Wimbo wa Yuda wa ushindi

¹Siku ile wimbo huu utaimbwa katika nchi ya Yuda;

Sisi tunao mji ulio na nguvu;

Ataamuru wokovu kuwa kuta na maboma.

²Fungueni malango yake,[#Zab 118:19; Isa 60:11; Ufu 21:13,24-27]

Taifa lenye haki, lishikalo kweli, liingie.

³Utamlinda yeye ambaye moyo wake umekutegemea

Katika amani kamilifu, kwa kuwa anakutumaini.

⁴Mtumainini BWANA siku zote

Maana BWANA YEHOVA ni mwamba wa milele.

⁵Kwa kuwa amewashusha wakaao juu,

Mji ule ulioinuka, aushusha,

Aushusha hadi chini, auleta hadi mavumbini.

⁶Mguu utaukanyaga chini,

Naam, miguu yao walio maskini,

Na hatua zao walio wahitaji.

⁷Njia yake mwenye haki ni unyofu;[#Kum 32:4]

Wewe uliye mnyofu wainyosha njia ya mwenye haki.

⁸Naam, katika njia ya hukumu zako[#Zab 18:22; Isa 64:5; Mal 4:4; Lk 1:6]

Sisi tumekungoja, Ee BWANA;

Shauku ya nafsi zetu inaelekea

Jina lako na ukumbusho wako.

⁹Kwa nafsi yangu nimekutamani wakati wa usiku;[#Zab 63:6; 83:16; Wim 3:1; Lk 6:12]

Naam, kwa nafsi yangu ndani yangu nitakutafuta mapema;

Maana hukumu zako zikiwapo duniani,

Watu wakaao duniani hujifunza haki.

¹⁰Mtu mbaya ajapofadhiliwa,[#Mhu 8:12; Rum 2:4; Zab 143:10]

Hata hivyo hatajifunza haki;

Katika nchi ya unyofu atatenda udhalimu,

Wala hatauona utukufu wa BWANA.

¹¹BWANA, mkono wako umeinuliwa, lakini hawaoni; lakini watauona wivu wako kwa ajili ya watu wako, nao watatahayari; naam, moto utawala adui zako.[#Ayu 34:27; Ebr 10:27]

¹²BWANA, utatuamuria amani; maana ni wewe pia uliyetutendea kazi zetu zote.

¹³Ee BWANA, Mungu wetu, mabwana wengine zaidi ya wewe wametumiliki; lakini kwa msaada wako peke yako tutalitaja jina lako.[#Zab 66:12]

¹⁴Wao wamekufa, hawataishi; wamekwisha kufariki, hawatafufuka; kwa sababu hiyo umewajia, na kuwaangamiza, na kuupoteza ukumbusho wao.

¹⁵Umeliongeza hilo taifa, BWANA, umeliongeza taifa; wewe umetukuzwa, umeipanua mipaka yote ya nchi hii.

¹⁶BWANA, katika taabu zao walikwenda kwako; waliomba maombi mengi wakati adhabu yako ilipokuwa juu yao.[#2 Nya 33:12; Hos 5:15]

¹⁷Kama vile mwanamke mwenye mimba anayekaribia wakati wake wa kuzaa, alivyo na uchungu na kulia kwa sababu ya maumivu yake, ndivyo tulivyokuwa sisi mbele zako, Ee BWANA.

¹⁸Tumekuwa na mimba, tumekuwa na uchungu, tumekuwa kana kwamba tumezaa upepo; hatukufanya wokovu wowote duniani, wala hawakuanguka wakaao duniani.[#Zab 17:14]

¹⁹Wafu wako wataishi, maiti zangu zitafufuka; amkeni, kaimbeni, ninyi mnaokaa mavumbini, kwa maana umande wako ni kama umande wa mimea, nayo ardhi itawatoa waliokufa.[#Isa 25:8; Hos 13:14; Yn 5:28,29; Dan 12:2]

²⁰Njooni, watu wangu, ingia wewe ndani ya vyumba vyako, ukafunge mlango nyuma yako ujifiche kitambo kidogo, mpaka ghadhabu hii itakapopita.[#Mwa 7:1; Zab 30:5; 2 Kor 4:17]

²¹Kwa maana, tazama, BWANA anakuja kutoka mahali pake, ili kuwaadhibu wakaao duniani, kwa sababu ya uovu wao; ardhi nayo itafunua damu yake, wala haitawafunika tena watu wake waliouawa.[#Mik 1:3; Yud 1:14]