kumtoa katika mauti, maombi na dua pamoja na kulia sana na machozi, akasikilizwa kwa jinsi alivyokuwa mcha Mungu;[#Mt 26:36-46; Mk 14:32-42; Lk 22:39-46]

⁸na, ingawa ni Mwana, alijifunza kutii kwa mateso hayo yaliyompata;[#Flp 2:8]

⁹naye alipokwisha kukamilishwa, akawa sababu ya wokovu wa milele kwa watu wote wanaomtii;[#Isa 45:17; Yn 17:1,5]

¹⁰kisha ametajwa na Mungu kuwa kuhani mkuu kwa mfano wa Melkizedeki.

Maonyo juu ya uasi

¹¹Yeye ambaye tuna maneno mengi ya kunena kuhusu habari zake; na ni shida kuyaeleza kwa kuwa mmekuwa wavivu wa kusikia.

¹²Kwa maana, iwapasapo kuwa waalimu, (maana wakati mwingi umepita), mnahitaji kufundishwa na mtu mafundisho ya kwanza ya maneno ya Mungu; nanyi mmekuwa mnahitaji maziwa wala si chakula kigumu.[#1 Kor 3:2; 1 Pet 2:2]

¹³Kwa maana kila mtu atumiaye maziwa hajui sana neno la haki, kwa kuwa ni mtoto mchanga.[#Efe 4:14]

¹⁴Lakini chakula kigumu ni cha watu wazima, ambao akili zao, kwa kutumiwa, zimezoeshwa kupambanua mema na mabaya.[#Flp 1:10; Rum 16:19; Mwa 2:17]