Utabiri juu ya Dameski

¹Ufunuo juu ya Dameski. Tazama, Dameski umeondolewa usiwe mji, nao utakuwa rundo la magofu.[#2 Fal 16:9; Yer 49:23-27; Amo 1:3-5; Zek 9:1]

²Miji ya Aroeri imeachwa; itakuwa mahali pa makundi ya kondoo, nao watajilaza huko wala hapana atakayewatia hofu.[#Yer 7:33]

³Na ngome ya Efraimu itakomeshwa, na ufalme wa Dameski, na mabaki ya Shamu; watakuwa kama utukufu wa wana wa Israeli, asema BWANA wa majeshi.[#Isa 7:16]

⁴Tena itakuwa katika siku hiyo, utukufu wa Yakobo utapungua na kunona kwa mwili wake kutakwisha.[#Isa 10:16]

⁵Tena itakuwa kama hapo mvunaji ashikapo mabua ya ngano, na mkono wake ukatapo masuke; tena itakuwa kama hapo mtu aokotapo masuke katika bonde la Warefai.[#Yer 51:33; Ufu 14:15-19]

⁶Lakini kilichosazwa na mvunaji kitakuwa ndani yake, kama vile wakati wa kupiga mizeituni, matunda mawili matatu yaliyo juu sana; matunda manne matano katika matawi, matawi ya mti wa matunda, asema BWANA, Mungu wa Israeli.

⁷Katika siku hiyo mwanadamu atamwangalia Muumba wake, na macho yake yatamtazama Mtakatifu wa Israeli.[#2 Nya 30:11; Zab 34:5; Hos 5:15; Mik 7:7; Zek 12:10]

⁸Wala hataziangalia madhabahu, kazi ya mikono yake; wala hatavitazama vilivyofanyika kwa vidole vyake, maashera na sanamu za jua.

⁹Katika siku hiyo miji yake yenye maboma itakuwa kama mahali palipoachwa ndani ya mwitu, na juu ya kilele cha mlima, palipoachwa mbele ya wana wa Israeli; napo patakuwa ganjo.

¹⁰Maana umemsahau Mungu wa wokovu wako, wala hukuukumbuka mwamba wa ngome yako; kwa sababu hiyo ulipanda mashamba yapendezayo, na kutia ndani yake mizabibu migeni.[#Zab 106:13,21]

¹¹Katika siku ile ulipopanda, ulifanya kitalu, na wakati wa asubuhi ulizimeesha mbegu zako, lakini mavuno yatatoweka siku ya huzuni, na ya sikitiko la moyo lifishalo.

¹²Aha! Uvumi wa watu wengi!

Wanavuma kama uvumi wa bahari;

Aha! Ngurumo ya mataifa!

Wananguruma kama ngurumo ya maji mengi;

¹³Mataifa wananguruma kama ngurumo ya maji mengi;

Lakini atawakemea, nao watakimbia mbali sana,

Watafukuzwa kama makapi milimani mbele ya upepo,

Na kama mavumbi vuruvuru mbele ya tufani.

¹⁴Wakati wa jioni, tazama, kuna hofu;[#Amu 5:31; Mit 22:23; Zab 8:3,9]

Na kabla ya mapambazuko hawako;

Hilo ndilo fungu lao watutekao,

Na ajali yao wanaotunyang'anya mali zetu.