Wimbo wa shamba la mizabibu lisilozaa matunda

¹Na nimwimbie mpenzi wangu wimbo wa mpenzi wangu kuhusu shamba lake la mizabibu.[#Mt 21:33; Mk 12:1; Lk 20:9; Zab 80:8]

Mpenzi wangu alikuwa na shamba la mizabibu,

Kilimani penye kuzaa sana;

²Akachimba handaki kulizunguka pande zote,[#Kum 32:6]

Akatoa mawe yake,

Akapanda ndani yake mzabibu ulio mzuri,

Akajenga mnara katikati yake,

Akachimba shinikizo ndani yake;

Akatumaini ya kuwa utazaa zabibu,

Nao ukazaa zabibumwitu.

³Na sasa, enyi wenyeji wa Yerusalemu, nanyi watu wa Yuda, amueni, nawasihi, kati ya mimi na shamba langu la mizabibu.[#Rum 3:4]

⁴Je! Ni kazi gani iliyohitajika kutendeka ndani ya shamba langu la mizabibu nisiyoitenda? Basi, nilipotumaini ya kuwa litazaa zabibu, mbona lilizaa zabibumwitu?

⁵Haya basi, sasa nitawaambieni nitakalolitenda shamba langu la mizabibu; nitaondoa ua wake, nalo litaliwa; nitabomoa ukuta wake, nalo litakanyagwa;

⁶nami nitaliharibu; wala halitapogolewa wala kulimwa, bali litamea mbigili na miiba; nami nitayaamuru mawingu yasinyeshe mvua juu yake.

⁷Kwa maana shamba la mizabibu la BWANA wa majeshi ndilo nyumba ya Israeli, na watu wa Yuda ni mche wake wa kupendeza; akatumaini kuona hukumu ya haki, na kumbe! Aliona dhuluma; alitumaini kuona haki, na kumbe! Alisikia kilio.

Udhalimu wa kijamii washutumiwa

⁸Ole wao waongezao nyumba baada ya nyumba, na kuweka shamba karibu na shamba, hadi ikawa hapana nafasi tena, nanyi ikawa hamna budi kukaa peke yenu katikati ya nchi![#Mik 2:2]

⁹BWANA wa majeshi asema katika masikio yangu, Hakika majumba mengi yatakuwa ukiwa, naam, majumba makubwa, mazuri, yatakuwa hayana watu.

¹⁰Kwa maana shamba la mizabibu la eka kumi litatoa bathi moja tu, na homeri ya mbegu itatoa efa tu.[#Law 27:16]

¹¹Ole wao waamkao asubuhi na mapema, wapate kufuata kileo; wakishinda sana hadi usiku wa manane mpaka mvinyo imewaka kama moto ndani yao![#Mit 23:29,30]

¹²Na kinubi, na zeze, na matari, na filimbi, na mvinyo, zote ziko katika karamu zao; lakini hawaiangalii kazi ya BWANA wala kuyafikiri matendo ya mikono yake.[#Amo 6:5; Ayu 34:27; Hos 4:11]

¹³Kwa sababu hiyo watu wangu wamechukuliwa mateka, kwa kukosa kuwa na maarifa; na watu wao wenye cheo wana njaa, na wengi wao waona kiu sana.[#Isa 1:3,7; Hos 4:6; Lk 19:44; Rum 1:28; 2 Pet 3:5]

¹⁴Kwa hiyo kuzimu kumeongeza tamaa yake, kumefunua kinywa chake bila kiasi; na utukufu wao, na wingi wao, na ghasia yao, naye pia afurahiye miongoni mwao, hushuka na kuingia humo.

¹⁵Na mtu mnyonge ainamishwa, na mtu mkubwa amedhilika, na macho yao walioinuka hunyenyekezwa,

¹⁶bali BWANA wa majeshi ametukuzwa katika hukumu, na Mungu aliye Mtakatifu ametakaswa katika haki.

¹⁷Ndipo wana-kondoo watakapojilisha kama walio katika malisho yao wenyewe, na mahali pao walionenepa, palipoachwa ukiwa, wageni watakula.

¹⁸Ole wao wavutao uovu kwa kamba za ubatili, na dhambi kama kwa kamba za gari!

¹⁹Wasema, Na afanye haraka, aihimize kazi yake, tupate kuiona; na likaribie shauri lake aliye Mtakatifu wa Israeli, tupate kuliona.[#Isa 66:5; Yer 17:5; Amo 5:18; 2 Pet 3:3]

²⁰Ole wao wasemao kwamba uovu ni wema, na kwamba wema ni uovu; watiao giza badala ya nuru, na nuru badala ya giza; watiao uchungu badala ya utamu, na utamu badala ya uchungu!

²¹Ole wao walio na hekima katika macho yao wenyewe, na wenye busara katika fikira zao wenyewe!

²²Ole wao walio hodari kunywa kileo chenye nguvu, na walio hodari wa kuchanganya vileo;

²³wampao haki mwenye uovu, ili wapewe ijara, na kumwondolea mwenye haki haki yake!

Uvamizi wa kigeni watabiriwa

²⁴Kwa hiyo kama vile muali wa moto uteketezavyo mabua makavu, na kama manyasi makavu yaangukavyo katika muali wa moto; kadhalika shina lao litakuwa kama ubovu, na ua lao litapeperushwa juu kama mavumbi; kwa sababu wameikataa sheria ya BWANA wa majeshi, na kulidharau neno lake aliye Mtakatifu wa Israeli.[#2 Fal 17:14; Lk 7:30; Yn 12:48]

²⁵Kwa sababu hiyo hasira ya BWANA imewaka juu ya watu wake, naye amenyosha mkono wake juu yao; akawapiga, navyo vilima vilitetemeka, na mizoga yao ilikuwa kama takataka katika njia kuu. Pamoja na hayo yote hasira yake haikugeukia mbali, lakini mkono wake umenyoshwa hata sasa.

²⁶Naye atawatolea ishara mataifa toka mbali,

Naye atawapigia miruzi tokea mwisho wa nchi;

Na tazama, watakuja mbio mbio upesi sana.

²⁷Miongoni mwao hakuna achokaye wala kukwaa;

Hakuna asinziaye wala kulala usingizi;

Wala mshipi wa viuno vyao hautalegea.

Wala ukanda wa viatu vyao hautakatika;

²⁸Mishale yao ni mikali, na pinde zao zote zimepindika;

Kwato za farasi wao zitahesabika kama gumegume;

Na gurudumu zao kama kisulisuli;

²⁹Ngurumo yao itakuwa kama ya simba;

Watanguruma kama wanasimba;

Naam, watanguruma na kukamata mateka,

Na kuyachukua na kwenda zao salama,

Wala hakuna mtu atakayeokoa.

³⁰Nao watanguruma juu yao siku hiyo

Kama ngurumo ya bahari;

Na mtu akiitazama nchi, ataona giza na dhiki

Nayo nuru imetiwa giza katika mawingu yake.