Baraka za Mungu kwa Israeli

¹Lakini sikia sasa, Ee Yakobo, mtumishi wangu; na Israeli, niliyekuchagua;[#Isa 41:8; Yer 30:10]

²BWANA, aliyekufanya, na kukuumba toka tumboni, yeye atakayekusaidia, asema hivi; Usiogope, Ee Yakobo, mtumishi wangu; na wewe, Yeshuruni, niliyekuchagua.[#Kum 32:15]

³Kwa maana nitamimina maji juu yake aliye na kiu, na vijito vya maji juu ya mahali pakavu; nitamwaga roho yangu juu ya wazao wako, na baraka yangu juu yao utakaowazaa;[#Mal 3:10; Yn 7:38]

⁴nao watachipua kama nyasi, kama mierebi kandokando mwa vijito.

⁵Mmoja atasema, Mimi ni wa BWANA; na mwingine atajiita kwa jina la Yakobo; na mwingine ataandika juu ya mkono wake, Kwa BWANA, na kujiita kwa jina la Israeli.[#Kut 13:9; Neh 9:38]

⁶BWANA, Mfalme wa Israeli, Mkombozi wako, BWANA wa majeshi, asema hivi; Mimi ni wa kwanza, na mimi ni wa mwisho; zaidi yangu mimi hapana Mungu.[#Isa 48:12; 43:1; 41:4; Ufu 1:8,17; 2:8; 22:13]

⁷Naye ni nani kama mimi atakayeita, na kuyahubiri haya, na kunitengenezea, tangu nilipowaweka watu wa kale? Na mambo yanayokuja na yatakayotokea, wayatangaze.

⁸Msiogope wala msifanye hofu; je! Sikukuambia haya zamani na kuyatangaza? Na ninyi ni mashahidi wangu. Je! Yuko Mungu zaidi yangu mimi? Hakika hapana Mwamba; mimi sijui mwingine.[#Kum 4:35; 1 Sam 2:2; 2 Sam 22:32]

Upumbavu wa kuabudu sanamu

⁹Wachongao sanamu, wote ni ubatili; wala mambo yao yawapendezayo hayatafaa kitu; wala mashahidi wao wenyewe hawaoni, wala hawajui; ili watahayarike.[#Isa 41:24; 42:17-20; Kum 4:28; Zab 115:4]

¹⁰Ni nani aliyejichongea mungu mmoja, au aliyesubu sanamu isiyofaa kitu?[#Yer 10:5; Hab 2:18]

¹¹Tazama, wenziwe wote watatahayari; na mafundi, hao ni wanadamu; na wakusanyike pamoja, wakasimame; wataogopa na kutahayari pamoja.[#Zab 97:7; Isa 42:17]

¹²Mfua chuma hufanza shoka, hufanya kazi kwa makaa, huitengeneza sanamu kwa nyundo, huifanyiza kwa nguvu za mkono wake; naam, huona njaa, nguvu zake zikampungukia; asipokunywa maji huzimia.[#Isa 40:19]

¹³Seremala hunyosha uzi; huiandika kwa kalamu ya mate; huitengeneza kwa randa, huiandika kwa bikari, huifanza kwa mfano wa mwanadamu, sawasawa na uzuri wa mwanadamu, ili ikae nyumbani.

¹⁴Yeye hujikatia mierezi, hutwaa mtiriza, na mwaloni, hujichagulia mti mmoja katika miti ya msituni; hupanda mvinje, mvua ikausitawisha.

¹⁵Kisha utamfaa mwanadamu kwa kuni; hutwaa kipande, akaota moto; naam, huuwasha moto, akaoka mkate; naam, huufanya mungu, akauabudu; huifanya sanamu ya kuchonga, akaisujudia.

¹⁶Sehemu moja huiteketeza; kwa sehemu nyingine hula nyama; huoka chakula kiokwacho, akashiba; naam, huota moto, akasema, Aha, nimeota moto, nimeona moto;

¹⁷na kwa sehemu iliyobakia hufanya mungu, yaani, sanamu yake ya kuchonga; husujudu mbele yake akaiabudu, akaiomba, akasema, Uniokoe; maana wewe u mungu wangu.

¹⁸Hawajui wala hawafikiri; maana amewafumba macho, wasione, na mioyo yao, wasiweze kufahamu.[#Zab 81:12; Isa 45:20; Rum 11:8-10; 2 The 2:11]

¹⁹Wala hapana atiaye moyoni, wala hapana maarifa, wala fahamu kusema, Nimeteketeza sehemu motoni, naam, pia nimeoka mkate juu ya makaa yake; nimeoka nyama nikaila; nami, je! Kilichobaki nikifanye kuwa chukizo? Je! Nisujudie shina la mti?

²⁰Hula majivu; moyo uliodanganyika umempotosha, asiweze kuiokoa nafsi yake, wala kusema, Je! Sio uongo mkononi mwangu?[#Hos 4:12; Rum 1:21; 2 The 2:11]

Israeli hujasahauliwa

²¹Kumbuka haya, Ee Yakobo; nawe Israeli, maana wewe u mtumishi wangu; nimekuumba; u mtumishi wangu; Ee Israeli, hutasahauliwa na mimi.

²²Nimeyafuta makosa yako kama wingu zito, na dhambi zako kama wingu; unirudie; maana nimekukomboa.[#Isa 1:18; 43:25; 53:11,12; Yer 33:8; Mik 7:18,19; Kol 1:14; Isa 43:1; 1 Kor 6:20; 1 Pet 1:18,19]

²³Imbeni, enyi mbingu, maana BWANA ametenda hayo;[#Zab 69:34; Isa 42:10; Ufu 18:20]

Pigeni kelele, enyi mabonde ya nchi;

Pazeni nyimbo, enyi milima;

Nawe, msitu, na kila mti ndani yake.

Maana BWANA amemkomboa Yakobo,

Naye atajitukuza katika Israeli.

²⁴BWANA, mkombozi wako, yeye aliyekuumba tumboni, asema hivi; Mimi ni BWANA, nifanyaye vitu vyote; nizitandaye mbingu peke yangu; niienezaye nchi; ni nani aliye pamoja nami?[#Ayu 19:25; 9:8; Isa 43:1,14; 40:22; Zab 104:2]

²⁵Nizitanguaye ishara za waongo, na kuwatia waganga wazimu; niwarudishaye nyuma wenye hekima, na kuyageuza maarifa yao kuwa ujinga;[#Yer 50:36; 1 Kor 1:20]

²⁶nilithibitishaye neno la mtumishi wangu, na kuyafikiliza mashauri ya wajumbe wangu; niuambiaye Yerusalemu, Utakaliwa na watu, nayo miji ya Yuda, Itajengwa, nami nitapainua mahali pake palipobomoka;[#Zek 1:6; Mt 5:18]

²⁷niviambiaye vilindi, Kauka, nami nitaikausha mito yako;[#Yer 50:38]

²⁸nimwambiaye Koreshi, Mchungaji wangu, naye atayatenda mapenzi yangu; hata ataunena Yerusalemu, Utajengwa; na hilo hekalu, Msingi wako utawekwa.[#2 Nya 36:22,23; Ezr 1:2]