Kusanyiko jipya la waliotawanyika

¹Ondoka, uangaze; kwa kuwa nuru yako imekuja,[#Mal 4:2]

Na utukufu wa BWANA umekuzukia.

²Maana, tazama, giza litaifunika dunia,

Na giza kuu litazifunika makabila ya watu;

Bali BWANA atakuzukia wewe,

Na utukufu wake utaonekana juu yako.

³Na mataifa wataijia nuru yako,[#Ufu 21:24]

Na wafalme kuujia mwanga wa mapambazuko yako.

⁴Inua macho yako, utazame pande zote;

Wote wanakusanyana; wanakujia wewe;

Wana wako watakuja kutoka mbali.

Na binti zako watabebwa nyongani.

⁵Ndipo utakapoona na kutiwa nuru,

Na moyo wako utatetemeka na kukunjuka;

Kwa kuwa wingi wa bahari utageuzwa kukujia,

Utajiri wa mataifa utakuwasilia.

⁶Wingi wa ngamia utakufunika,[#Mwa 25:4; Zab 72:10; Mt 2:11]

Ngamia vijana wa Midiani na Efa;

Wote watakuja kutoka Sheba;

Wataleta dhahabu na uvumba;

Na kuzitangaza sifa za BWANA.

⁷Makundi yote ya Kedari yatakusanyika kwako,[#Mwa 25:13; Hag 2:7-9]

Kondoo dume wa Nebayothi watakutumikia;

Watapanda juu ya madhabahu yangu kwa kibali,

Nami nitaitukuza nyumba ya utukufu wangu.

⁸Ni nani hawa warukao kama wingu,

Na kama njiwa waendao madirishani kwao?

⁹Hakika yake visiwa vitaningojea,[#Gal 4:26; Zek 14:14; Yer 3:17; Isa 55:5]

Na merikebu za Tarshishi kwanza,

Ili kuleta wana wako kutoka mbali,

Na fedha yao na dhahabu yao pamoja nao,

Kwa ajili ya jina la BWANA, Mungu wako,

Kwa ajili yake Mtakatifu wa Israeli,

Kwa kuwa amekutukuza wewe.

¹⁰Na wageni watajenga kuta zako,[#Zek 6:15; Ufu 21:24]

Na wafalme wao watakuhudumu;

Maana katika ghadhabu yangu nilikupiga,

Lakini katika upendeleo wangu nimekurehemu.

¹¹Malango yako nayo yatakuwa wazi daima;[#Ufu 21:25-26]

Hayatafungwa mchana wala usiku;

Ili watu wapate kukuletea utajiri wa mataifa,

Huku wakiwaongoza wafalme wao.

¹²Kwa maana kila taifa na ufalme wa watu[#Zab 2:12; Zek 14:17; Mt 21:44; Lk 19:27; Ufu 2:26,27]

Wasiotaka kukutumikia wataangamia;

Naam, mataifa hayo wataharibiwa kabisa.

¹³Utukufu wa Lebanoni utakujia wewe,[#Isa 35:2; 1 Nya 28:2; Ebr 12:22]

Mberoshi na mtidhari na mteashuri pamoja;

Ili kupapamba mahali pangu patakatifu,

Nami nitapatukuza mahali pa miguu yangu.

¹⁴Na wana wa watu wale waliokutesa[#Ufu 3:9; 14:1]

Watakuja kwako na kukuinamia;

Nao wote waliokudharau

Watajiinamisha katika nyayo za miguu yako;

Nao watakuita, Mji wa BWANA,

Sayuni wa Mtakatifu wa Israeli.

¹⁵Na kwa kuwa umeachwa na kuchukiwa,

Hata ikawa hapana mtu aliyepita ndani yako,

Nitakufanya kuwa fahari ya milele,

Furaha ya vizazi vingi.

¹⁶Utanyonya maziwa ya mataifa,[#Zab 98:2; Isa 43:3; Eze 34:30; Ufu 5:9]

Utanyonya matiti ya wafalme;

Nawe utajua ya kuwa mimi, BWANA, ni mwokozi wako,

Na mkombozi wako, Mwenye enzi wa Yakobo.

¹⁷Badala ya shaba nitaleta dhahabu,

Na badala; ya chuma nitaleta fedha,

Na badala ya mti, shaba,

Na badala ya mawe, chuma;

Tena nitaifanya amani kuwa kama msimamizi wako,

Na haki kuwa kiongozi wako.

¹⁸Jeuri haitasikiwa tena katika nchi yako,[#Isa 26:1]

Ukiwa na uharibifu hazitakuwa mipakani mwako;

Bali utaziita kuta zako, Wokovu,

Na malango yako, Sifa.

Mungu aliye utukufu wa Sayuni

¹⁹Jua halitakuwa nuru yako tena wakati wa mchana,[#Zek 2:5; Ufu 21:23; 22:5]

Wala mwezi hautakupa nuru kwa mwangaza wake;

Bali BWANA atakuwa nuru ya milele kwako,

Na Mungu wako atakuwa utukufu wako.

²⁰Jua lako halitashuka tena,[#Amo 8:9]

Wala mwezi wako hautajitenga;

Kwa kuwa BWANA mwenyewe atakuwa nuru yako ya milele;

Na siku za kuomboleza kwako zitakoma.

²¹Watu wako nao watakuwa wenye haki wote,[#Zab 37:11; Efe 2:10; Mt 5:5; 15:13]

Nao watairithi nchi milele;

Wao ni chipukizi nililolipanda mimi mwenyewe,

Kazi ya mikono yangu mwenyewe,

Ili mimi nitukuzwe.

²²Aliye mdogo zaidi atakuwa elfu,[#Mt 13:31; Hos 1:10]

Na mnyonge atakuwa taifa hodari;

Mimi, BWANA, nitayahimiza hayo wakati wake.